پاکستان اتے تاجکستان وچال ݙو پاسے سیاسی مشاورت دا ستواں اجلاس اڳلے سال اسلام آباد اچ تھیسی، ترجمان دفتر خارجہ

اسلام آباد۔10اکتوبر(اے پی پی( پاکستان اتے تاجکستان وچال ݙو پاسے سیاسی مشاورت دا ستواں اجلاس اڳلے سال اسلام آباد اچ تھیسی۔ اے ڳالھ ترجمان دفتر خارجہ شفقت علی خان اتھاں پریس بریفنگ اچ آکھی۔ انہاں آکھیا جو پاکستان اتے تاجکستان وچال ݙو پاسے سیاسی مشاورت دا چھیکڑی اجلاس دوشنبے اچ تھیا جیں اچ پاکستانی وفد دی قیادت ایڈیشنل سیکرٹری خارجہ (مغربی ایشیا) سید علی اسد گیلانی کیتی جݙاں جو تاجکستان دی طرفوں نائب وزیرخارجہ فرخضو ارفضو سربراہی کیتی۔ شفقت علی خان آکھیا جو ڳالھ مہاڑ اچ سیاسی اتے پارلیمانی تعلقات، تجارت اتے سرمایہ کاری، دفاع اتے سلامتی، توانائی، رابطے، ثقافتی اتے تعلیمی تبادلے، کئی پاسوں تعاون اتے قونصلر معاملے سودھے ݙو پاسے معاملیں دی وݙی سطح تے ڳالھ کیتی ڳئی۔ انہاں ٹیکسٹائل، لاجسٹکس، زراعت اتے خوراک اتے فارماسیوٹیکلز اچ ودھدے تعاون دے ذریعے تجارت کوں ودھاوݨ دے معاملیں تے غور کیتا۔ انہاں علاقائی نقل و حمل دیاں راہداریاں دی اہمیت کوں اُجاگر کیتا اتے کاسا 1000 دے وقتی آپریشنلائزیشن کیتے آپݨے عزم دا اعادہ کیتا جیں دا مقصد علاقائی انضمام اتے توانائی دی سلامتی کوں تکڑا بݨاوݨا اے۔ اجلاس اچ دفاعی اتے سکیورٹی تعاون دا جائزہ ڳھدا ڳیا جیں اچ انسداد دہشت گردی دیاں کوششاں، تربیتی پروگراماں اتے دوریں دے تبادلے تے ڳالھ کیتی ڳئی۔ فریقین 2026 اچ اسلام آباد اچ ݙو پاسے سیاسی مشاورت دا ستواں اجلاس منعقد کرݨ تے متفق تھی ڳئن۔