برداشت دے رویں کوں ودھاوݨ توں بغیر معاشرتی ہم آہنگی ممکن کائنی، سید یوسف رضا گیلانی

اسلام آباد۔16نومبر(اے پی پی) چیئرمین سینیٹ سید یوسف رضا گیلانی آکھیے جو برداشت اتے تحمل ایہو جیھے وصف ہن جیڑھے ہر معاشرے کوں امن اتے استحکام دا رستہ ݙکھیندن، برداشت دے رویں کوں ودھاوݨ توں بغیر معاشرتی ہم آہنگی ممکن کائنی۔ عالمی یومِ برداشت دے موقع تے اپݨے خصوصی پیغام وچ چیئرمین سینیٹ آکھیا جو مؤثر ڳالھ مہاڑ اتے آپت دے احترام مضبوط جمہوری روایتاں دی بنیاد ہن اتے پارلیمان قومی وحدت، برداشت اتے سماجی ہم آہنگی دے ودھارے وچ اپݨا کردار پوری ذمہ واری نال ادا کریندی پئی اے۔ انہاں آکھیا جو انتہا پسندی، عدم برداشت اتے نفرت انگیز ڳالھیں دے خلاف سارے طبقیں کوں سانجھے طور تے رَل تے کھڑا تھیوݨا ہوسی تاں جو ملک وچ پائیدار امن اتے استحکام کوں یقینی بݨایا ونڄ سڳے۔ سید یوسف رضا گیلانی آکھیا جو سلامتی، ترقی اتے خوشحالی کیتے معاشرے وچ رواداری اتے احترام دے رویّں کوں مضبوط کرݨا ٻہوں ضروری اے جݙاں جو عدم برداشت معاشرتی ونڈ اتے قومی یکجہتی کوں شدید نقصان پڄیندی اے۔ انہاں آکھیا جو نینگراں وچ برداشت، بردباری اتے مثبت سوچ کوں اُجاگر کرݨ ساݙی سانجھی ذمہ واری اے کیوں جو اے ہی طبقے مستقبل دی قیادت سنبھلیندن۔ انہاں آکھیا جو اسلام انسانیت، امن، تحمل اتے آپت دے احترام دا پیغام ݙیندے، ایں پاروں معاشرتی اقداراں وچ رواداری کوں مرکزی حیثیت ݙیوݨ ویلھے دی اہم لوڑھ اے۔ چیئرمین سینیٹ سید یوسف رضا گیلانی آکھیا جو برداشت اتے بھرپی دے ودھارے نال اساں ہک مضبوط، پُرامن اتے ترقی یافتہ پاکستان دی بنیاد رکھ سڳدوں۔