کامن ویلتھ دیاں مشترکہ اقدارعالمی سطح دے چیلنجز نال نِمٹݨ کیتے اساݙی سَاریں توں وݙی طاقت ہن، چیئرمین سینیٹ

بارباڈوس ۔10اکتوبر(اے پی پی)چیئرمین سینیٹ سید یوسف رضا گیلانی آکھیے جو کامن ویلتھ دیاں مشترکہ اقدار عالمی سطح دے چیلنجز نال نِمٹݨ کیتے اساݙی سَاریں توں وݙی طاقت ہن، پارلیمنٹرینز کمزور طبقیں دی آواز اتے احتسابی عمل دے محافظ ہن، پاکستان اچ اقلیتاں دی فلاح و بہبود کیتے چنڳے اقدامات چاتے ڳئن۔ انہاں اے ڳالھ اتھاں 68 ویں کامن ویلتھ پارلیمنٹری کانفرنس دے ہک اہم سیشن دی صدارت کریندے آکھی جیں دا عنوان “چنڳی طرز حکمرانی، کثیرالجہتی اتے بین الاقوامی تعلقات اچ دولت مشترکہ دا کردار” ہئی۔ چیئرمین سینیٹ آکھیا جو اڄ دی جُڑی ہوئی دنیا اچ اساݙا اجتماعی عزم ہی اے طے کریندے جو اساں جمہوری زوال، ماحولیاتی تبدیلی، مصنوعی ذہانت دا ودھدا ہویا اثر یا جمہوری اداریں دے تحفظ جیھے چیلنجز دا سامݨا کیویں کریندوں ۔ اجلاس دا آغاز مختلف مقررین دیاں تقریراں اتے پریزنٹیشناں نال تھیا جیں دے بعد سوال و جواب تے مبنی ہک جامع اتے تعمیری سیشن منعقد تھیا۔چیئرمین سینیٹ سید یوسف رضا گیلانی سارے مقررین اتے شرکاء دا انہاں دی بامعنی اتے مثبت شرکت تے شکریہ ادا کیتا۔ سینیٹ سیکرٹریٹ توں جاری بیان موجب انہاں اجلاس دے ترائے اہم نکات تے روشنی پاتی اتے آکھیا جو ٻاہرلی سطح تے مضبوطی کیتے اندرلی سطح تے چنڳی طرز حکمرانی ضروری اے۔ انہاں آکھیا جو کامن ویلتھ دیاں مشترکہ اقدار جو “کامن ویلتھ چارٹر” اتے “لیٹیمر ہاؤس پرنسپلز” اچ بیان کیتیاں ڳئن ، عالمی سطح دے چیلنجز نال نِمٹݨ کیتے اساݙی سَاریں توں وݙی طاقت ہن۔ سید یوسف رضا گیلانی مزید آکھیا جو پارلیمنٹرینز کمزور طبقیں دی آواز اتے احتسابی عمل دے محافظ ہن۔ انہاں سارے شرکاء تے زور ݙتا جو او انہاں مباحثیں کوں دولت مشترکہ پارلیمانی ایسوسی ایشن (سی پی اے) دے مختلف نیٹ ورکس دے ذریعے اڳوں ودھاون جنہاں اچ “کامن ویلتھ ویمن پارلیمنٹرینز نیٹ ورک”، “سمال برانچز نیٹ ورک” اتے نویں اقدامات جیڑھے جو “کامن ویلتھ اے آئی کنسورشیم” شامل ہن جو آپت اچ تعاون اتے تجربیں دے تبادلے کیتے ٻہوں اہم پلیٹ فارمز مہیا کریندن۔اجلاس اچ شریک ہک رُکن دے اقلیتاں نال متعلق سوال دا جواب ݙیندے انہاں ݙسایا جو پاکستان اچ اقلیتاں دی فلاح و بہبود کیتے چنڳے اقدامات چاتے ڳئے۔ چیئرمین سینیٹ آپݨے وزارت عظمیٰ دے دور دا وی ذکر کیتا اتے آکھیا جو انہاں اقلیتاں کیتے انڄ وزارت قائم کیتی اتے بین المذاہب ہم آہنگی کوں ودھارا ݙیوݨ کیتے اقدامات چاتے۔ چیئرمین سینیٹ ایں تاثر کوں بالکل مسترد کر ݙتا جو انہاں بھارتی پارلیمانی وفد نال ہتھ مِلاوݨ توں گریز کیتا۔ چیئرمین سینیٹ آکھیا جو میں بھارتی وفد نال مصافحہ کیتا ہئی۔ سید یوسف رضا گیلانی دے ایں ݙو ٹوک جواب تے ہال تاڑیاں نال گونج اُٹھیا، حاضرین انہاں دی کھلے دل اتے بہترین سفارتی انداز دی بھرپور تعریف کیتی۔