چیئرمین سینیٹ سید یوسف رضا گیلانی دا عالمی یوم خوراک دے موقع تے سنیھا، بُکھ دے خاتمے اتے غذائی تحفظ کیتے اجتماعی کوششاں تے زور

اسلام آباد۔16اکتوبر (اے پی پی) چیئرمین سینیٹ سید یوسف رضا گیلانی بُکھ دے خاتمے، غذائی تحفظ دے فروغ اتے پائیدار زرعی طریقیاں کوں اپناوݨ کیتے قومی تے عالمی سطح تے سانجھی کوششاں دی لوڑھ تے زور ݙیندیں ہوئیں آکھیا جو مناسب اتے غذائیت نال بھرپور خوراک تئیں پُہنچ ہر انسان دا بنیادی حق اے۔ خمیس کوں سینیٹ سیکرٹریٹ توں جاری بیان موجب عالمی یوم خوراک دے موقع تے آپݨے سنیھے اچ انہاں ایں عزم دا اعادہ کیتا جو پاکستان اقوامِ متحدہ دے پائیدار ترقی دے اہداف اچوں “بُکھ دا خاتمہ” دے مقصد دے حصول کیتے پرعزم اے۔ سید یوسف رضا گیلانی آکھیا جو حکومت، نجی شعبے، سول سوسائٹی اتے بین الاقوامی سانجھے داراں وچال تعاون کوں ٻیا مضبوط بݨاوݨ لازم اے تاںجو موسمیاتی تبدیلی، آبادی اچ ودھارے اتے خوراک دی ودھدی ہوئی قیمتاں سویں چیلنجز نال مؤثر انداز اچ نبڑیا ونڄ سڳے۔ انہاں پالیسی سازاں اتے متعلقہ فریقاں تے زور ݙتا جو دیہی ترقی، زرعی جدت اتے منصفانہ نظامِ تقسیمِ خوراک اچ سرمایہ کاری کوں ترجیح ݙتی ونڄے۔ چیئرمین سینیٹ ٻیا آکھیا جو ہر شہری کوں محفوظ اتے غذائیت نال بھرپور خوراک دی فراہمی ہک صحت مند، خوشحال اتے ترقی یافتہ پاکستان دی بنیاد اے۔ انہاں آکھیا جو آؤ اساں سارے عہد کروں جو ہک ایہو سویں دنیا دے قیام کیتے کَم کروں جِتھ کوئی انسان بھُکّا نہ سُمے اتے ہر شخص عزت تے وقار دے نال زندگی گزارے۔