قومی اسمبلی دی قائمہ کمیٹی برائے اطلاعات و نشریات دا اجلاس، پی ٹی وی دی آمدݨ دے اضافی ذریعے لبھݨ، ملازماں دے خلاف زیرالتواء انکوائریاں تکھے نبیڑݨ دی ہدایت

اسلام آباد۔14اکتوبر(اے پی پی(قومی اسمبلی دی قائمہ کمیٹی برائے اطلاعات و نشریات قومی نشریاتی ادارے (پی ٹی وی) دے انتظامی اتے پیشہ ورانہ خرچے پورے کرݨ کیتے آمدݨ دے اضافی ذریعے لبھݨ تے زور ݙتے، وفاقی سیکرٹری اطلاعات و نشریات عنبرین جان ایں ضمن اچ چاتے ڳئے اقدامات بارے اجلاس کوں تفصیل نال ݙسایا۔ قومی اسمبلی دی قائمہ کمیٹی وزارت تے زور ݙتا جو او آپݨے ملازماں دے باقی مالی واجبات دی ادائیگی کیتے حکومت توں گرانٹ حاصل کرݨ دیاں کوششاں تکھیاں کرے۔ قائمہ کمیٹی دا اجلاس کمیٹی دے چیئرمین رکن قومی اسمبلی پلین بلوچ دی صدارت اچ منگل کوں اسلام آباد اچ پی ٹی وی ہیڈ کوارٹرز اچ تھیا۔ قائمہ کمیٹی کوں ݙسایا ڳیا جو موجودہ انتظامیہ کارپوریشن کوں خود کفیل بݨاوݨ کیتے انتظامی اتے مالی اصلاحات کوں مسلسل اڳوں ودھائے۔ وفاقی سیکرٹری اطلاعات و نشریات عنبرین جان قائمہ کمیٹی کوں ݙسایا جو کئی تجویزاں تے کَم کر ڳھدا ڳئے جیں اچ پی ٹی وی نیٹ ورک دی ڈیجیٹلائزیشن، اینکر پرسنز دی بھرتی اتے متحرک مارکیٹنگ سٹریٹجی جیھے اقدامات شامل ہن۔ انہاں آکھیا جو حکومت موجودہ مالی سال دے دوران خرچے پورے کرݨ کیتے 11 ارب روپے ݙتن تاں جو باقی واجبات کوں پورا کرݨ کیتے گرانٹ گھنݨ دیاں کوششاں جاری ہن۔ انہاں مزید ݙسایا جو پی ٹی وی سکرین دے حوالے نال بہتری گھن آئی ڳئی اے جیں دے نتیجے اچ پی ٹی وی دی ویورشپ اچ ودھارا تھئے۔ انہاں ہݨے ہی پاکستان ٹی وی دی ٹرانسفارمیشن بارے اچ وی کمیٹی کوں ݙسایا تاں جو پی ٹی وی دنیا اچ آپݨیاں نشریات دے ذریعے ناظرین دیاں خبراں دیاں ضرورتاں پوریاں کرݨ دے نال نال پاکستان مخالف منفی پروپیگنڈے دا مقابلہ کر سڳے۔قائمہ کمیٹی نامہ نگاراں اتے میڈیا پروفیشنلز دے تحفظ (ترمیمی) ٻل 2025 تے بحث محرک دی غیر موجودگی پاروں ملتوی کر ݙتی اتے ایں کوں آوݨ آلے اجلاس اچ زیر بحث گھن آوݨ دا فیصلہ کیتا۔ قائمہ کمیٹی وزارت کوں پیمرا دے چیئرمین دی تعیناتی دا عمل تکھے نبیڑݨ دی وی ہدایت کیتی۔ کمیٹی کوں ݙسایا ڳیا جو اے عمل پہلے ہی شروع کر ݙتا ڳئے اتے حتمی منظوری کیتے ناں پارلیمانی کمیٹی کوں بھیجے ویسن تاں جو شارٹ لسٹ کیتے ڳئے امیدواراں اچوں چیئرمین دا انتخاب کیتا ونڄ سڳے۔ کمیٹی پی ٹی وی ملازماں دے خلاف زیر التواء انکوائریز کوں وقتی مکمل کرݨ دی ہدایت کیتی۔ قائمہ کمیٹی کراچی اچ پاکستان براڈکاسٹنگ کارپوریشن دے پی ایس ڈی پی منصوبیں دے اجرا اچ تاخیر تے غور کریندے رکن قومی اسمبلی سید امین الحق دی سربراہی اچ ہک ذیلی کمیٹی تشکیل ݙے ݙتی تاں جو او انہاں منصوبیں دا جائزہ گھنے، انہاں نال جُڑئے مسئلیں دا تعین کرے اتے آپݨیاں سفارشاں مرکزی کمیٹی کوں پیش کرے۔ ذیلی کمیٹی کوں پی بی سی دی ملکیت کوں آمدݨ پیدا کرݨ کیتے استعمال کرݨ بارے تجویزاں ݙیوݨ دی وی ہدایت کیتی ڳئی۔ قائمہ کمیٹی دے اجلاس اچ پارلیمانی سیکرٹری اطلاعات و نشریات بیرسٹر دانیال چوہدری، اراکین قومی اسمبلی صلاح الدین جونیجو، رانا انصار، سحر کامران، شاہین، کرن حیدر، رومینہ خورشید عالم، آسیہ ناز تنولی، کرن عمران ڈار، وفاقی سیکرٹری اطلاعات و نشریات اتے متعلقہ محکمیں دے ݙوجھے سینئر افسراں شرکت کیتی۔