دنیا بھارت کوں سرحد پار دہشت گردی دا حقیقی چہرہ اتے علاقائی عدم استحکام دا مرکز تسلیم کریندی اے، کہیں وی جارحیت دا جواب تیکھا، فیصلہ کن اتے سخت انداز اچ ݙتا ویسی، آئی ایس پی آر

راولپنڈی۔15اکتوبر (اے پی پی) پاک فوج دے شعبہ تعلقات عامہ (آئی ایس پی آر) آکھیا جو دنیا بھارت کوں سرحد پار دہشت گردی دا حقیقی چہرہ اتے علاقائی عدم استحکام دا مرکز تسلیم کریندی اے، کہیں وی جارحیت دا جواب تیکھا، فیصلہ کن اتے سخت انداز اچ ݙتا ویسی۔ بُدھ کوں جاری بیان اچ آکھیا ڳیا جو معرکہ حق دے 5 مہینے گزر ونڄݨ دے باوجود بھارتی ریاستاں بہار اتے مغربی بنگال اچ اسمبلی انتخابی مہم دے تناظر اچ بھارتی فوجی قیادت اوہا روایتی، مَن گھڑت اتے اشتعال انگیز پروپیگنڈیاں کوں دُہریندی پئی اے، جنہاں کوں او ہر ریاستی انتخاب توں پہلے آکھݨ شروع کر ݙیندی اے۔ آئی ایس پی آر دے مطابق ہک ایٹمی قوت دی فوجی قیادت دا سیاسی دباؤ اچ آ تے غیر ذمہ دارانہ بیان جاری کرݨ بہوں افسوس ناک اے۔ انہاں کوڑے بیاناں بھارتی عوام اتے بین الاقوامی برادری دے سامݨے بھارتی عسکری مشین کوں مذاق دا نشانہ بݨا ݙتے۔ بیان اچ آکھیا ڳئے جو ہر پروفیشنل سپاہی اے جاݨدے جو غیر ضروری گھمنڈ اتے شہرت کیتے غیر مناسب بیان جنگی صورتحال پیدا کر سڳدن، جو جنوبی ایشیا دے امن تے استحکام کیتے سنگین نتیجے پیدا کر سڳدن۔ بھارتی فوجی پریس ریلیز اچ موجود تضادات اتنے واضح ہن جو انہاں دا جواب ݙیوݨ چنڳا نئی۔ بھارتی قیادت تاریخ کوں آپݨی مَن پسند شکل ݙیوݨ دی کوشش کریندی پئی اے اتے بے بنیاد فلمی منظر ترتیب ݙیندی پئی اے۔ ایں توں اے ظاہر تھیندے جو بھارتی فوجی اتے سیاسی قیادت اے قبول کرݨ توں قاصر ݙسدی پئی اے جو معرکہ حق اچ اوںکوں فیصلہ کن شکست تھئی اتے اوںدی غلط بیانی بے نقاب تھئی اے۔ دنیا بھارت کوں سرحد پار دہشت گردی دا حقیقی چہرہ اتے علاقائی عدم استحکام دا مرکز تسلیم کرݨ شروع کر ݙتے، جو مہم جوئی اتے غلبہ پسند پالیسیاں تے عمل کریندا پئے اتے جئیں دا نقصان ایں دے آپݨے عوام اتے ہمسایہ ملکاں ݙوہیں کوں تھیندا پئے۔ آئی ایس پی آر دے مطابق پاکستانی قوم اتے ایں دی مسلح افواج ملکی سالمیت دے دفاع کیتے پوری طرح اہل اتے پُرعزم ہن، کہیں وی جارحیت دا جواب تیکھا، فیصلہ کن اتے سخت انداز اچ ݙتا ویسی، جو آوݨ آلی نسلاں تئیں یادگار رہسی۔