وزیراعظم شہباز شریف دا پاکستان اتے آئی ایم ایف وچال ہک ارب 20 کروڑ ڈالر کیتے سٹاف لیول معاہدے تے اطمینان

اسلام آباد۔15اکتوبر (اے پی پی) وزیراعظم محمد شہباز شریف پاکستان اتے عالمی مالیاتی فنڈ (آئی ایم ایف) وچال  ایکسٹینڈڈ فنڈ فیسیلٹی اتے ریزیلیئنس اینڈ سسٹین ایبلٹی دے حوالے نال ہک ارب 20 کروڑ ڈالر فنڈ کیتے سٹاف لیول معاہدہ طے تھیوݨ تے اطمینان دا اظہار کریندیں ہوئیں آکھیا جو سٹاف لیول معاہدہ پاکستان دے میکرو اکنامک اشاریاں اچ تھیوݨ آلی بہتری کوں نشابر کریندے۔ بُدھ کوں پی ایم آفس دے میڈیا ونگ توں جاری بیان دے مطابق وزیراعظم محمد شہباز شریف آکھیا جو سٹاف لیول معاہدہ عالمی مالیاتی فنڈ دا پاکستان دی تیزی نال بہتر تھیندی معاشی صورتحال تے اعتماد دا اظہار اے، اے آئی ایم ایف دا پاکستان دی معاشی ترقی دی شرح، ادارہ جاتی اصلاحات تے اطمینان اتے حکومتی پالیسیاں تے اعتماد دا مظہر اے۔ وزیر اعظم آکھیا جو وفاقی وزیر خزانہ، وزیر مملکت برائے خزانہ، وفاقی سیکرٹری خزانہ اتے انہاں دی ساری ٹیم تحسین دی مستحق اے جنہاں دی محنت پاروں آئی ایم ایف دے نال اے معاہدہ طے کیتے۔ وزیر اعظم آکھیا جو پاکستان دی معیشت درست رُخ اچ ویندی پئی اے، ملک دی ترقی تے خوشحالی کیتے سارے اقدامات کریسوں۔