بانی پی ٹی آئی دے وزیراعظم محمد شہباز شریف تے لاتے ڳئے الزامات کُوڑے ہن، عطاء اللہ تارڑ

لاہور۔15نومبر (اے پی پی) وفاقی وزیر اطلاعات و نشریات عطاء اللہ تارڑ آکھیے جو بانی پی ٹی آئی عمران خان دے وزیراعظم محمد شہباز شریف تے لاتے ڳئے الزامات کُوڑے اتے من گھڑت ہن، بانی پی ٹی آئی دی گھر آلی بشری بی بی حکومتی معاملیں تے اثرانداز تھیندی ہئی اتے “روحانیت دی بنیاد تے فیصلے” کیتے ویندے ہن۔ اے ڳالھ انہاں جوڈیشل کمپلیکس وچ بانی پی ٹی آئی دے خلاف زیر سماعت ہتک عزت کیس دی کارروائی دے بعد میڈیا نال ڳالھ مہاڑ کریندیں آکھی ۔ عطاء اللہ تارڑ آکھیا جو بانی پی ٹی آئی وزیراعظم محمد شہباز شریف تے کُوڑا الزام لاتا ہئی، اڄ میں عدالت پیش تھیا اتے پی ٹی آئی دے وکیل دے سارے سوالاں دا جواب ݙتا۔ عطاء اللہ تارڑ ݙسایا جو وزیراعظم شہباز شریف 2017ء وچ بانی پی ٹی آئی دے خلاف ہتک عزت دا دعویٰ دائر کیتا ہئی، اے دعویٰ اوں ویلھے کیتا ڳیا جݙاں بانی پی ٹی آئی پانامہ کیس واپس گھنݨ کیتے شہباز شریف تے ݙاہ ارب روپے دی پیشکش دا بے بنیاد الزام لاتے۔ وزیراطلاعات آکھیا جو اے کُوڑا دعویٰ اتے من گھڑت پروپیگنڈا اوں ویلھے ملک دے سارے وݙے اخباراں وچ شائع تھیا ہئی، الیکٹرانک میڈیا تے پروگرام وی تھئے ہن لیکن ایں دا حقیقت نال کوئی تعلق نہ ہئی۔ انہاں زور ݙتا جو بانی پی ٹی آئی اے الزام ہر فورم تے دُہرایا حالانکہ انہاں دا پورا نظام کُوڑ، بہتان اتے گمراہ کُن بیانیے دا شکار رہیا۔ عطاء اللہ تارڑ مزید آکھیا جو بانی پی ٹی آئی شہباز شریف دے خلاف الزامات مختلف فورمز تے دُہرائے لیکن اڄ دنیا دے نامور جریدے انہاں الزامات کوں کُوڑ اتے بہتان تے مبنی قرار ݙیندے پئن، 2017 دے دھرنیں دے دوران وی بانی پی ٹی آئی بے بنیاد ڳالھیں کیتیاں۔ انہاں آکھیا جو بانی پی ٹی آئی دے دور وچ جِتنے وی اہم فیصلے تھئے، او روحانیت دا بھیس وٹائے انہاں دی گھر آلی بشری بی بی دی مدد نال کیتے ویندن، معاشی اتے سیاسی ݙوہیں نوعیت دے فیصلیں وچ انہاں دی گھر آلی دا مرکزی کردار ہئی۔ وزیر اطلاعات آکھیا جو ٻاہرلے ملک رہݨ آلے ہک بندے دے خلاف لندن دی عدالت وی فیصلہ ݙتے جیڑھا حقائق دی مزید تصدیق کریندے، ٻاہرلے ملک بہہ تے سیاست کرݨ آلا بندہ فوج تے الزامات لیندا رہیے ، ملک دے مفاد دے خلاف ٻاہرلے ملک ٻہہ تے غلط بیانی اتے پروپیگنڈا کرݨا ٻہوں نقصان ݙیوݨ آلا اے۔ وزیر اطلاعات برطانوی جریدے ‘دی اکانومسٹ’ دی رپورٹ دا حوالہ ݙیندیں آکھیا جو ایں رپورٹ وچ صاف طور تے لکھیا ڳئے جو بانی پی ٹی آئی دی گھر آلی حکومتی معاملیں وچ اثرانداز تھیندی ہئی، روحانیت دی بنیاد تے فیصلے کیتے ویندے اتے انہاں تے عملدرآمد وی تھیندا ہئی۔ انہاں مثال ݙیندیں آکھیا جو سابق وزیراعلیٰ پنجاب عثمان بزدار کوں وی ایویں فیصلیں دے تحت وزارت اعلیٰ دے عہدے تے تعینات کیتا ڳیا، بانی پی ٹی آئی دے دور وچ پورے نظام کوں کُوڑ اتے بہتان دی بنیاد تے چلایا گیا۔ دہشت گردی دے واقعیں اتے سکیورٹی کارروائیاں دے حوالے نال وزیر اطلاعات و نشریات آکھیا جو وانا کیڈٹ کالج وچ 550 توں ودھ طلباء دیاں جاناں بچائیاں ڳئیاں، جیڑھا جو پاک فوج دی بہادری دی علامت اے، فوج دہشت گرداں کوں جہنم واصل کر تے وݙی کارروائی کیتی۔ انہاں اسلام آباد کچہری حملے دے حوالے نال آکھیا جو تحقیقات جاری ہن اتے دہشت گرد ہݨ “سافٹ ٹارگٹس” دی طرف ودھݨ دی کوشش کریندے پئن۔ وزیر اطلاعات سری لنکن ہائی کمشن اتے زمبابوے کرکٹ ٹیم دا شکریہ ادا کیتا اتے زور ݙتا جو کھیݙ اتے امن دیاں سرگرمیاں ہر صورت جاری رہݨیاں چاہیدن۔ آئینی ترامیم اتے عدالتی اصلاحات دے حوالے نال سوال تے عطاء اللہ تارڑ آکھیا جو آئینی ترامیم دے ذریعے فیصلے تھیندن اتے پارلیمنٹ کوں قانون سازی دا پورا اختیار حاصل اے، ججز دیاں ساریاں تعیناتیاں میرٹ تے تھیسن۔ انہاں مزید آکھیا جو ملک وچ آئینی نوعیت دے کیسز سُݨݨ کیتے وَکھرا بینچ یا عدالت قائم تھیوݨ نال عوام کوں فیدہ تھیسی، 27ویں آئینی ترمیم کوں وقتی منظور کرݨ دا الزام درست کائںی، ایں تے کئی سالاں توں ڳالھ تھیندی پئی ہئی، لیکن عملدرآمد نہ تھی سڳیا ہئی۔ وزیر اطلاعات و نشریات آکھیا جو کُوڑے بیانییاں اتے پروپیگنڈے نال ملک کوں ضیان پڄدا پئے اتے حکومت حقائق دی بنیاد تے اڳوں ودھدی پئی اے، پی ٹی آئی دا بیانیہ کجھ ٻاہرلے عناصر خاص کر افغانستان دے پروپیگنڈا نال مِل ویندے جیڑھا پاکستان کیتے خطرناک اے۔