وزیراعظم محمد شہباز شریف دی ساریاں صوبائی حکومتاں، وفاقی و صوبائی اداریں کوں پاکستان اچ غیرقانونی موجود افغان شہریاں دی وقتی وطن واپسی یقینی بݨاوݨ دی ہدایت

اسلام آباد۔17اکتوبر(اے پی پی)وزیراعظم محمد شہباز شریف ساریاں صوبائی حکومتاں، وفاقی و صوبائی اداریں کوں پاکستان اچ غیرقانونی طور تے موجود افغان شہریاں دی وقتی وطن واپسی یقینی بݨاوݨ دی ہدایت کریندے آکھیے جو افغانستان دی سرزمین توں پاکستان تے دہشت گرد حملے اتے افغانیاں دا انہاں حملیں اچ ملوث ہووݨ تشویشناک اے، دہشت گردی دی جنگ اچ آپݨے پیاریں دی قربانیاں ݙیوݨ آلے پاکستان دے بہادر عوام اساں توں سوال کریندن جو حکومت کݙاں تئیں افغان پناہ گزیناں دا ٻوجھ چیسی، افغانستان دے حملیں کوں پسپا کرݨ تے پوری قوم افواج پاکستان کوں خراج تحسین پیش کریندی اے، اساݙی بہادر افواج مادر وطن دا دفاع کرݨ جاݨدی اے ۔ وزیراعظم محمد شہباز شریف دی زیر صدارت افغان پناہ گزیناں دی وطن واپسی دے حوالے نال اعلیٰ سطح دا اجلاس منعقد تھیا جیں اچ چیف آف آرمی سٹاف فیلڈ مارشل سید عاصم منیر، وفاقی وزراء، وزیراعظم آزاد جموں و کشمیر، پنجاب، سندھ، بلوچستان اتے گلگت بلتستان دے وزراء اعلیٰ، خیبر پختونخوا دے وزیراعلیٰ دے نمائندے اتے وفاقی و صوبائی حکومتاں و اداریں دے اعلیٰ حکام شرکت کیتی۔ وزیراعظم دفتر دے میڈیا ونگ توں جاری بیان موجب وزیراعظم اجلاس دے شرکاء دا خیرمقدم کریندے آکھیا جو انہاں گزریل ݙینھ خیبر پختونخوا دے وزیراعلیٰ نال ٹیلی فون تے ڳالھ مہاڑکیتی، انہاں کوں مبارخ ݙتی اتے وفاق دی طرفوں ہر قسم دے تعاون دا یقین ݙیوایا، خیبر پختونخوا وفاق دی ہک اہم اکائی اے، وفاقی حکومت ایں دے عوام دی فلاح و ترقی کیتے صوبائی حکومت دے نال ہر قسم دے تعاون کیتے تیار اے۔ اجلاس اچ وزیراعلیٰ خیبر پختونخوا سہیل آفریدی دی غیر حاضری پاروں انہاں دی نمائندگی مزمل اسلم کیتی۔ وزیراعظم آکھیا جو ݙہاکیں توں اوکھ اچ گھرئے افغانستان دی پاکستان ہر اوکھے ویلھے مدد کیتی، پاکستان دہشت گردی دی جنگ اچ ہزاراں قیمتی جاناں اتے ارباں ڈالر دا معاشی ضیان چاتا۔ وزیراعظم افغانستان دی سرزمین توں پاکستان تے دہشت گرد حملیں اتے افغانیاں دے انہاں حملیں اچ ملوث ہووݨ کوں تشویشناک قرار ݙیندے آکھیا جو نائب وزیراعظم و وزیرخارجہ، وزیر دفاع اتے اعلیٰ حکومتی عہدیدار کئی واری افغانستان دے دورے تے ڳئے اتے افغان نگران حکومت کوں پاکستان اچ دہشت گردی کیتے افغان سرزمین دے استعمال کوں روکݨ دے حوالے نال مذاکرات کیتے، پاکستان افغانستان توں پاکستان اچ خوارجیاں دی در اندازی کوں روکݨ دی سفارتی و سیاسی اقدامات دے ذریعے بھرپور کوشش کیتی۔ وزیراعظم آکھیا جو پاکستان دے بہادر عوام، جنہاں دہشت گردی دی جنگ اچ آپݨے پیاریں دیاں قربانیاں ݙتیاں، اساں توں سوال کریندن جو حکومت کݙاں تئیں افغان مہاجرین دا ٻوجھ چیسی۔ وزیراعظم ہدایت کیتی جو ساریاں صوبائی حکومتاں، وفاقی و صوبائی ادارے نیڑے دے تعاون نال پاکستان اچ غیر قانونی طور تے موجود افغان شہریاں دی وقتی وطن واپسی یقینی بݨاون۔ انہاں آکھیا جو افغانستان دا پاکستان تے اڄوکا حملہ اتے خوارجیاں دی پاکستان اچ در اندازی دیاں کوششاں دا ساتھ ݙیوݨ تشویشناک امر اے، پاکستان دی بہادر افواج ایں حملے دا بھرپور انداز نال جواب ݙتا، چیف آف آرمی سٹاف فیلڈ مارشل سید عاصم منیر دی قیادت اچ افواج پاکستان افغانستان دے حملیں کوں پسپا کیتا جیں تے میں سودھے پوری قوم انہاں کوں خراج تحسین پیش کریندی اے۔ انہاں آکھیا جو چیف آف آرمی سٹاف فیلڈ مارشل سید عاصم منیر دی قیادت اچ افواج پاکستان بھارتی جارحیت دے دوران اے ثابت کر چُکی اے جو اساݙی بہادر افواج آپݨیاں پیشہ ورانہ صلاحیتاں نال وطن دی مٹی دا دفاع کرݨ جاݨدی اے ۔ اجلاس کوں افغان مہاجرین دی وطن واپسی دے حوالے نال تفصیلی بریفنگ ݙیندے ݙسایا ڳیا جو پاکستان اچ رہݨ آلے افغان پناہ گزیناں دی مرحلہ وار وطن واپسی شروع کیتی ڳئی۔ 16 اکتوبر 2025ء تئیں 14 لکھ 77 ہزار 592 افغانیاں کوں واپس بھیڄیا ڳئے ، افغان پناہ گزیناں کوں کہیں وی قسم دی اضافی مہلت نہ ݙتی ویسی اتے انہاں دی وطن واپسی وقتی یقینی بݨائی ویسی، پاکستان اچ صرف انہاں افغان شہریاں کوں رہݨ دی اجازت ہوسی جنہاں کنے پاکستان دا ویزہ موجود ہوسی۔ بریفنگ اچ ݙسایا ڳیا جو افغانستان دے ول ایگزٹ پوائنٹس دی تعداد کوں ودھایا ویندا پئے تاں جو افغانیاں دی وطن واپسی سوکھی اتے تکھے ممکن تھی سڳے۔ اجلاس کوں ݙسایا ڳیا جو پاکستان اچ غیر قانونی طور تے موجود افغان شہریاں کوں پناہ ݙیوݨ اتے انہاں کوں گیسٹ ہاؤسز اچ رہݨ دی اجازت ݙیوݨ قانوناً جُرم اے، ایہو جیہے افغان شہریاں دی نشاندہی کیتی ویندی پئی اے، پاکستان اچ موجود افغان پناہ گزیناں دی وطن واپسی دے عمل اچ عوام کوں شراکت دار بݨایا ویسی اتے کہیں کوں وی افغانیاں کوں حکومت دیاں پالیسیاں دی خلاف ورزی کریندے پناہ ݙیوݨ دی اجازت نہ ݙتی ویسی۔ وزیراعظم غیر قانونی افغان پناہ گزیناں دی وطن واپسی دے دوران ٻݙھے، تریمتاں، ٻالاں اتے اقلیتاں نال باعزت طریقے نال پیش آوݨ دی ہدایت کیتی۔ آزاد جموں و کشمیر دے وزیراعظم، پنجاب، سندھ، بلوچستان، گلگت بلتستان دے وزراء اعلیٰ اتے حکومت خیبر پختونخوا دے نمائندے پاکستان دیاں سفارتی کامیابیاں دی تعریف کریندے وزیراعظم شہباز شریف اتے چیف آف آرمی سٹاف فیلڈ مارشل سید عاصم منیر دے ایں حوالے نال مرکزی کردار دی تعریف کیتی۔ اجلاس دے چھیکڑ اچ فورم فیصلہ کیتا جو اجلاس اچ پیش کیتیاں ڳئیاں ساریاں سفارشات تے سختی نال عمل کیتا ویسی۔ وزیراعظم افغان پناہ گزیناں دی وطن واپسی دے حوالے نال صوبیں توں مکمل تعاون دی درخواست کیتی۔