فتنہ الخوارج دے سہولت کار خارجیاں کو ریاست دے حوالے کرو یا نتیجے سانڳے تیار رہو، خیبرپختونخوا اچ دہشت گردی دے پچھوں سیاسی اتے مجرمانہ گٹھ جوڑ اے، ڈی جی آئی ایس پی آر لیفٹیننٹ جنرل احمد شریف چوہدری کی پریس کانفرنس

پشاور۔ 10 اکتوبر (اے پی پی)پاک فوج دے ترجمان لیفٹیننٹ جنرل احمد شریف چوہدری دہشت گردی دی لعنت کوں منڈھوں پٹݨ دے عزم دا اظہار کریندے فتنہ الخوارج دے سہولت کاراں کوں خبردار کیتے جو خارجیاں کوں ریاست دے حوالے کر ݙیون یا نتیجے کیتے تیار رہن، خارجی دہشت گرداں اتے انہاں دے سہولت کاراں کیتے زمین تنگ کر ݙتی ویسی، خیبرپختونخوا اچ دہشت گردی دے پچھوں سیاسی اتے مجرمانہ ڳٹھ جوڑ اے جیں دا خمیازہ خیبرپختونخوا دے عوام بھوڳیندے پئن، کہیں ہک بندے کوں آپݨی ذات کیتے ریاست اتے پاکستانی عوام دی جان، مال اتے عزت دا سودا کرݨ دی اجازت نی ݙتی ونڄ سڳدی۔ پریس کانفرنس توں خطاب کریندے انہاں آکھیا جو جنہاں عوامل پاروں پاکستان اچ دہشتگردی تھیندی پئی اے انہاں دیاں وجہ اچ نیشنل ایکشن پلان دے نکات تے پورا عمل نہ کرݨ، دہشتگردی دے معاملے تے سیاست کرݨ اتے قوم کوں ایں اچ الجھاوݨ، بھارت دا افغانستان کوں پاکستان دے خلاف دہشتگردی دی بنیاد دے طور تے استعمال کرݨ، افغانستان اچ دہشت گرداں کوں محفوظ پناہ گاہواں اتے جدید ہتھیاراں دی دستیابی اتے دہشتگردی دے پچھوں دہشتگرد کرائم نیکسس دی موجودگی جیں کوں مقامی اتے سیاسی پشت پناہی شامل اے۔ڈی جی آئی ایس پی آر لیفٹیننٹ جنرل احمد شریف چوہدری آکھیا جو ایں پریس کانفرنس دا مقصد صوبہ خیبرپختونخوا اچ سیکورٹی دی صورتحال دا جائزہ گھنݨا اے۔ میݙے اتھاں آوݨ دا مقصد خیبرپختونخوا دے غیرت مند عوام وچال ٻہہ تے دہشتگردی دے خلاف جنگ دا احاطہ کرݨا اے۔ ایں دے نال خیبرپختونخوا دے غیرت مند عوام دی ایں جنگ اچ قربانیاں کوں خراج عقیدت پیش کرݨا اے۔ میں اتھاں افواجِ پاکستان دی طرفوں نواں عزم کرݨ آیاں جو اساں سارے رَل تے خیبرپختونخوا دے عوام دی مدد نال من حیث القوم دہشت گردی دی لعنت کوں منڈھوں پٹ تے سٹݨا اے۔ انہاں آکھیا جو گزریل ݙو ݙھاکیں توں ودھ ودھ عرصے توں پاکستان خاص طور تے خیبرپختونخوا دہشتگردی دی لعنت نال لڑدا پئے جیں اچ ہزاراں نشوم شہریاں، قانون نافذ کرݨ آلے اداریں، انٹیلیجنس ایجنسیاں، افواجِ پاکستان، پولیس اتے ایف سی دے جواناں آپݨے خون نال پاکستان دی دھرتی کوں سینچے۔ڈی جی آئی ایس پی آر خیبرپختونخوا اچ کاؤنٹر ٹیررازم دی مد اچ جاری آپریشن دا جائزہ پیش کریندے آکھیا جو 2024 دے دوران خیبرپختونخوا اچ مجموعی طور تے 14 ہزار 535 انٹیلیجنس بیسڈ آپریشن کیتے ڳئے۔ روزانہ دی بنیاد تے کیتے ڳئے انٹیلی جنس بیسڈ آپریشن دی تعداد 40 دے لڳ بھڳ اے۔ 