پاک فضائیہ دا دستہ جدید ترین جے ایف۔17 تھنڈر بلاک تھری لڑاکا طیاریاں دے نال فضائی جنگی مشق ’’انڈس شیلڈ الفا‘‘ اچ شرکت کیتے آذربائیجان پُڄ ڳیا

راولپنڈی ۔19اکتوبر (اے پی پی) پاک فضائیہ دا دستہ جدید ترین جے ایف۔17 تھنڈر بلاک تھری لڑاکا طیاریاں دے نال ݙو پاسہ فضائی جنگی مشق ’’انڈس شیلڈ الفا‘‘ اچ شرکت کیتے آذربائیجان پڄ ڳئے، ایں مشق دا مقصد ݙوہیں برادرانہ فضائی افواج وچال آپت دی سمجھ، حکمت عملی نال ہم آہنگی اتے ݙو پاسہ تعاون کوں وݙھاوݨ اے۔ اتوار کوں آئی ایس پی آر ولوں جاری بیان دے مطابق پاک فضائیہ دے لڑاکا طیاریاں پاکستان اچ آپݨے ہوم بیس توں آذربائیجان تئیں بغیر رُکے آپݨا سفر پورا کیتا، ایں دوران پاک فضائیہ فضا توں فضا اچ طیاریاں اچ ایندھن بھرݨ دے آپریشنز کیتے، فضا اچ ایندھن بھرݨ دا اے اُلجھیا ہویا آپریشن پاک فضائیہ آپݨے آئی ایل 78 ایئریل ٹینکر دے ذریعے انتہائی درستگی نال کیتا، جئیں نال پاک فضائیہ دے لڑاکا طیاریاں دی لمبا فاصلہ طے کرݨ دی صلاحیت ہک واری ولا ظاہر تھئی اتے ایں توں پاک فضائیہ دے عملے دی پیشہ وارانہ مہارت اتے لمبے بین الاقوامی تعیناتیاں کیتے ایں دی تیاری دا اظہار تھیندے۔ ݙوہیں ملکاں وچال اے مشق جدید فضائی جنگی حکمت عملیاں، سانجھے مشن دی منصوبہ بندی اتے تیزی نال ترقی کرݨ آلی ٹیکنالوجی اتے بدلدی ہوئی فضائی طاقت دے ماحول اچ عمل درآمد تے توجہ ݙیسی، اے مشق آپریشنل بصیرت دے تبادلے اتے اُبھرے ہوئے فضائی دفاعی چیلنجز کیتے سانجھے رد عمل کوں مضبوط کرݨ کیتے ہک اہم پلیٹ فارم ثابت تھیسی۔ آئی ایس پی آر دے مطابق پاکستان ایئر فورس دے دستے دی مشق ’’انڈس شیلڈ الفا‘‘ اچ شرکت پاک فضائیہ دے خطے دے استحکام اتے عالمی فوجی تعاون کیتے پائیدار عزم دا اعادہ کریندی اے، اے پاک فضائیہ دے جدید جنگی تقاضیاں دے مطابق مسلسل ترقی اتے موافقت دے نہ ہِلݨ آلے عزم کوں وی ظاہر کریندی اے جݙاں جو فضائی آپریشن دے ہر شعبے اچ آپݨی شاندار روایتاں کوں برقرار رکھیندی اے۔