وزیراعظم محمد شہباز شریف جیولوجیکل سروے آف پاکستان دی اپ گریڈ شدہ جیو سائنس ایڈوانسڈ ریسرچ لیبارٹریز دا افتتاح کرݙتا

اسلام آباد۔17اکتوبر(اے پی پی)وزیراعظم محمد شہباز شریف جیولوجیکل سروے آف پاکستان دی اپ گریڈ شدہ جیو سائنس ایڈوانسڈ ریسرچ لیبارٹریز(جی اے آر ایل) دا افتتاح کرݙتا۔ چیف آف آرمی سٹاف فیلڈ مارشل سید عاصم منیر، وفاقی وزراء اتے غیر ملکی شخصیات وی افتتاحی تقریب اچ شرکت کیتی۔ وزیراعظم دفتر دے میڈیا ونگ توں جاری بیان موجب ایں منصوبے دا مقصد ملک دی معدنی تحقیق دیاں صلاحیتاں اچ وݙا ودھارا کرݨ اتے پاکستان دے معدنی شعبے دی ترقی آلے پاسے اعلیٰ سطح دی توجہ ݙیواوݨا اے۔ ایں لیبارٹری دا قیام شروع اچ 1991ء اچ تھیا ہئی، ہݨ ایں کوں مکمل طور تے جدید خطوط تے بݨایا ڳئے تاں جو ایں کوں بین الاقوامی معیار موجب بݨایا ونڄ سڳے۔ چک شہزاد اچ واقع ایں جدید ترین لیبارٹری کمپلیکس کوں ISO/IEC 17025 دی منظوری حاصل تھی ڳئی اے جو ایں دی جانچ اتے کیلیبریشن دی تکنیکی مہارت کوں عالمی معیار موجب تسلیم کریندی اے۔ ایں پیش رفت دے نتیجے اچ لیبارٹری ہݨ کان کنی دیاں کمپنیاں کوں JORC اتے NI 43-101 رپورٹنگ معیاراں دے تحت ذخیرے دے اندازے کیتے درکار بین الاقوامی سطح تے تسلیم شدہ تجزیاتی اعداد و شمار ݙے سڳسی۔ جیولوجیکل سروے آف پاکستان دے حکام موجب ایں اپ گریڈیشن اتے سرٹیفیکیشن نال معدنی شعبے اچ سرمایہ کاری کوں ودھارا مِل ویسی کیوں جو اے لیبارٹری انہاں معتبر ڈیٹا ݙیوݨ کوں یقینی بݨیسی جیں تے بین الاقوامی کان کَھٹݨ دیاں کمپنیاں اتے مالیاتی ادارے وݙے منصوبیں کیتے انحصار کریندن۔ ترائے ݙہاکیں تے کھنڈئے ہوئے آپݨے شاندار ماضی دی بنیاد تے اے سہولت معدنی شعبے دی ترقی دیاں بدلدی ہوئی ضرورتاں کوں پورا کرݨ کیتے ہݨ ہک جدید ترین تحقیقی لیبارٹری دے طور تے خدمات انجام ݙیسی۔