وفاقی وزیرِ صحت مصطفیٰ کمال دی صدارت اچ نیشنل انٹر ایجنسی کوآرڈینیشن کمیٹی دا اجلاس، ملک گیر خسرہ تے روبیلا ویکسی نیشن مہم دی تیاریاں دا جائزہ

اسلام آباد۔10اکتوبر (اے پی پی) وفاقی وزیرِ صحت مصطفیٰ کمال دی صدارت اچ نیشنل انٹر ایجنسی کوآرڈینیشن کمیٹی دا اجلاس تھیا۔ اجلاس اچ فیڈرل سیکرٹری ہیلتھ، ڈی جی ایف ڈی آئی سودھے مختلف وفاقی تے صوبائی محکمیاں اتے بین الاقوامی شراکت دار اداریاں دے نمائندیاں شرکت کیتی۔ اجلاس اچ 17 توں 29 نومبر 2025 تئیں جاری رہݨ آلی ملک گیر خسرہ تے روبیلا (ایم آر) ویکسی نیشن مہم دی تیاریاں اتے انتظامات دا تفصیلی جائزہ ڳھدا ڳیا۔ وفاقی وزیر صحت مصطفیٰ کمال اجلاس توں خطاب کریندیں ہوئیں آکھیا جو خسرہ اتے روبیلا ہݨ وی پاکستان اچ اہم عوامی صحت دے چیلنجز اچ شامل ہن۔ انہاں بیماریاں توں بچاوݨ کیتے ویلھے سِر ویکسی نیشن اتے مؤثر آگاہی مہم بہوں ضروری اے۔ انہاں آکھیا جو وفاق سارے صوبیاں دے نال رابطہ اتے مؤثر کوآرڈینیشن نال مہم کوں کامیاب بݨاوݨ کیتے پُرعزم اے۔ وزیر صحت ہدایت ݙتی جو عوامی آگاہی مہم کیتے پیغام رسانی کوں ٻیا مؤثر، مربوط اتے جامع بݨایا ونڄے تاںجو نِکّے بالاں دی ویکسی نیشن یقینی تھی سڳے۔ سینیٹر مصطفیٰ کمال ایں ڳالھ تے زور ݙتا جو عوام کوں وبا اتے بیماریاں توں بچاوݨ حقیقی معنیاں اچ ہیلتھ کیئر اے۔ اساں ایں مقصد کیتے سارے ممکنہ اقدامات کوں یقینی بݨیندے پئیوں۔ انہاں آکھیا جو اڳوں تھیوݨ آلی ایم آر ویکسی نیشن مہم اچ 5 سال تئیں دی عمر دے ہر نِکّے بال دی ویکسی نیشن کوں یقینی بݨایا ونڄے اتے ودھ توں ودھ کوریج حاصل کرݨ کیتے سارے ادارے متحرک کردار ادا کرن۔