پاکستان دی قومی سلامتی اتے معاشی استحکام دے ایجنڈے وچ ڈیجیٹل ٹرانسفارمیشن بنیادی حیثیت حاصل کرڳھدی اے، وفاقی وزیر شزا فاطمہ خواجہ

اسلام آباد۔16نومبر(اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزا فاطمہ خواجہ آکھیے جو پاکستان دی قومی سلامتی اتے معاشی استحکام دے ایجنڈے وچ ڈیجیٹل ٹرانسفارمیشن بنیادی حیثیت حاصل کر ڳھدی اے۔ جاری بیان موجب شزا فاطمہ خواجہ ڈائریکٹر جنرل آئی ایس ایس آر اے ولوں نیشنل ڈیفنس یونیورسٹی (این ݙی یو)دے انسٹیٹیوٹ فار اسٹریٹجک اسٹڈیز، ریسرچ اینڈ انیالسس (آئی ایس ایس آر اے) وچ منعقدہ 27ویں نیشنل سکیورٹی ورکشاپ (این ایس ݙبلیو) دے شرکاء توں خطاب کیتا۔ اجلاس وچ قومی و صوبائی اسمبلیاں دے ارکان، کاروباری شخصیات، صحافیاں اتے سول سوسائٹی دے نمائندگاں شرکت کیتی۔ وفاقی وزیر پاکستان دی آئی ٹی صلاحیت دے موقع اتے چیلنجز دے موضوع تے ڳالھ مہاڑ کریندیں آکھیا جو پاکستان دا ڈیجیٹل شعبہ ہݨ ملکی اقتصادی سلامتی، اسٹریٹجک مضبوطی اتے عالمی مقابلے کیتے بنیاد بݨ چُکیے۔ وزیراعظم، فیلڈ مارشل، وفاقی کابینہ اتے ایس آئی ایف سی دی مضبوط سپورٹ کوں اُجاگر کریندیں آکھیا جو پاکستان دی قومی سلامتی اتے معاشی استحکام دے ایجنڈے وچ ڈیجیٹل ٹرانسفارمیشن بنیادی حیثیت حاصل کر ڳھدی اے۔ انہاں زور ݙتا جو وفاقی و صوبائی حکومتاں، صنعت، تعلیمی ادارے اتے بین الاقوامی شراکت دار ہک جامع اتے مستقبل دے تقاضیں نال ہم آہنگ ڈیجیٹل نظام دی تشکیل کیتے سانجھے طور تے کم کریندے پئن۔ شزا فاطمہ پاکستان دی ڈیجیٹل تبدیلی دے قومی فریم ورک دی وضاحت کیتی، “ٹیک ڈیسٹی نیشن پاکستان”، جیڑھا آئی ٹی انڈسٹری دی ترقی اتے برآمدات دے ودھارے تے مرکوز اے اتے “ڈیجیٹل نیشن پاکستان”، جیڑھا ڈیجیٹل معیشت، ڈیجیٹل معاشرہ اتے ڈیجیٹل گورننس تے مشتمل اے۔ انہاں ݙوہیں ستوناں دی مدد کیتے ٹیلی کام، سائبر سکیورٹی اتے مصنوعی ذہانت دے ترائے ہمہ گیر شعبے کم کریندے پئن۔ انہاں پاکستان دے تکڑے تھیندے ڈیجیٹل ایکو سسٹم دا ذکر کیتا، جیں وچ 43 سافٹ ویئر ٹیکنالوجی پارکس، ری پرپزڈ مالز وچ قائم 400 توں ودھ ٹیک کمپنیاں، اتے 85 انکیوبیٹرز دا ملک گیرنیٹ ورک شامل اے۔ اسٹارٹ اپ ایکو سسٹم نمایاں ترقی کیتی اے، جیں وچ 4,100 توں ودھ اسٹارٹ اپس دی مدد، 8 نیشنل انکیوبیشن سینٹرز، 2 سیگا سینٹرز، اتے امریکہ، برطانیہ، کینیڈا، یو اے ای، سعودی عرب، آذربائیجان، جرمنی اتے اردن وچ مضبوط عالمی نمائندگی شامل اے۔