پاکستان افغان سرزمین توں دہشت گردی اصلوں برداشت نا کریسی، ٹی ٹی پی، بی ایل اے اتے ݙوجھے دہشت گرد گروہ پاکستان دے دشمن ہن، ترجمان دفتر خارجہ دی ہفتہ وار بریفنگ

اسلام آباد۔14نومبر(اے پی پی) پاکستان افغان سرزمین توں پاکستان اتے ایںدے عوام دے خلاف تھیوݨ آلی دہشت گردی کوں بالکل برداشت نہ کریسی، تحریک طالبان پاکستان، بلوچ لبریشن آرمی اتے ݙوجھے ملیشیا گروہ پاکستان دے دشمن ہن، انہاں کوں کہیں وی طرح دی سہولت ݙیوݨ آلے کوں پاکستان اتے ایںدے عوام دا دوست نئیں سمڄھیا ونڄ سڳدا۔ ترجمان دفتر خارجہ طاہر حسین اندرابی ہفتہ وار میڈیا بریفنگ اچ واضح کیتے جو پاکستان افغان سرزمین توں تھیوݨ آلی دہشت گردی کوں برداشت نہ کریسی، ٹی ٹی پی، بی ایل اے اتے ݙوجھیاں عسکریت پسند تنظیماں کوں “پاکستان دشمن” قرار ݙیندیں ہوئیں ترجمان خبردار کیتا جو انہاں کوں سہولت ݙیوݨ آلے کہیں وی ملک کوں پاکستان اتے ایںدے عوام دا دوست نئیں سمجھیا ونڄ سڳدا۔ ترجمان دفتر خارجہ ہفتہ وار میڈیا بریفنگ اچ پاکستان دی دہشت گردی دے خلاف کارروائیاں دی ترجیحات تے سخت سنیہا ݙتا۔ ترجمان دفتر خارجہ سفیر طاہر حسین اندرابی آکھیا جو پاکستان اچ 2021ء توں افغانستان توں شروع تھیوݨ آلے دہشت گرد حملیاں وچ ودھارا تھئے، پاکستان کابل اچ انسانی ہمدردی اتے تجارتی سہولتاں ݙیوݨ تے کم جاری رکھیا ہوئے ایندے باوجود افغان عبوری حکام پاکستان کوں نشانہ بݨاوݨ آلے خاص گروہاں کوں روکݨ اچ ناکام رہین۔ انہاں طالبان حکومت ولوں دہشت گرداں کوں پناہ گزین دے طور تے پیش کرݨ دیاں کوششاں کوں ‘مکمل طور تے ناقابل قبول’ قرار ݙتا۔ انہاں آکھیا جو پاکستان صرف افغانستان اچ رہݨ آلے تصدیق شدہ پاکستانی شہریاں کوں وصول کرݨ کیتے تیار اے اتے صرف ایں صورت اچ جݙاں انہاں کوں سرکاری سرحدی لنگھݨ دیاں جاہیں تے باضابطہ طور تے حوالے کیتا ونڄے۔ انہاں آکھیا جو کہیں کوں وی ہتھیاراں نال دھکیلا نئیں ونڄ سڳدا۔ طالبان انتظامیہ دے اندرو کڄھ لوکاں ولوں نسلی جذبات کوں اُبھارݨ دیاں کوششاں کوں مسترد کریندے ترجمان آکھیا جو پاکستان دا دہشت گردی مکاوݨ اتے شہریاں دے تحفظ دے حوالے نال صاف اتے ݙو ٹوک موقف اے۔ 7 نومبر کوں ترکیہ اتے قطر وچال تھیوݨ آلے مذاکرات دے تریجھے دور دے استنبول اجلاس دیاں تفصیلاں ݙسیندے طاہر حسین اندرابی آکھیا جو پاکستان ݙوہاں ملکاں دی ثالثی کوں قدر نال ݙیھدے ٻھل ایندے تے پیشرفت دا انحصار کابل تے ہے جیدنے اچ پاکستان دی ساریں توں وݙی پریشانی افغان سرزمین تے ٹی ٹی پی، بی ایل اے اتے ݙوجھے گروہاں دی موجودگی اے۔ پاکستان دی سفارتی سرگرمیاں بارے طاہر حسین اندرابی تصدیق کیتی جو اردن دے شاہ عبداللہ ابن الحسین 15 اتے 16 نومبر کوں پاکستان دا سرکاری دورہ کریسن۔ انہاں آکھیا جو اے دورہ ݙوہاں ملکاں وچال برادرانہ تعلقات دا ݙسیندے۔ اردن دے بادشاہ صدر مملکت آصف علی زرداری اتے وزیراعظم شہباز شریف نال ملاقاتاں کریسن جیںدے ایجنڈے اچ دفاع، تجارت، علاقائی امن اتے انسداد دہشت گردی دے شعبیاں اچ تعاون وادھا شامل اے۔ انہاں آذربائیجان دے یوم فتح دی پنجویں سالگرہ دے موقع تے صدر الہام علیوف دی دعوت تے وزیراعظم محمد شہباز شریف دے باکو دے حالیہ دورے دا ذکر کیتا۔ انہاں آکھیا جو ݙوہاں رہنماواں دیرینہ تعلقات دے سارے پہلواں دا جائزہ ڳھدا اتے سیاست، توانائی، رابطے، تجارت اتے دفاع اچ تعاون کوں مضبوط بݨاوݨ تے اتفاق کیتا، وزیراعظم آذربائیجان کوں آرمینیا دے نال تاریخی امن معاہدے تے مبارکباد ݙتی اتے مسئلہ کاراباخ تے پاکستان دی حمایت دا پکا ارادہ کیتا، باکو دے یوم فتح دی وݙی پریڈ اچ پاک فوج دے ہک دستے وی حصہ ڳھدا، وزیراعظم شہباز شریف ترکیہ دے صدر رجب طیب اردوان نال وی ملاقات کیتی۔ ترجمان آکھیا جو پاکستان 11 نومبر کوں بین الپارلیمانی سپیکرز کانفرنس دی کامیابی نال میزبانی کیتی جیںدے اچ وزیراعظم، نائب وزیراعظم و وزیر خارجہ اتے بیلاروس، متحدہ عرب امارات، شام اتے ݙوجھے ملکاں دے وفود شرکت کیتی۔ انہاں آکھیا جو نائب وزیراعظم ݙوجھے ݙینہہ دے افتتاحی اجلاس دی صدارت کیتی اتے دورے تے آئے ہوئے کئی پارلیمانی رہنماواں نال ݙو طرفہ ملاقاتاں کیتیاں۔ گالھ مہاڑ اچ پارلیمانی تعاون، علاقائی رابطے اتے امن کوں ودھاوݨ اچ قانون بݨاوݨ آلیاں دی سانجھی ذمہ داری تے توجہ ݙتی ڳئی۔ سفیر طاہر حسین اندرابی اسلام آباد پالیسی ریسرچ انسٹیٹیوٹولوں چھیویں مارگلہ ڈائیلاگ تے وی توجہ ݙیوائی جیںدے اچ “عالمی نظام دا مستقبل: تعاون یا محاذ آرائی” دے موضوع تے گالھ مہاڑ کیتی ڳئی۔ انہاں آکھیا جو نائب وزیراعظم اپݨے خطاب اچ خبردار کیتے جو ہک طرفہ، بلاک دی سیاست اتے ودھدیاں ہوئیاں تجارتی جنگاں دی وجہ توں کثیرالجہتی نظام ختم تھیندا پئے۔ انہاں کثیرالجہتی اداریاں کوں مضبوط بݨاوݨ اتے بین الاقوامی قانون، عالمی امن اتے پائیدار ترقی دے وعدیاں کوں مضبوط کرݨ دی فوری لوڑھ تے زور ݙتا۔ ترجمان آکھیا جو پاکستان انڈس واٹر ٹریٹی دے تحت اپݨے اگست 2025ء دے فیصلے دے پہلواں تے ثالثی عدالت دیاں وضاحتاں نوٹ کیتن، جݙاں جو بھارت ایںدے اچ حصہ گھنݨ بند کر ݙتے، ٻھل بھارت دی درخواست تے شروع تھیوݨ آلی غیر جانبدار ماہر دی کارروائی جاری رہسی۔ بھارتی وزارت خارجہ دے بیان تے ردعمل ݙیندیں ہوئیں طاہر حسین اندرابی امریکی صدر ڈونلڈ ٹرمپ دے جوہری تجربیاں بارے بیان کوں پاکستان دے جوہری ریکارڈ نال جوڑݨ دیاں کوششاں تے تنقید کیتی۔ انہاں بھارت دے بیاناں کوں وڳاڑݨ اتے غلط بیانی قرار ݙیندے آکھیا جو پاکستان آخری واری 1998ء اچ جوہری تجربے کیتے ہن اتے اقوام متحدہ دیاں قرار داداں دی مسلسل حمایت کیتی اے جیںدے اچ جوہری تجربیاں تے عالمی پابندی دا مطالبہ کیتا گیا ہا۔ انہاں پاکستان دے محفوظ اتے مضبوط جوہری کمانڈ اینڈ کنٹرول سسٹم دا مقابلہ حالیہ سالاں اچ جوہری مواد دی چوری اتے غیر قانونی سمگلنگ دے بھارت دے خطرناک ریکارڈ نال کیتا۔ طاہر حسین اندرابی جارجیا-آذربائیجان سرحد دے نیڑے سی 130 طیارے دے المناک حادثے تے ترکیہ دی حکومت اتے عوام دے نال پاکستان دے افسوس کیتے۔ انہاں میڈیا ارکان دا شکریہ ادا کیتا اتے سفارتی رابطیاں، علاقائی سلامتی اتے انسداد دہشت گردی دی پالیسی تے شفاف رابطیاں کیتے پاکستان دے عزم دا پکا ارادہ کیتا۔