وفاقی وزیرِ داخلہ محسن نقوی نال علامہ شاہ اویس نورانی دی ملاقات، مذہبی ہم آہنگی، رواداری، بھائی چارے اتے قومی اتحاد دے فروغ تے ڳالھ مہاڑ

اسلام آباد۔17اکتوبر (اے پی پی) وفاقی وزیرِ داخلہ محسن نقوی نال جمعیت علمائے پاکستان دے سیکرٹری جنرل علامہ شاہ اویس نورانی اسلام آباد اچ ملاقات کیتی، جئیں اچ مذہبی ہم آہنگی، رواداری، بھائی چارے اتے قومی اتحاد دے فروغ تے تفصیلی ڳالھ مہاڑ کیتی ڳئی۔ ملاقات اچ ایں ڳالھ تے مکمل اتفاق کیتا ڳیا جو ملک اچ پائیدار امن دے قیام اتے سماجی ہم آہنگی کیتے سارے مکاتبِ فکر کوں آپس اچ تعاون اتے مثبت کردار ادا کرݨا پوسی۔ وزیرِ داخلہ محسن نقوی واضح کیتا جو کہیں وی بے گناہ بندے دے خلاف کارروائی نہ کیتی ویسی اتے کہیں مدرسے کوں بند نہ کیتا ویسی پر شرپسند اتے انتہاپسند عناصر نال سختی نال نمٹیا ویسی اتے قانون ہتھ اچ گھنݨ یا ریاست دے خلاف ہتھیار چاوݨ دی اجازت بالکل نہ ݙتی ویسی۔ محسن نقوی آکھیا جو قائدِاعظم دے پاکستان اچ شرپسندی، انتہاپسندی اتے انتشار کھنڈاوݨ آلیاں دی کوئی گنجائش کائنی۔ ایہو جہے انصراں دے خلاف آہنی ہتھاں نال کارروائی کیتی ویسی۔ انہاں آکھیا جو علماء کرام مذہبی ہم آہنگی، صبر تے تحمل اتے امن دے فروغ اچ اہم کردار ادا کریندے پئن، اتے دینی تعلیم دا فروغ اساں ساریاں دا سانجھا فریضہ اے۔ علامہ شاہ اویس نورانی ایں موقع تے آکھیا جو جمعیت علمائے پاکستان ملک اچ امن، رواداری اتے بھائی چارے دے فروغ کیتے حکومت دے نال ہر ممکن تعاون کریسی۔ ملاقات اچ ملک اچ مذہبی رواداری اتے قومی یکجہتی دے فروغ کیتے سانجھی کوششاں جاری رکھݨ تے اتفاق کیتا ڳیا۔