2024 دے دوران انہاں آپریشنز اچ 769 دہشت گرداں کوں جہنم واصل کیتا ڳیا۔ 2024دے دوران خیبرپختونخوا اچ انہاں آپریشنز دے دوران 577 قیمتی جاناں شہادت نوش کیتی جنہاں اچ پاک فوج دے 272 بہادر افسرز و جوان، پولیس دے 140 جݙاں جو 165 نشوم شہری شامل ہن۔ انہاں آکھیا جو 2025 اچ ہݨ تئیں 15 ستمبر تئیں 10 ہزار 115 انٹیلی جنس بیسڈ آپریشن کیتے ڳئے۔ انہاں آپریشنز دے دوران 917 دہشت گرداں کوں جہنم واصل کیتا ونڄ چُکیے۔ 2025 دے دوران انہاں آپریشنز اچ 516 قیمتی جاناں جام شہادت نوش کیتا جیں اچ پاک فوج دے 311 بہادر افسرز و نوجوان، پولیس دے 73 جݙاں جو 132 نشوم پاکستانی شہری شامل ہن۔ انہاں آکھیا جے 2021 توں واقعے اچ وادھا تھئے تاں رسپانس اچ وی وادھا تھئے۔ اڄوکے سال جو خارجی مارے ڳئے انہاں دی تعداد گزریل ݙاہ سالاں اچ ساریں توں ودھ اے۔انہاں آکھیا جو دہشتگرد سندھ اتے پنجاب اچ کیوں آپݨا نیٹ ورک نی کھنڈا سڳیے؟ کیوں جو سندھ اتے پنجاب اچ گورننس اے، انہاں دیاں فورسز خوارج کوں روکی رکھیے جݙاں جو ݙوجھی ول خیبرپختونخوا اے جتھاں گورننس ناں دی شئے کائنی، جتھاں دہشت گرداں کوں خود گھن آ تے وسایا ویندے انہاں دی سہولت کاری کیتی ویندی اے۔ جے آپریشن کیتا ونڄے تاں مخالفت کیتی ویندی اے، صوبائیت دا رنگ ݙے تے گھٹیا سیاست کیتی ویندی اے۔ انہاں آکھیا جو اساں آپݨی سیکورٹی دی بھیک کہیں ݙوجھے ملک توں نی منڳ سڳدے۔ سیکورٹی اندرلا معاملہ اے۔ ایں ملک کیتے ٻہوں قربانیاں ݙتیاں اتے اے ضائع نہ ویسن۔لیفٹیننٹ جنرل احمد شریف چوہدری آکھیا جو 2016 سانحہ آرمی پبلک سکول دے بعد انٹیلی جنس ایجنسیاں اتے قانون نافذ کرݨ آلے اداریں دہشت گردی کوں منڈھ توں پٹݨ شروع کیتا اتے ہک پر امن خیبرپختونخوا دے خواب دی تکمیل دے نیڑے پڄ ڳئن۔ انہاں آکھیا جو پر بدقسمتی نال خیبرپختونخوا اچ سوچے سمجھیے منصوبے دے تحت دہشت گرداں اتے انہاں دے سہولت کاراں کوں سپیس ݙتی ڳئی، اتھاں گورننس اتے عوامی فلاح و بہبود کوں جاݨ ٻجھ تے کمزور کیتا ڳیا، جیں دا خمیازہ اڄ تئیں خیبرپختونخوا دے بہادر اتے غیرت مند عوام آپݨے خون اتے آپݨیاں قربانیاں دے ذریعے بھوڳیندے پئن ۔ انہاں آکھیا جو صرف 2024 اتے 2025 اچ پاکستان جہنم واصل کیتے ونڄݨ آلے افغانیاں دی تعداد 161 بݨدی اے، ایں دے علاوہ افغانستان دی سرحد توں اندر آوݨ آلے 135 خارجی ماریے ڳئے جݙاں جو 2 سال اچ خود کش حملہ کرݨ آلے 30 حملہ آور اچ افغان شہری ہن، اے اعداد و شمار افغانستان کوں بھارت دے دہشت گردی دے بیس کیمپ دے طور تے ظاہر کریندن۔انہاں آکھیا جو دہشت گرداں اتے جرائم پیشہ عناصر دے گٹھ جوڑ کوں مکمل مقامی اتے سیاسی پشت پناہی حاصل اے۔ ترجمان پاک فوج آکھیا جو 2014 اچ سانحہ اے پی ایس دے بعد ساریاں سیاسی جماعتاں، وفاقی اتے صوبائی حکومتاں پشاور اچ ٻیٹھیاں اتے ہک متفقہ لائحہ عمل تیار کیتا جیں کوں نیشنل ایکشن پلان دا ناں ݙتا ڳیا اتے ساریاں سیاسی جماعتاں اتفاق کیتا جے دہشت گردی کوں منڈھوں پٹݨا اے تاں انہاں نکات تے کَم کرݨا اے۔ انہاں ݙسایا جو 2021 اچ پچھلی صوبائی حکومت جنہاں نکات تے کَم تھی چکیا ہئی انہاں کوں کڈھ تے 14 نکات تے مشتمل نظرثانی شدہ نیشنل ایکشن پلان ترتیب ݙتا اتے سارے سیاسی رہنماواں، ساریاں سیاسی جماعتاں اتے اوں ویلھے دی صوبائی اتے وفاقی حکومتاں فیصلہ کیتا جے دہشتگردی کوں منڈھوں پٹݨا اے تاں انہاں 14 نکات تے کَم کرݨا اے۔انہاں آکھیا جو موجودہ حکومت وی ایں ایکشن پلان کوں وژن عزم استحکام دا ناں ݙتا، انہاں آکھیا جو دہشت گردی دی پہلی وجہ اے ہے جو انہاں نکات تے عمل نی تھیندا پیا۔ انہاں آکھیا جو ایکشن پلان دا پہلا نکتہ اے ہے جو دہشت گرداں کوں مارݨا اے، صرف ایہو ہک نکتہ زمینی کارروائیاں نال تعلق رکھیندے، کیا ایں تے کَم تھیندا پئے یا نی تھیندا پیا، صرف خیبرپختونخوا اچ سیکیورٹی ایجنسیاں روزانہ 40 توں زیادہ انٹیلی جنس بیسڈ آپریشن کریندیاں پئن، ایں سال اساں 900 توں زیادہ دہشت گرداں کوں سزا نی ݙتی؟ کیا اساݙے شہید ایں ڳالھ دی گواہی نی ݙیندے پئے جو پہلے نکتے تے کَم تھیندا پئے۔ انہاں آکھیا جو باقی 13 نکات دا وی احاطہ کر ڳھدا ونڄے جو انہاں تے کیا کَم تھیندا پئے، انہاں آکھیا جو ݙوجھا نکتہ ہئی جو میڈیا، سوشل میڈیا اتے سیاستدان ہک زبان تھی تے دہشت گردی دے خلاف کھڑے تھیسن، سارے سیاسی رہنماواں اتے سیاسی جماعتاں 2014 توں ایں ڳالھ تے متفق ہن، کیا اساں ایں بیانیے تے کھڑوں؟ ترجمان پاک فوج سوال کیتا جو کیا تساں کوں اے آواز نی آندی جو دہشت گرداں نال مذاکرات کر ڳھدے ونڄن، کیا اساں ایں نیشنل ایکشن پلان تے عمل کریندے پیوں؟ کیا ہر مسئلے دا حل ڳالھ مہاڑ اے؟ جے ہر مسئلے دا حل ڳالھ مہاڑ اچ ہے تاں جݙاں 6 اتے 7 مئی کوں بھارت پاکستان تے میزائل مارئے، نشوم نِکّے ٻالاں، عورتاں، مدرسیں اتے مسیتاں کوں شہید کیتا تاں ایں ملک دے عوام اے کیوں نی آکھیا جو اڳلے ݙینھ ڳالھ مہاڑ کر گھندوں؟لیفٹیننٹ جنرل احمد شریف چوہدری آکھیا جو تہاݙے رہنماواں فیصلہ کیتا ہئی جو اساں بیانیہ بݨیسوں پر گمراہ کن بیانیہ بݨایا ویندے۔ انہاں آکھیا جو اساں نی اساݙے سیاستداناں، ساریاں صوبائی حکومتاں آکھیا جے دہشت گردی کوں ختم کرݨا اے، دہشت گردی اتے جرائم دے گٹھ جوڑ کوں تروڑ ݙیوݨا اے ، غیرقانونی کاروباراں، منشیات، بھتہ خوری، اغوا برائے تاوان اتے نان کسٹم پیڈ گاݙیاں دی لعنت توں آپݨے خطے کوں پاک کرݨا اے۔ انہاں آکھیا جو جݙاں قانون نافذ کرݨ آلے ادارے انہاں لعنتاں دے خلاف کارروائی کریندن تاں انہاں عناصر دی پشت پناہی کیتے مختلف سیاسی اتے مقامی سطح توں آوازاں آندن، فیصلہ تاں تساں کیتا ہئی جو ایں کوں ختم کیتے بغیر دہشت گردی ختم نی تھی سڳدی۔ ترجمان پاک فوج آکھیا جو ایں ملک دے سیاستداناں اتے سیاسی حکومتاں فیصلہ کیتا جو دہشت گردی دے مقدمیں کیتے عدالتی نظام کوں مضبوط کرݨا اے پر ہݨ اساں کتھاں کھڑوں جو اگست 2025 اچ خیبرپختونخوا دی انسداد دہشت گردی عدالتاں توں کہیں دہشت گرد کوں سزا نی تھئی، 34 مقدمے زیر التوا ہن، 2878 زیر التوا مقدمے 3 سال توں گھٹ عرصے دے ہن جݙاں جو 1706 مقدمیں کوں 3 سال توں زیادہ عرصہ تھی چکیے۔ دہشت گردی اتے غیرقانونی کاروبار دے ڳٹھ جوڑ دا حوالہ ݙیندے آکھیا جو دہشت گردی دے پیشے غیرقانونی کاروبار دا گٹھ جوڑ اے، منشیات دے 10 ہزار 87 کیسز اچوں صرف 679 مجرماں کوں سزا تھئی جݙاں جو غیرقانونی ہتھیاراں دے 33 ہزار 389 مقدمیں اچ صرف 6 ہزار 945 مجرماں کوں سزا تھئی۔لیفٹیننٹ جنرل احمد شریف چوہدری مزید آکھیا جو 2014 اتے 2021 اچ اے فیصلہ کیتا ڳیا جو صوبے اچ دہشت گردی کوں ختم کرݨا اے تاں محکمہ انسداد دہشت گردی (سی ٹی ڈی) کوں مضبوط کرݨے پر ایں ویلھے سی ٹی ڈی خیبرپختونخوا دی آپریشنل صلاحیت 3200 جواناں تے مشتمل اے، دہشت گردی تہاݙے سامݨے اے، کیا اے تعداد کافی اے؟ انہاں آکھیا جو اساں خیبرپختونخوا دی بہادر پولیس اتے سی ٹی ڈی کوں سلام پیش کریندوں ۔ ترجمان پاک فوج آکھیا جو نیشنل ایکشن پلان اچ مدرسیں دے اندراج دا فیصلہ تھیا ہئی پر ہݨ تئیں صوبے اچ 4 ہزار 355 تقریباً 55 فیصد مدرسیں دا اڄ تئیں اندراج تھی سڳیے، حالی اندراج ہی پورا نی تھی سڳیا تاں نصاب ہک کرݨا اتے ایں دے اُتے نگرانی کرݨا تاں علیحدہ ڳالھ اے۔ انہاں آکھیا جو سوال اے ہے دہشت گردی ختم کیوں نی تھیندی پئی تاں انہاں سوالاں دا جواب وی ݙیوو۔ترجمان پاک فوج آکھیا جو 2014 اتے ول 2021 اچ وی اے فیصلہ کیتا ڳیا جو افغاناں کوں واپس بھیجݨا اے تاں اڄ اے بیانیہ کتھوں آڳئے جو انہاں کوں واپس نی بھیجݨا، انہاں سوال کیتا جو کیا تساں 2014 اتے 2021 اچ غلط ہاوے، اتے جݙاں افغانستان اچ امن آ چُکیے اتے اُتھاں کوئی قابض افواج کائنی تاں کئی ݙہاکیں تئیں افغان بھراواں دی مہمان نوازی کرݨ آلی ریاست انہاں کوں واپس ونڄݨ دا آکھدی اے تاں ایں تے سیاست کیتی ویندی اے، ایں تے بیانیے بݨائے ویندن اتے گمراہ کن ڳالھیں کیتیاں ویندن۔ ترجمان پاک فوج آکھیا جو دوحہ معاہدے اچ آکھیا ڳیا جو افغان سرزمین نہ صرف امریکا بلکہ خطے اچ وی کہیں دے خلاف استعمال نہ ہوسی۔ ترجمان پاک فوج خیبرپختونخوا اچ آپریشنز دے دوران مارئے ڳئے خارجیاں توں برآمد امریکی ہتھیاراں دیاں تصویراں وی ݙکھائیاں۔