نائب وزیراعظم تے وزیر خارجہ سینیٹر اسحاق ڈار ایس سی او کونسل آف ہیڈز آف گورنمنٹ اجلاس اچ پاکستانی وفد دی قیادت کریسن

اسلام آباد۔17نومبر (اے پی پی) نائب وزیراعظم تے وزیر خارجہ سینیٹر محمد اسحاق ڈار روس دے وزیرِ اعظم میخائل میشوستن دی دعوت تے 17 توں 18 نومبر 2025 کوں ماسکو، روس اچ تھیوݨ آلے شنگھائی تعاون تنظیم (ایس سی او) دے کونسل آف ہیڈز آف گورنمنٹ (CHG) دے اجلاس اچ پاکستان دے وفد دی قیادت کریسن۔ سنوار کوں دفتر خارجہ توں جاری بیان موجب ایں اجلاس اچ بیلاروس، چین، قازقستان، کرغزستان، روس، تاجکستان اتے ازبکستان دے سربراہانِ حکومت، ایران دے نائب صدر، اتے پاکستان تے بھارت دے وزرائے خارجہ شامل تھیسن۔ ایس سی او دے رکن ملکاں توں علاوہ، منگولیا، بحرین، مصر، قطر، کویت اتے ترکمانستان دے سربراہانِ حکومت، نال ای دولتِ مشترکہ برائے آزاد ریاستیں (CIS)، یوریشین اکنامک یونین (EAEU)، کلیکٹیو سکیورٹی ٹریٹی آرگنائزیشن (CSTO) اتے ڈیموکریٹک سوشلسٹس آف امریکا (DSA) سودھے بین الاقوامی تے علاقائی تنظیماں دے سربراہان وی اجلاس اچ شرکت کریسن۔ نائب وزیرِ اعظم آپݨے خطاب اچ اہم علاقائی تے عالمی معاملیاں تے پاکستان دا مؤقف پیش کریسن اتے ایس سی او خطے دے فائدے کیتے تنظیم کوں ٻیا مضبوط بݨاوݨ دے طریقیاں تے روشنی پیسن۔ کونسل آف ہیڈز آف گورنمنٹ، ایس سی او دا ݙوجھا وݙا فیصلہ ساز ادارہ اے جیڑھا اقتصادیات، مالیات، تجارت، رابطہ سازی، آپسی تجارت، سماجی تے اقتصادی تعاون اتے تنظیم دے بجٹ نال متعلق معاملیاں اچ رہنمائی ݙیندے۔ کونسل آف ہیڈز آف گورنمنٹ اجلاس اچ سانجھے اعلامیہ، بیانات اتے اہم فیصلیاں دی منظوری ݙتی ویندی اے۔ نائب وزیرِ اعظم تے وزیرِ خارجہ، اجلاس دے موقع تے ݙوجھے ایس سی او ملکاں دی قیادت نال ݙو پاسہ ملاقاتاں وی کریسن۔