پاکستان دا افغان طالبان، فتنہ الخوارج اتے فتنہ الہندستان دی طرفوں پاک-افغان سرحد تے بلاجواز جارحیت تے تشویش دا اظہار، پاکستان پرامن، مستحکم، علاقائی طور تے جُڑیا ہویا اتے خوشحال افغانستان چاہندے، ترجمان دفتر خارجہ شفقت علی خان دی پریس بریفنگ

اسلام آباد۔17اکتوبر(اے پی پی)پاکستان 11 اتے 12 اکتوبر اتے ول 14 اتے 15 اکتوبر دی وچلی رات کوں افغان طالبان، فتنہ الخوارج اتے فتنہ الہندستان دی طرفوں پاک-افغان سرحد تے بلاجواز جارحیت تے گھاٹی تشویش ظاہر کیتی اے۔ ترجمان دفتر خارجہ شفقت علی خان اتھاں پریس بریفنگ اچ آکھیا جو ایہو جہیاں بلا اشتعال کارروائیاں دا مقصد پاکستان-افغانستان سرحد کوں غیر مستحکم کرݨا اتے ݙوہیں پڑوسی ملکاں وچال پرامن ہمسائیگی اتے تعاون تے مبنی تعلقات دی مجموعی روح کوں جھٹلاوݨ اے۔ انہاں آکھیا جو پاکستان آپݨے دفاع دے حق دا استعمال کریندے نہ صرف سرحد تے حملیں کوں مؤثر طریقے نال پسپا کیتا بلکہ افغان سرزمین توں کارروائیاں کرݨ آلے طالبان فورسز اتے ایں نال جُڑئے دہشت گرد گروپاں کوں وی جانی، مالی اتے بنیادی ڈھانچے دے لحاظ نال بارا ضیان پُڄائے۔ ترجمان آکھیا جو اے انفراسٹرکچر پاکستان دے خلاف دہشت گردانہ حملیں دی منصوبہ بندی اتے سہولت کاری کیتے استعمال کیتے ڳئے ہن۔ انہاں آکھیا جو اساݙا ہدف اتے سِدھا دفاعی ردعمل افغان شہری آبادی کوں نشانہ بݨاوݨا نہ ہئی۔ طالبان فورسز دے برعکس اساں شہریاں دیاں جاناں دے ضیان توں بچݨ کیتے آپݨے دفاعی ردعمل اچ ٻہوں احتیاط کیتی۔ ترجمان آکھیا جو طالبان حکومت دی درخواست تے اتے آپت دی رضا مندی نال حکومت پاکستان اتے افغان طالبان حکومت عارضی جنگ بندی تے عمل درآمد دا فیصلہ کیتا جو 15 اکتوبر کوں شام 6 وڄے توں نافذ العمل تھئے اتے اے 48 گھنٹے تئیں جاری رہسی۔ ترجمان آکھیا جو ایں ویلھے دے دوران ݙوہیں فریق تعمیری ڳالھ مہاڑ دے ذریعے ایں اوکھے پر حل تھیوݨ آلے مسئلے دا مثبت حل لبھݨ دی مخلصانہ کوششاں کریندے پئن۔ ترجمان آکھیا جو پاکستان مذاکرات و سفارت کاری اتے افغانستان دے نال آپت اچ فیدہ مند تعلقات کوں ٻہوں اہمیت ݙیندے، حکومت پاکستان ایں دے نال نال صورتحال تے گھاٹی نظر رکھی ہوئی اے اتے او آپݨی سرزمین اتے لوکاں دیاں جاناں دے تحفظ کیتے ہر ممکن اقدامات کریسی۔ انہاں آکھیا جو پاکستان افغانستان اچ دہشت گرد عناصر دی موجودگی توں توجہ ہٹاوݨ کیتے بھارت اچ عبوری افغان وزیر خارجہ دے دعویں کوں سختی نال مسترد کیتے، اے بے بنیاد دعوے کرتے طالبان حکومت علاقائی امن اتے استحکام دے حوالے نال آپݨیاں ذمہ واریاں توں خود کوں بَری نی کر سڳدی۔ انہاں آکھیا جو افغان سرزمین تے دہشت گرد عناصر دی مسلسل موجودگی سودھے اقوام متحدہ دی مانیٹرنگ ٹیم دی رپورٹاں اتے افغانستان اچ انہاں دیاں سرگرمیاں دی آزادی کوں چنڳے طریقے نال دستاویزی شکل ݙتی ڳئی اے۔ ترجمان آکھیا جو دہشت گردی دے خلاف جنگ ہک سانجھا مقصد اے، طالبان حکومت کوں ذمہ واریاں بدلݨ دی بجائے آپݨی سرزمین کوں ݙوجھے ملکاں دے خلاف دہشت گردی کیتے استعمال کرݨ دی اجازت نہ ݙیوݨ دے آپݨے عزم دا احترام کرݨا چاہیدے اتے خطے اتے ایں توں ٻاہر امن و استحکام دے حصول اچ آپݨا بھرپور کردار ادا کرݨا چاہیدے۔ شفقت علی خان آکھیا جو پاکستان افغان سرزمین توں فتنہ الخوارج اتے فتنہ الہندستان دی موجودگی متعلق آپݨے تحفظات دا کئی واری اظہار کیتے، پاکستان طالبان دی حکومت توں انہاں دہشت گرد عناصر دے خلاف ٹھوس اتے تصدیق تھیوݨ آلی کارروائیاں دی توقع کریندے۔ انہاں آکھیا جو پاکستان چنڳی ہمسائیگی، اسلامی بھرپی اتے انسانیت دے جذبے دے تحت چار ݙھاکیں توں ودھ عرصے توں تقریباً 40 لکھ افغانیاں دی فراخدلی نال میزبانی کریندا پئے، پاکستان آپݨی سرزمین تے افغان شہریاں دی موجودگی کوں کنٹرول کرݨ کیتے سارے اقدامات بین الاقوامی اصولاں اتے آپݨے ملکی قوانین موجب کریسی۔ ترجمان آکھیا جو پاکستان ہک پرامن، مستحکم، دوستانہ، جامع، علاقائی طور تے جُڑیا ہویا اتے خوشحال افغانستان چاہندے ، پاکستان توقع کریندے جو طالبان حکومت ذمہ واری نال کَم کریسی، آپݨے وعدیں دا احترام کریسی اتے آپݨی سرزمین توں دہشت گردی کوں مُنڈھ توں مُکاوݨ دے سانجھے مقصد دے حصول اچ تعمیری کردار ادا کریسی۔ انہاں آکھیا جو اساں اے وی امید کریندوں جو ہک ݙینھ افغان عوام آزاد تھی ویسن اتے انہاں تے ہک حقیقی نمائندہ حکومت ہوسی۔