وزیراعظم شہباز شریف مصر اتے امریکی صدور دی دعوت تے 13 اکتوبر کوں مصر دا دورہ کریسن

اسلام آباد۔12اکتوبر (اے پی پی) وزیراعظم محمد شہباز شریف مصر دے صدر عبد الفتاح السیسی اتے امریکہ دے صدر ڈونلڈ ٹرمپ دی دعوت تے 13 اکتوبر کوں مصر دا دورہ کریسن جتھاں او شرم الشیخ امن سربراہی اجلاس اچ شرکت کریسن اتے غزہ اچ جاری سنگین صورتحال دے خاتمے کیتے تھیوݨ آلے امن معاہدے تے دستخط دی تقریب اچ شامل ہوسن، نائب وزیرِ اعظم و وزیرِ خارجہ سینیٹر محمد اسحاق ڈار اتے ݙوجھے سینئر وزراء وی وزیراعظم دے نال ہوسن۔ اتوار کوں دفتر خارجہ توں جاری بیان دے مطابق شرم الشیخ امن سربراہی اجلاس انہاں سفارتی کوششاں دا نتیجہ ہے جو گزریl مہینے اقوامِ متحدہ دی جنرل اسمبلی دے 80ویں اجلاس دے موقع تے نیویارک اچ کیتی ڳئن۔ 23 ستمبر کوں امریکہ دی زیر صدارت د تھیوݨ آلے اجلاس اچ پاکستان دے وزیرِ اعظم عرب ty اسلامی ملکاں مصر، اردن، قطر، سعودی عرب، متحدہ عرب امارات، انڈونیشیا اتے ترکیہ دے رہنماواں دے نال شرکت کیتی ہئی، جیں اچ غزہ اچ امن قائم تھیوݨ دے امکانات تے ڳالھ مہاڑ کیتی ڳئی ۔ انہاں ملکاں بعد اچ ہک مشترکہ اعلامیے اچ صدر ٹرمپ دیاں امن دیاں کوششاں کوں سراہیا اتے امریکہ دے نال رَل تے ہک جامع اتے پائیدار جنگ بندی دے حصول اتے غزہ اچ انسانی بحران دے خاتمے کیتے تعاون جاری رکھݨ دے عزم کوں ول دُہرایا۔ وزیرِ اعظم محمد شہباز شریف دی سربراہی اجلاس اچ شرکت پاکستان دی فلسطینی عوام دے حقِ خودارادیت اتے انہاں دے جائز موقف دی تاریخی اتے مستقل حمایت دی نشانی ہے۔ پاکستان کوں امید اے جو شرم الشیخ اجلاس مکمل اسرائیلی انخلا، فلسطینی شہریاں دے تحفظ، انہاں دی بے دخلی دے خاتمے، قیدیاں دی رہائی، انسانی بحران دے ازالے اتے غزہ دی تعمیرِ نو کیتے عملی پیش رفت دا سبب بݨسی۔ پاکستان اے توقع وی ظاہر کیتی جو اے کوششاں ہک مؤثر سیاسی عمل کوں اڳوں ودھاوݨ اچ مددگار ثابت ہوسن جئیں دا مقصد 1967ء توں پہلے دی حداں دے مطابق اتے اقوامِ متحدہ دیاں قرارداداں اتے عرب امن اقدام دی روشنی اچ، القدس الشریف کوں دارالحکومت بݨا تے ہک آزاد اتے عمل کرݨ دے قابل فلسطینی ریاست دے قیام کوں ممکن بݨاوݨ اے۔