انہاں آکھیا جو پچھلے 3 مہینے اچ دہشت گردی دے 3 ہزار 984 واقعے تھئن، انہاں اچوں 70 فیصد خیبرپختونخوا اچ کیوں تھیے؟ اے وݙا منطقی سوال اے جو نوجوان اتے سوشل میڈیا وی کریندے، دہشت گردی دے اے واقعے پنجاب اتے سندھ اچ کیوں نظر نی آندے؟ انہاں آکھیا جو سندھ اتے پنجاب اچ دہشت گردی نہ تھیوݨ دی بنیادی وجہ اے نی جو دہشت گرد انہاں صوبیاں اچ کَم نی کرݨ چاہندے اتے آپݨے نظریات دی اُتھاں ترویج نی چاہندے، نہ ایں دی بالکل اے وجہ کائنی۔ انہاں آکھیا جو ایں دی وجہ اے اے جو انہاں صوبیں اچ گورننس قائم اے، اُتھاں دی پولیس اتے قانون نافذ کرݨ آلے ادارے قائم ہن اتے اُتھاں سیاست اتے دہشت گردی دا گٹھ جوڑ کَم نی کریندا پیا، اساݙے ایں عظیم صوبے خیبرپختونخوا اچ بجائے ایں دے جو دہشت گردی کوں کارکردگی، گورننس اتے قانون دی عملداری نال ختم کیتا ونڄے، ایں کوں صوبائیت دا رنگ ݙتا ویندا پئے اتے ایں تے سیاست کیتی ویندی پئی اے۔انہاں سوال کیتا جو کیا اے خود ہک مجرمانہ عمل کائنی جو گورننس، کارکردگی، صلاحیت اتے استعداد کار اتے سی ٹی ڈی دے جواناں دی تعداد کوں ودھاوݨ، عدالتی نظام کوں مضبوط بݨاوݨ اتے غیرقانونی رہݨ آلے افغانیاں کوں واپس افغانستان بھیجݨ دی بجائے ہک کنفیوژن اتے ابہام پیدا کیتا ڳئے۔ انہاں آکھیا جو انہاں وجوہات دی بنیاد تے آرمی چیف واضح طور تے آکھ چُکن، گورننس دے خلا کوں پاک فوج دے افسر، جوان، پولیس دے افسر اتے جوان، نِکے ٻال اتے اساݙے ادارے آپݨے خون نال پُوریندے پئن۔ ترجمان پاک فوج سوال کیتا جے گورننس دے خلا کوں پُر نی کرݨا اتے متفقہ نیشنل ایکشن پلان تے عمل نی کرݨا تاں ول خیبرپختونخوا کوں دہشت گردی دی لعنت توں کیویں چھٹکارا ملسی؟لیفٹیننٹ جنرل احمد شریف چوہدری واضح کیتا جو ریاست پاکستان دے انسداد دہشت گردی آپریشنز دے حوالے نال جیڑھا کوڑا، فرضی اتے من گھڑت بیانیہ بݨایا ویندا پئے اتے شہیداں اتے افواج پاکستان اتے پولیس دی قربانیاں دی جو تضحیک کیتی ویندی اے، اے سیاسی اتے مجرمانہ گٹھ جوڑ دے خراب ارادیں دی عکاسی کریندی اے، خیبرپختونخوا اچ دہشت گردی دے پچھوں ایہا سیاسی و مجرمانہ گٹھ جوڑ اے۔ انہاں آکھیا جو اساں واضح کرݨ چاہندوں جو پاکستانی عوام دی سیکیورٹی کہیں ݙوجھے ملک، خاص طور تے افغانستان کوں رہن نی کیتی ونڄ سڳدی، صرف ریاست، افواج پاکستان اتے ایں دے قانون نافذ کرݨ آلے ادارے ہی پاکستان دے عوام دی سلامتی دے ضامن ہن۔ ترجمان پاک فوج واضح کیتا جو پاکستان دی فوج اتے ایں دے اداریں کوں کہیں سیاسی شعبدہ بازی توں پریشان نی کیتا ونڄ سڳدا، ریاست پاکستان اتے ایں دے عوام کوں کہیں ہک بندے دی خواہش دی بھینٹ نی چڑھایا ونڄ سڳدا۔ انہاں آکھیا جو کہیں ہک بندے کوں اے اجازت نی ݙتی ونڄ سڳدی جو او آپݨی ذات اتے آپݨے مفاد کیتے پاکستان اتے خیبرپختونخوا دے غیرت مند اتے باعزت عوام دی جان، مال اتے عزت آبرو دا سودا کرے، انہاں آکھیا جو افواج پاکستان آئین اتے قانون موجب خیبرپختونخوا اچ اندرلی سلامتی دے فرائض انجام ݙیندی پئی اے، جیں دی بنیادی ذمہ واری صوبائی اتے مقامی انتظامیہ دی اے، اساں امید کریندوں جو بجائے منفی سیاست، الزام تراشی اتے جرائم پیشہ مافیا دی سہولت کاری دے بجائے تساں آپݨی ایں بنیادی ذمہ واری تے توجہ ݙیسو۔ انہاں آکھیا جو اساں اے وی امید کریندوں جو تساں خیبرپختونخوا دے غیرت مند عوام دی حفاظت کیتے افغانستان توں سیکیورٹی دی خریت منڳݨ دی بجائے ایں صوبے دے ذمہ وار ہوندے ہوئیں خود ایں دی حفاظت کریسو جیڑھا نہ صرف خیبرپختونخوا دے عوام دا حق اے بلکہ تہاݙا فرض اے۔ترجمان آکھیا جو افواج پاکستان اے ڳالھ وی واضح کرݨ چاہندی اے جو خارجی دہشت گرد اتے انہاں دے سہولت کار بھاویں او کوئی وی ہووے اتے کہیں وی عہدے تے ہووے، ایں کیتے زمین تنگ کر ݙتی ویسی کیوں جو پاکستانی قوم سیسہ پلائی دیوار ‘بنیان مرصوص’ وانڳوں دہشت گرداں اتے انہاں دے سہولت کاراں دے خلاف کھڑی اے اتے انشاء اللہ کھڑی رہسی، اتے اساݙے شہیداں دا خون کݙاہیں ضائع نہ ویسی۔ لیفٹیننٹ جنرل احمد شریف چوہدری آکھیا جو اساں اے وی واضح کرݨ چاہندوں جو ہݨ اسٹیٹس نہ چلسی، جیڑھا بندہ یا گروہ آپݨی مجبوری یا کہیں فیدے دی وجہ نال خارجیاں دی سہولت کاری کریندا پئے ایں کنے 3 رستے ہن۔ پہلا اے جو او خود انہاں خارجیاں کوں ریاست دے حوالے کر ݙیوے یا ول او دہشت گردی دے خلاف کارروائیاں اچ ریاست دے اداریں دے نال رَل تے ایں لعنت کوں آپݨے انجام تئیں پڄاوے تاں جو نشوم عوام کوں ضیان نہ تھیوے، ترائے رستے بارے ݙسیندے انہاں چتاوݨی ݙتی جے اے ݙوہیں کَم نہیں کرݨے تاں ول خارجیاں دے سہولت کار ہوندے ہوئیں ریاست پاکستان دے بھرپور ایکشن کیتے تیار تھی ونڄو۔ ترجمان پاک فوج صوبے دے شہیداں دیاں تصویراں ݙکھیندے رُووݨی آواز اچ آکھیا جو اے ایں دھرتی دے او بہادر ہن جنہاں تہاݙے کیتے جان ݙتی اے، انہاں دیاں شہادتاں اتے انہاں دیاں قربانیاں تے کہیں کوں سیاست دی اجازت نی ݙتی ونڄ سڳدی، انہاں آکھیا جو پاکستان زندہ باد رہسی اتے خیبرپختونخوا زندہ باد رہسی، ایں حقیقت کوں کوئی تبدیل نی کر سڳدا۔ڈی جی آئی ایس پی آر لیفٹیننٹ جنرل احمد شریف چوہدری افغانستان اچ چھوڑیے ڳئے امریکی ہتھیاراں دے دہشت گرداں دے ذریعے استعمال تھیوݨ دے حوالے نال پُچھے ڳئے سوال دے جواب اچ آکھیا جو ضروری نی جو اے ہتھیار اتے سامان فتنۃ الخوارج اتے فتنۃ الہندوستان ہی استعمال کرن، اے سامان اتے ہتھیار کتھائیں وی استعمال تھی سڳدے۔ انہاں آکھیا جو خود امریکی حکومت وی فکرمند اے اتے امریکی صدر ڈونلڈ ٹرمپ دے بیانات وی رپورٹ تھن جیں اچ انہاں دا آکھݨا اے جو انہاں ہتھیاراں اتے سامان کوں واپس ڳھدا ویسی۔ انہاں آکھیا جو اے فیصلہ کرݨا افغانستان دی حکومت دا کَم اے جو او غیر ریاستی عناصر دی سرپرستی جاری رکھݨ چاہندی اے یا کائناں، اساݙا کَم انہاں کوں آپݨا پیغام پڄا ݙیوݨا اے اتے او اساں زبانی اتے عملی طور تے کریندے پیوں ۔ اساں بالکل واضح ایسے جو اساں انہاں نال کیویں نِمٹݨا اے۔ نیشنل ایکشن پلان دے حوالے نال سوال دے جواب اچ ڈی جی آئی ایس پی آر آکھیا جو اساں سَارے ڄاݨدوں جو چیزاں کیویں تبدیل تھیسن، چیزاں اوں ویلھے تبدیل تھیسن جݙاں اساں اچ یکجہتی ہوسی اتے اساں نیشنل ایکشن پلان تے عمل کریسوں، اساں ٻہوں واری آکھ چُکیوں جو دہشت گرداں نال پوری قوم لڑݨا اے۔ انہاں آکھیا جیڑھے سیاسی شعبدہ بازی کریندن انہاں دا گریبان وٹھو اتے انہاں توں پُچھو جو تساں اساݙی جان، عزت اتے مال نال کیوں کھیݙڈے پئے او اتے دہشت گردی دے بیانیے کوں کیوں سپورٹ کریندے پئے او۔ ڈی جی آئی ایس پی آر ہک سوال دے جواب اچ آکھیا جو دہشتگردی ایویں ختم تھیسی جو اساں دہشتگرد اتے ایں دے سہولت کار کوں ہک برابر ڄاݨوں، جو دہشت گرداں دی سہولت کاری کریندا پئے اتے ایں اسلحہ آپݨے گھر اچ رکھیا ہویا اے تاں ایں اچ اتے دہشتگرد اچ کیا فرق اے۔ہک سوال دے جواب اچ ڈی جی آئی ایس پی آر آکھیا جو سیاسی حکومت کݙاہیں اے آکھدی اے جو ڳالھ مہاڑ نال مسئلہ حل تھی ویسی اتے کݙاہیں آکھدی اے جو کابل دے اڳوں جُھکݨ نال مسئلہ حل تھی ویسی تاں اے انہاں دے بیانیے دا وݙا نِکّا جیہا حصہ اے، جو دہشت گرداں دا سہولت کار ماریا ڳیا اوں سہولت کار دے لواحقین کوں پیسے ݙے تے اوں دا رتبہ ودھاوݨ حکومت کیتے ٻہوں سوکھا اے۔ انہاں آکھیا جو تساں گورننس اتے کرپشن تے ڳالھ کیوں نی کریندے، کیوں جو ہر لمحہ انہاں دے بیانیے دی بنیاد صرف سیکیورٹی مسئلیں تے ہے۔ باقی صوبے دہشتگردی دے خلاف جنگ کیتے این ایف سی دا ہک فیصد ݙیندے پئن، اتھوں نی ݙتا ویندا پیا او کتھاں ویندا پئے، ترقیاتی منصوبیں تے کَم نی تھیندا پیا، عوام کیتے کَم تھیوݨا چاہیدا ہئی، کیوں نی تھیا، اتھاں 40 ارب روپے دی کرپشن ہک پسماندہ ضلع اچ درمیانے درجے دے ٹھیکیدار توں نکل آئی، ایں تے تساں سوال نی چاوݨا تاں جو دہشتگردی دے اُتے بیانیہ ایں کنفیوژن اچ رکھیا ونڄے۔ ڈی جی آئی ایس پی آر مزید آکھیا جو تساں کوں کوئی اے نہ ݙسیسی جو افغانستان دے نال لمبی سرحد تے ݙوجھے پاسے توں اساݙی فوج کوں مصروف کرتے دہشت گرداں اتے اسمگلراں کوں سرحد پار کرایا ویندے، کوڑ اتے کنفیوژن تے مبنی بیانیہ بݨاوݨ ایں اچ مہارت حاصل تھی چُکی اے اتے ایں کیتے سوشل میڈیا کوں وݙی سطح تے استعمال کیتا ویندے۔ انہاں آکھیا جو پاکستان دے عوام کوں دیانتداری نال سچ آکھݨ دی لوڑھ اے اے کیوں جو ایں منفی سیاست دا، ایں گمراہ بیانیے دا خمیازہ ݙھاکیں توں خیبرپختونخوا بھوڳیندا پئے۔ انہاں آکھیا جو چنانچہ اساں ساریں کوں ایں منفی پروپیگنڈے دے خلاف ہک زبان تھی تے کھڑے تھیوݨا ہوسی، اتے کوڑ اتے گندگی نال بھری ہوئی سیاست توں آپݨے آپ کوں پرے کرݨا پوسی، اتے اساں کنے ایں دے علاوہ کوئی چوائس کائنی اتے اساں ایہا کریسوں۔ ڈی جی آئی ایس پی آر لیفٹیننٹ جنرل احمد شریف چوہدری ہک ٻئے سوال دے جواب اچ آکھیا جو اساݙی دہشتگردی دے خلاف جنگ کہیں وی سیاسی رکاوٹ دے بغیر جاری رہسی، اے اساݙی بقا دی جنگ اے۔ ہک سوال تے جواب اچ انہاں آکھیا جو نیشنل ایکشن پلان دے چوݙاں نکات تے جو عمل نی کرݨ چاہندے انہاں دے آپݨے ذاتی، مالی اتے سیاسی فیدے ہن، اساݙے جوان اتے افسر کہیں ذاتی یا مالی فیدے کیتے نی بلکہ پاکستان کیتے گولی کھاندن، جے اساں ہک آزاد، غیرت مند اتے خود دار قوم دی حیثیت نال جیوݨا اے تاں ول چوائس ہک ہی اے اتے او ایہا اے جو اساں دہشت گرداں، انہاں خوارج اتے انہاں دے سہولت کاراں نال لڑݨا اے اتے ایں لعنت کوں ختم کرݨا اے۔ ڈی جی آئی ایس پی آر ہک سوال دے جواب اچ آکھیا جو اساں ریاست دا ادارہ ہیسے اتے اساݙے کیتے ساریاں سیاسی جماعتاں اتے سارے سیاسی رہنما قابل احترام ہن، جے کوئی پارٹی یا کوئی بندہ اے سمجھدے جو ایں دی سیاست ایں ریاست توں وݙی اے تاں اے اساں کوں قبول کائنی۔ انہاں آکھیا جو پاکستان دے آئین موجب ملک اچ جمہوریت اے، اتے اساݙے کیتے اے ٻہوں قابل احترام نظام اے، اتے ایں اچ ہی پاکستان دا مستقبل اے، ایں جمہوری نظام دے اندروں ہی ملک آپݨے آپ کوں چنڳا کرݨا اے اتے اڳوں ودھݨا اے، اساں ہک ریاستی ادارے دے طور تے آکھدوں جو اساں کوں آپݨی سیاست کیتے استعمال نہ کرو، اساں ریاست اتے عوام کیتے جان ݙیندوں اساں کہیں دی سیاست دی جنگ نی لڑدے۔ ڈی جی آئی ایس پی آر لیفٹیننٹ جنرل احمد شریف چوہدری ہک سوال دے جواب اچ آکھیا جو جݙاں تئیں سیاسی اتے مجرمانہ گٹھ جوڑ دے ذریعے دہشتگردی کوں باقی رہݨ کیتے سہارا ݙتا ویندا رہسی، اساݙے جوان شہید تھیندے رہسن، اتے اے سلسلہ اوں ویلھے تئیں چلدا رہسی جݙاں تئیں پاکستان دے عوام انہاں دے گمراہ کُن سیاسی پروپیگنڈے کوں سامݨے رکھ تے انہاں توں سوال نی کریندے، جݙاں تئیں تساں انہاں چوݙاں نکات تے پوری طرح عمل نی کریندے، اے سلسلہ اوں ویلھے تئیں چلسی جݙاں تئیں اساں اے نی جاݨ گھندے جو پاکستان دے تحفظ دے ضامن اساں خود ہیسے۔