امن و امان اتے قومی سلامتی دے مسئلے اساݙی پہلی ترجیح ہن، وفاقی وزیر داخلہ محسن نقوی

اسلام آباد۔13نومبر(اے پی پی) وفاقی وزیر داخلہ سینیٹر محسن نقوی آکھیے جو امن و امان اتے قومی سلامتی دے مسئلے اساݙی پہلی ترجیح ہن۔ سینیٹ اجلاس وچ انہاں آکھیا جو اڄوکے حملیں دے سلسلے وچ اسلام آباد دھماکے اتے وانا وچ شامل کرداراں دی نشاندہی کر ڳھدی ڳئی اے اتے تحقیقات جاری ہن۔ وزیر داخلہ ݙسایا جو تحقیقاتی عمل توں پتہ چلیے جو انہاں واقعیں وچ شامل کجھ لوکاں دا تعلق افغانستان نال اے۔ محسن نقوی آکھیا جو بین الاقوامی سطح تے وی رابطے جاری ہن، کَل سری لنکن کھݙاریاں نال ڳالھ مہاڑ تھئی اتے سری لنکن صدر وی اپݨی ٹیم نال رابطہ کیتا۔ انہاں ݙسایا جو زمبابوے دی کرکٹ ٹیم وی کَل شام کوں پاکستان پڄ چکی اے اتے متعلقہ سکیورٹی انتظامات کوں مزید سخت کیتا گئے۔ فیلڈ مارشل وی انہاں ٹیماں دے سکیورٹی ہیڈز نال رابطے رکھئن۔ وزیر داخلہ ایں پاسے توجہ ݙیوائی جو افغانستان توں آوݨ آلے لوک کݙاہیں اتھاں غیرقانونی طور تے آتے حملیں وچ شامل تھی ویندن جیں نال اساݙا دفاعی اتے حفاظتی چیلنج ودھدا پئے۔ انہاں آکھیا جو ایں صورتحال کوں ݙیکھدیں حکومت دی پہلی ترجیح غیرقانونی افغان شہریاں کوں اتھوں بے دخل کرݨ اے اتے ایں سلسلے وچ قانونی اتے انتظامی قدم چاتے ویندے پئن۔ انہاں آکھیا جو محکمہ داخلہ شفاف تحقیقات اتے قربانی ݙیوݨ آلے لوکاں دے خانداناں دی ہر ممکن مدد کوں یقینی بݨیسی۔ وزیر داخلہ عوام توں تعاون اتے امن و سلامتی کیتے ضروری معلومات سانجھیاں کرݨ دی اپیل وی کیتی۔