حکومت ہر بندے کیتے انصاف کوں وقتی ، مساوی تے قابل رسائی بݨاوݨ سانڳے پرعزم اے، اعظم نذیر تارڑ

اسلام آباد۔16اکتوبر(اے پی پی)وفاقی وزیرقانون و انصاف و انسانی حقوق آکھیے جو حکومت ہر بندے کیتے انصاف کوں وقتی ، مساوی تے قابل رسائی بݨاوݨ سانڳے پرعزم اے۔ بین المذاہب ہم آہنگی، رواداری اتے اقلیتاں دے حقوق دا تحفظ پاکستان دے آئین دا بنیادی تقاضا اتے ریاست دی ذمہ واری اے، پاکستان دے آئین اچ مذہبی آزادی، قانون دے سامݨے برابری اتے امتیاز توں تحفظ دی واضح ضمانت ݙتی ڳئی اے، ریاست دی پہلی ذمہ واری اے جو ہر شہری دے بنیادی حقوق دا تحفظ یقینی بݨاوے اتے انصاف تئیں برابر پُہنچ ݙیوے۔ اے ڳالھ انہاں فیڈرل جوڈیشل اکیڈمی اتے لاء اینڈ جسٹس کمیشن آف پاکستان دے زیر اہتمام سپریم کورٹ اچ منعقدہ قومی سمپوزیم “بین المذاہب ہم آہنگی اتے بنیادی انسانی حقوق ـ آئین دی ضروری لوڑھ” نال خطاب کریندے آکھی۔ وفاقی وزیر آپݨے خطاب اچ آکھیا جو حکومت اڄوکے سالاں اچ بین المذاہب ہم آہنگی پالیسی، نیشنل ایکشن پلان، اقلیتی تحفظ سیلز اتے انسانی حقوق توں آگاہی پروگراماں جیھے اقدامات دے ذریعے برداشت، شمولیت اتے بین المذاہب احترام کوں ودھارا ݙیوݨ کیتے کئی اقدامات کیتن۔ وفاقی وزیر زور ݙتا جو توہینِ مذہب متعلق مقدمیں اچ شفاف تفتیش، عدالتی حساسیت، اتے قانونی عمل دی پاسداری کوں یقینی بݨایا ونڄے۔ نال ہی انہاں تعلیمی اصلاحات دی لوڑھ تے وی زور ݙتا جو نویں نسل اچ برداشت، ذمہ واری اتے آپت دے احترام کوں ودھارا ݙیون۔ انہاں آکھیا جو معاشرے اچ ہم آہنگی دے ودھارے کیتے عدلیہ، علماء کرام، میڈیا اتے سول سوسائٹی کوں سانجھے طور تے آپݨا کردار ادا کرݨا ہوسی تاں جو رواداری، ہمدردی اتے سانجھے احترام تے مبنی قومی بیانیہ تشکیل ݙتا ونڄ سڳے۔ وفاقی وزیر قومی اعلامیہ بین المذاہب ہم آہنگی اتے انصاف تئیں رسائی دے اجرا دا خیرمقدم کیتا اتے ایں عزم دا اظہار کیتا جو وفاقی حکومت کہیں وی شہری کوں مذہب، عقیدے یا شناخت دی بنیاد تے محرومی دا شکار نہ تھیوݨ ݙیسی اتے ہر شخص کیتے انصاف کوں وقتی مساوی تے قابل رسائی آلا بݨاوݨ سانڳے پرعزم اے۔