وفاقی وزیراورنگزیب خان کھچی نال چین دے کلچرل قونصلر چن پینگ دی ملاقات

اسلام آباد۔17اکتوبر(اے پی پی) وفاقی وزیر قومی ورثہ و ثقافت اورنگزیب خان کھچی نال چین دے نیشنل کلچرل ہیریٹیج ایڈمنسٹریشن دے کلچرل قونصلر چن پینگ ملاقات کیتی۔ جاری پریس ریلیز موجب ملاقات اچ ثقافتی ورثے دے شعبے اچ تعاون اتے تبادلے کوں ودھارا ݙیوݨ کیتے ہک معاہدے تے دستخط کیتے ڳئے جیں دا مقصد پاکستان اتے چین وچال ݙو طرفہ تعاون کوں مزید گھاٹا کرݨ، عوامی رابطے کوں مضبوط بݨاوݨا اتے آپت دی سمجھ ٻُجھ و دوستی کوں ودھارا ݙیوݨا اے۔ ݙوہیں ملکاں دوستانہ مشاورت دے ذریعے ایں عزم دا اعادہ کیتا جو او آپݨے آپݨے ملکاں دے ثقافتی ورثے دے تحفظ اتے ودھارے کیتے سانجھیاں کوششاں جاری رکھیسن۔ ݙوہیں ملکاں وچال طے تھیوݨ آلے معاہدے موجب ، جیڑھا ثقافتی ورثے دی چوری، غیر قانونی کَھٹائی اتے غیر قانونی درآمد و برآمد روکݨ متعلق اے، پاکستان اتے چین ایں ڳالھ تے اتفاق کیتے جو او ثقافتی نوادرات دی غیر قانونی سمگلنگ دے خلاف سانجھیاں کوششاں کریسن۔ ایں تعاون نال عالمی سطح تے ثقافتی ورثے دے تحفظ دیاں کوششاں کوں تقویت مِل ویسی۔