وزیرِاعظم محمد شہباز شریف امریکی صدر ڈونلڈ ٹرمپ اتے مصری صدر عبدالفتاح السیسی دی خصوصی دعوت تے غزہ امن معاہدے تے دستخط دی تقریب اچ شرکت کیتے شرم الشیخ روانہ تھی ڳئے

لاہور۔13اکتوبر (اے پی پی) وزیرِاعظم محمد شہباز شریف امریکی صدر ڈونلڈ ٹرمپ اتے مصری صدر عبدالفتاح السیسی دی خصوصی دعوت تے غزہ امن معاہدے تے دستخط دی تقریب اچ شرکت کیتے شرم الشیخ روانہ تھی ڳئے جتھ او غزہ اچ جنگ بندی کیتے شرم الشیخ امن سربراہی اجلاس اچ شرکت کریسن۔ نائب وزیرِاعظم تے وزیرِ خارجہ محمد اسحاق ڈار اتے وزیرِ اطلاعات تے نشریات عطاء اللہ تارڑ وزیرِ اعظم دے نال وفد اچ شامل ہن۔ سنوار کوں وزیرِ اعظم آفس دے میڈیا ونگ ولوں جاری بیان موجب وزیر اعظم امریکی صدر ڈونلڈ ٹرمپ، مصری صدر عبدالفتاح السیسی، امیر قطر شیخ تمیم بن حمد الثانی، ترکیہ دے صدر رجب طیب ایردوان اتے ݙوجھے عالمی رہنماواں دی موجودگی اچ غزہ امن معاہدے تے دستخط دی تقریب اچ خصوصی شرکت کریسن۔ شرم الشیخ اچ تھیوݨ آلا امن سربراہی اجلاس، صدر ڈونلڈ ٹرمپ، وزیرِ اعظم شہباز شریف اتے عرب اسلامی رہنماواں دی اقوام متحدہ جنرل اسمبلی دے موقع تے غزہ اچ جنگ بندی کیتے خصوصی کوششاں دا نتیجہ اے۔ مشترکہ اعلامیے دے ذریعے وزیرِ اعظم سودھے انہاں ملکاں دے سربراہان امریکی صدر ڈونلڈ ٹرمپ دے غزہ اچ جنگ بندی، پائیدار امن اتے خطے دی ترقی دے حوالے نال منصوبے دا خیرمقدم کیتا ہا۔ وزیرِ اعظم دی شرم الشیخ امن سربراہی اجلاس اچ شرکت پاکستان دے فلسطینیاں دے حق کیتے آواز چاوݨ اتے انہاں کوں ہر طرح دی سیاسی تے سفارتی مدد دی فراہمی دی عکاسی کریندی اے۔ پاکستان اے توقع کریندے جو ایں امن سربراہی اجلاس اتے ایں اچ دستخط شدہ معاہدے دے بعد غزہ اچ جاری ظلم دا سلسلہ رُک ویسی، غزہ توں اسرائیلی افواج دا انخلاء تھیسی، فلسطینیاں دی آپݨے گھراں کوں واپسی ہوسی، انہاں دی حفاظت یقینی بݨائی ویسی، قیدیاں دی رہائی ہوسی اتے امن دے نال نال غزہ دی تعمیر نو ممکن تھی سڳسی۔ بیان دے مطابق پاکستان پر امید اے جو ایہو سویں اقدامات نال نہ صرف مشرق وسطیٰ اچ لمبا پائیدار امن دا پراݨا خواب پورا تھیسی بلکہ اقوام متحدہ دی قرارداداں دے مطابق اتے فلسطینیاں دی امنگاں دی ترجمانی کریندی ہوئی ہک آزاد تے خود مختار فلسطینی ریاست دا قیام عمل اچ آسی جئیں دی حداں 1967 توں پہلے دے مطابق ہوسن اتے القدس الشریف ایں دا دارلخلافہ ہوسی۔