اردن دے شاہ عبداللہ دوئم ابن الحسین 15 اتے 16 نومبر کوں پاکستان دا سرکاری دورہ کریسن، ترجمان دفتر خارجہ

اسلام آباد۔14نومبر (اے پی پی) وزیراعظم محمد شہباز شریف دی دعوت تے اردن دے شاہ عبداللہ دوئم ابن الحسین 15 اتے 16 نومبر کوں پاکستان دا سرکاری دورہ کریسن۔ ترجمان دفتر خارجہ ولوں جمعہ کوں جاری بیان دے مطابق اعلیٰ سطح دا اے دورہ پاکستان اتے اردن وچال دیرینہ، برادرانہ تعلقات دی عکاسی کریندے۔ بیان اچ آکھیا گیا جو اے دورہ پاکستان اتے اردن دے تعلقات دی تزویراتی سمت کوں ٻیا مضبوط کرݨ اتے سیاسی، اقتصادی اتے ثقافتی شعبیاں اچ ہک جامع اتے وݙے بنیاداں تے شراکت داری کوں شامل کریندیں ہوئیں انہاں کوں اڳوں ودھاوݨ دا کم کریسی۔ آپݨے دورے دے دوران شاہ عبداللہ دوئم ابن الحسین صدر مملکت اتے وزیراعظم نال اہم ملاقاتاں کریسن۔ بیان دے مطابق ݙوہیں برادر ملکاں وچال ݙو پاسہ تعلقات نال متعلق سارے معاملیاں تے گالھ مہاڑ کیتی ویسی، شاہ عبداللہ دوئم کوں اعلیٰ ترین سول ایوارڈ نال نوازݨ دی خاص تقریب ایوان صدر اچ تھیسی۔ شاہ عبداللہ دوئم ابن الحسین دا دورہ پاکستان اتے اردن دے دیرینہ تعلقات کوں ٻیا مضبوط کریسی اتے ݙوہیں برادر ملکاں وچال ݙو پاسہ تعاون دے دائرے کوں ودھاوݨ اچ مددگار ثابت تھیسی۔