دیہاتی تریمتاں محنت، محبت، احساس ذمہ واری اتے قربانی دی جیندی جاڳدی مثال ہن، مریم نواز

لاہور۔15اکتوبر(اے پی پی)وزیراعلیٰ پنجاب مریم نواز آکھیے جو دیہاتی تریمتاں محنت، محبت، احساس ذمہ واری اتے قربانی دی جیندی جاڳدی مثال ہن، دیہاتی تریمت پنجاب دی ترقی اچ آپݨا کردار ادا کریندی پئی اے۔ دیہاتی تریمتاں دے عالمی ݙینھ تے جاری آپݨے ہک پیغام اچ انہاں آکھیا جو دیہاتی تریمتاں دے حقوق دا ݙینھ مناوݨ دا مقصد انہاں دی محنت اتے کوششاں دا اعتراف کرݨا اے، دیہاتی تریمتاں دی عظمت، قربانی اتے انتھک محنت کوں خراجِ تحسین پیش کریندوں ۔ وزیراعلیٰ آکھیا جو دیہاتی تریمتاں محنت، محبت، احساس ذمہ واری اتے قربانی دی جیندی جاڳدی مثال ہن، انہاں دی محنت نال پنجاب دی زمین لہلہاندی اے، گھر آباد تھیندن اتے معیشت مستحکم تھیندی اے ۔ انہاں آکھیا جو دیہاتی تریمت محض ہک محنت کش نی بلکہ پنجاب دی ترقی اچ آپݨا کردار ادا کریندی پئی اے، دیہاتی تریمت سودھے ہر عورت دا تحفظ میݙی ریڈ لائن اے، چاہندی ہاں جو دیہاتی تریمتاں صرف فارمر نہ رہن بلکہ خود فیصلہ ساز اتے معاشی قوت بݨن۔ مریم نواز آکھیا جو ہک مضبوط، خودکفیل اتے خوشحال پنجاب دی تعمیر دیہاتی تریمتاں دے کردار دے بغیر ممکن کائںی، حکومت پنجاب دیہاتی تریمتاں کیتے نویں موقع، سوکھیاں سہولتاں اتے ہنر مندی دے پروگرام لانچ کیتن، دیہاتی تریمتاں کسان کارڈ، لائیوسٹاک کارڈ، ہمت کارڈ توں فیدہ گھندیاں پئن ۔ انہاں آکھیا جو دیہاتی تریمتاں کیتے پنجاب دے سارے بنیادی مراکز صحت کوں اپ گریڈ کیتا ویندا پئے، کاروبار کیتے بلاسود قرضے، لیپ ٹاپ اتے تعلیمی سکالرشپ نال دیہاتی دھیریں دیاں زندگیاں اچ حقیقی تبدیلی آندی پئی اے، دیہاتی تریمتاں کوں ترقی دے دور اچ شریک کرݨ کیتے سکل ڈویلپمنٹ پروگرام دا آغاز کریندے پیوں ، دیہاتی تریمتاں دے خود روزگار کیتے انہاں کوں مال ڈھور ݙتے ویندے پئن۔ وزیراعلیٰ مریم نواز مزید آکھیا جو ورچوئل پولیس اسٹیشن ہر طبقے دی تریمتاں دے حقوق دا تحفظ یقینی بݨاوݨ کیتے بݨایا ڳئے۔