صدر مملکت آصف علی زرداری نال تاجکستان دے وزیرِ دفاع کرنل جنرل سوبر زودہ امام علی عبدالرحیم دی ملاقات

اسلام آباد۔14نومبر(اے پی پی) صدر مملکت آصف علی زرداری نال تاجکستان دے وزیرِ دفاع کرنل جنرل سوبر زودہ امام علی عبدالرحیم ملاقات کیتی اتے ݙو طرفہ تعلقات، دفاعی تعاون، علاقائی سلامتی اتے تجارت و توانائی دے شعبیاں اچ آپسی تعاون ودھاوݨ تے ڳالھ مہاڑ کیتی۔ ملاقات اچ تاجکستان دے سفیر شریف زودہ یوسف طاہر، کرنل رسول زودہ کریم عبد الرسول، میجر جنرل حکیم زودہ ظریف یونس اتے میجر جنرل امون اللہ زودہ امین جان امون اللہ وی موجود ہن۔ صدر مملکت آصف علی زرداری آکھیا جو ݙوہاں ملکاں کوں سیاسی، ثقافتی اتے عوامی سطح تے رابطے ٻئے ودھاوݨے چاہیدن، کاسا-1000 منصوبے دی ویلھے تے تکمیل کیتے پُرعزم ہیں۔ انہاں دفاعی شعبے اچ ودھدے ہوئے تعاون اطمینان کریندے آکھیا جو ݙوہاں ملکاں دیاں فوجاں وچال آپسی رابطے اتے مشق “دوستی-II” دا کامیاب انعقاد ݙوہاں ملکاں دے تعلقات دی مضبوطی دا ثبوت اے۔ تاجکستان دے وزیرِ دفاع پاکستان دے نال مختلف شعبیاں اچ ݙو طرفہ تعاون ٻیا ودھاوݨ اچ دلچسپی ݙکھائی۔ ایں موقع تے سینیٹر شیری رحمٰن اتے سینیٹر سلیم مانڈوی والا وی موجود ہن۔