پاکستان کرکٹ بورڈ دا پی ایس ایل وچ ݙو نویاں ٹیماں دی شمولیت دا فیصلہ

اسلام آباد۔15نومبر(اے پی پی) پاکستان کرکٹ بورڈ (پی سی بی) پاکستان سپر لیگ (پی ایس ایل) وچ ݙو نویاں ٹیماں دی شمولیت دا فیصلہ کریندیں انہاں ٹیماں کیتے فرنچائز دے حصول کیتے درخواستاں منڳ ڳھدیاں۔ ذرائع موجب ایں ویلھے پی ایس ایل وچ کُل 6 ٹیماں شامل ہن، جیں وچ اسلام آباد یونائیٹڈ، لاہور قلندرز، کراچی کنگز، پشاور زلمی، ملتان سلطان، اتے کوئٹہ گلیڈیئٹرز شامل ہن جݙاں جو ہݨ ݙو نویاں ٹیماں شامل کرݨ دا فیصلہ کیتا ڳئے۔ ایں کیتے پاکستان کرکٹ بورڈ فرنچائز ٹیم رائٹس دے حصول کیتے درخواستاں منڳ ڳھدن، انہاں فرنچائز رائٹس دے حصول کیتے درخواستاں جمع کراوݨ دی چھیکڑی تاریخ 15 دسمبر مقرر کیتی ڳئی اے۔