ریاست بلیک میل نہ تھیسی ، غزہ دے ناں تے سڑکاں تے نکلݨ آلے لوکاں دے مقاصد مذہبی کائنی، ذاتی اتے سیاسی ہن، وزیر مملکت داخلہ طلال چوہدری

اسلام آباد۔10اکتوبر(اے پی پی)وزیر مملکت داخلہ طلال چوہدری ݙو ٹوک لفظاں اچ آکھیے جو ریاست کہیں جتھے، گروہ یا انتہاپسند دے ہتھوں بلیک میل نہ تھیسی ، قانون ہتھ اچ گھنݨ آلیں دے خلاف اوکھے ہتھاں نال کارروائی کیتی ویسی۔ انہاں خبردار کیتا جو ملک اچ جتھہ بازی، انتشار اتے ریاستی رٹ کوں چیلنج کرݨ دی کوئی گنجائش باقی کائنی رہی۔ اسلام آباد اچ پریس کانفرنس کریندے طلال چوہدری آکھیا جو پرامن احتجاج سَاریں دا حق اے پر قانون شکنی، تصادم اتے سرکاری املاک تے حملے برداشت نہ کیتے ویسن، ماضی گواہ اے جو تحریک لبیک پاکستان (ٹی ایل پی) جتھیں دی صورت اچ قومی املاک تے حملے کیتے اتے شہری زندگی کوں مفلوج کیتا، پر ہݨ ریاست انہاں عناصر دے سامݨے نہ جُھکسی۔انہاں آکھیا جو حکومت اسلام آباد اتے راولپنڈی دے اندر آوݨ آلے رستیں تے سکیورٹی سخت کر ݙتی اے، عوام دے جان و مال دے تحفظ کیتے رکاوٹاں لاتیاں ڳئن جݙاں جو صوبائی حکومتاں دے نال مسلسل رابطہ رکھیا ویندا پئے، کجھ شرپسند عناصر کوں گرفتار کیتا ڳئے جنہاں دے خلاف پکے ثبوت اتے ویڈیوز موجود ہن۔ وزیر مملکت آکھیا جو مظاہرین کنے ݙنڈے، کیمیکل، کِل اتے فورسز دے ماسک جیڑھا سامان ملئے جیڑھا تصادم دے ارادیں دی نشاندہی کریندے۔ انہاں آکھیا جو سیف سٹی دے کیمرے بھنیے ڳئن، پولیس اہلکاراں کوں زخمی کیتا ڳیا اتے مسیت دے تقدس دا وی خیال نی رکھیا ڳیا، انہاں آکھیا جو وفاقی حکومت حالات کوں مانیٹر کریندی پئی اے تاں جو عام شہریاں کوں نقصان نہ پڄے، پر جتھاں قانون شکنی ہوسی اُتھاں کوئی رعایت نہ ورتی ویسی۔ طلال چوہدری آکھیا جو حکومت طاقت دے گھٹ توں گھٹ استعمال دی پالیسی اپنائی اے پر ریاست دی رٹ تے کوئی سمجھوتہ نہ کیتا ویسی۔انہاں آکھیا جو غزہ امن معاہدے دے بعد فلسطینی عوام سجدہ شکر ادا کیتا، پاکستان ہر عالمی فورم تے انہاں دی آواز بݨ تے کردار ادا کیتا، ایں سانگے ہݨ غزہ دے ناں تے سڑکاں تے نکلݨ آلے لوکاں دے مقاصد مذہبی نی بلکہ ذاتی اتے سیاسی ہن۔ وزیر مملکت آکھیا جو مذہب یا انتہاپسندی دے ناں تے تشدد اتے ذاتی ایجنڈے دی سیاست ناقابل قبول اے، انہاں دے ذمہ واراں کوں قانون موجب کچاری اچ اچ گھن آیا ویسی۔ انہاں آکھیا جو ماضی اچ ٹی ایل پی دے مظاہریں نال پولیس اہلکار شہید تھیے اتے املاک کوں ضیان پُڄیا، ہݨ او سارے مقدمے آپݨے منطقی انجام تئیں پجسن۔ طلال چوہدری ݙو ٹوک موقف اپنیندے آکھیا جو ریاست کمزور کائنی۔