ٹی ایل پی غزہ مارچ نی بلکہ فساد اتے انتشار کھنڈاوݨ کیتے نکلݨ چاہندی ہائی، ریاست اتے سکیورٹی ادارے کہیں وی جماعت کوں سیاسی یا مذہبی انتشار کھنڈاوݨ دی اجازت نہ ݙیسن، وزیر مملکت داخلہ طلال چوہدری

اسلام آباد۔9اکتوبر(اے پی پی) وزیر مملکت داخلہ سینیٹر طلال چوہدری آکھیے جو ٹی ایل پی غزہ مارچ نی بلکہ فساد اتے انتشار کھنڈاوݨ کیتے نکلݨ چاہندی ہائی، ریاست اتے سکیورٹی ادارے کہیں وی جماعت کوں سیاسی یا مذہبی انتشار کھنڈاوݨ دی اجازت نہ ݙیسن، ایہو جیھئے لوکاں کیتے اسلام آباد نو گو ایریا اے، پنجاب اتے اسلام آباد توں ٹی ایل پی دے گرفتار تھیوݨ آلے عہدیداراں اتے کارکنان توں شیشے دیاں گولیاں، کِل آلے ݙنڈے اتے مہلک کیمیکل برآمد تھئے، اے لوک پولیس اتے سکیورٹی اداریں تے حملے کیتے آئے ہوئے ہن۔ او پارلیمنٹ ہاؤس دے ٻاہروں میڈیا نال ڳالھ مہاڑ کریندے پئے ہن۔وزیر مملکت طلال چوہدری آکھیے جو ایہو جیھئے حالات اچ جݙاں عوام دیاں امیداں موجب فلسطین دا معاملہ حل تھیوݨ ویندا پئے تاں ایں ویلھے اسلام آباد یا پاکستان اچ اشتعال کھنڈا تے ایں امن کوں سبوتاژ کرݨ دی کوشش کیتی ویندی پئی اے۔ انہاں آکھیا جو شہباز شریف پی ڈی ایم حکومت اتے موجودہ حکومت دے دور اچ ہر فورم تے غزہ دا معاملہ چاتا اتے ایں دے حل کیتے کلیدی کردار ادا کیتے اتے اڄ جیڑھے حالات بہتری دے ول ویندے پئن، ایں اچ وی پاکستان دا کلیدی کردار اے۔انہاں آکھیا جو حکومت اسلام آباد اچ احتجاج کیتے ہک قانون بݨائے اتے کجھ ایس او پیز ہن ایں تے عمل کرݨ ضروری اے، اڄ وی جماعت اسلامی اسلام آباد اچ ہک تقریب کیتی ایں کیتے باقاعدہ حکومت توں اجازت ڳھدی اتے او خوش اسلوبی نال پوری تھی ڳئی، ٹی ایل پی ݙساوے جو اوں احتجاج کیتے حکومت توں اجازت ڳھدی یا کہیں وی قسم دے ایس او پیز تے عمل درآمد کیتے تاں ݙساوے۔انہاں آکھیا جو ٹی ایل پی دے سربراہ دی اشتعال انگیز تقریر اتے ڳالھیں کڈھݨ ساریاں دے سامݨے اے، سوشل میڈیا تے واویلا کیتا ڳئے جو اساݙے کارکنان ماریے ڳئن، جے کوئی زخمی یا جاں بحق تھئے تاں ثبوت ݙتے ونڄن۔ طلال چوہدری آکھیا جو اسلام آباد اتے پنجاب توں ٹی ایل پی دے عہدیداران اتے بنیادی کارکنان گرفتار کیتے ڳئن انہاں دے قبضے توں برآمد تھیوݨ آلا سامان پولیس اتے سکیورٹی اداریں تے حملے کیتے استعمال تھیوݨا ہئی جیڑھا ثابت کریندے جو اے غزہ مارچ نی بلکہ انتشار اتے فساد کھنڈاوݨ آلا مارچ ہئی۔ انہاں آکھیا جو ماضی اچ وی ٹی ایل پی ہک ایہو جیھئے ویلھے ایں نوعیت دا مارچ کرݨ چاہا جݙاں پاکستان دیاں مسلح افواج اتے پاکستان دی قوم بھارتی جارحیت دا جواب ݙیوݨ اچ لڳی ہوئی ہائی۔وزیر مملکت طلال چوہدری آکھیا جو ٹی ایل پی غزہ مارچ کیتے جیڑھا چندہ جمع کیتا اوں توں کِل آلے ݙنڈے شیشے دیاں گولیاں اتے کیمیکل مل ڳھدن ، ایں دے وی پکے ثبوت موجود ہن۔ ہݨ ثابت تھی چکیے جو ٹی ایل پی مذہب دے ناں تے غنڈہ گردی کریندی پئی اے۔ انہاں آکھیا جے اے لوک آپݨے نظریے اتے فیصلے نال سنجیدہ ہن تاں ٹی ایل پی دے سربراہ کیوں لُکدے پئن۔ انہاں آکھیا جو حکومت پنجاب اتے وفاق دے کول وڈیوز موجود ہن جیں اچ ٹی ایل پی دے عہدیدار اتے کارکنان پولیس اتے سکیورٹی اداریں تے پہلے حملہ کریندے ݙسدے پئن۔ انہاں آکھیا جو ایں احتجاج دی آڑ اچ فسادات اچ تھیوݨ آلے سارے ضیان دے ذمہ وار ٹی ایل پی دے سربراہ اتے عہدیداران ہوسن۔ہک سوال دا جواب ݙیندے انہاں آکھیا جو بدقسمتی نال ماضی اچ ٹی ایل پی دے احتجاج دے دوران شہید تھیوݨ آلے اتے شدید زخمی تھیوݨ آلے پولیس افسراں و ملازماں دے مقدمات اچ نامزد ملزماں کوں سزاواں نی مِل سڳیاں پر ہݨ وزارت داخلہ اتے ریاست فیصلہ کیتے جو انہاں مقدمات اچ ٹی ایل پی دے نامزد لوکاں کوں گرفتار کرتے عدالتاں دے ذریعے سزاواں ݙیوݨ دے عمل توں لنگھیسن تاں جو اڳوں کوئی وی ایں طرح سکیورٹی اداریں تے حملہ آور نہ تھی سڳے۔ ہک سوال دے جواب اچ انہاں آکھیا جو ٹی ایل پی دے سربراہ کنے موجود وی ایٹ گاݙی کتھوں آئی؟۔ ہک سوال دا جواب ݙیندے انہاں آکھیا جو اسلام آباد پولیس کہیں وی غیر قانونی اتے غیر آئینی جتھے نال نبڑݨ کیتے تیاریاں مکمل کر ڳھدن۔ ہک سوال دے جواب اچ انہاں آکھیا جو اسلام آباد دے ریڈ زون سودھے پورا اسلام آباد کُھلا ہویا اے پر جاڑے شہر ہووݨ پاروں حفاظتی انتظامات کیتے فیض آباد دے مقام تے کجھ کنٹینر رکھیے ڳئن پر ہݨ تئیں سڑکاں بند نی کیتیاں ڳئیاں۔