وفاقی وزیر داخلہ محسن نقوی نال قائم مقام امریکی سفیر نیٹلی بیکر دی ملاقات

اسلام آباد۔18نومبر (اے پی پی) وفاقی وزیر داخلہ محسن نقوی نال قائم مقام امریکی سفیر نیٹلی بیکر دی ملاقات تھئی۔ قائم مقام امریکی سفیر نیٹلی بیکر اسلام آباد کچہری دے نیڑے خودکش دھماکے دی مذمت کیتی اتے دھماکے پاروں مرݨ آلے بندیاں دے لواحقین نال ہمدردی دا اظہار کیتا۔ وزارت داخلہ توں جاری بیان دے مطابق قائم مقام امریکی سفیر نیٹلی بیکر دہشت گردی دے خلاف جنگ اچ پاکستان دی قربانیاں کوں خراج عقیدت پیش کیتا۔ وفاقی وزیر داخلہ محسن نقوی قائم مقام امریکی سفیر نیٹلی بیکر نال گالھ مہاڑ کریندیں ہوئیں آکھیا جو دہشت گرد عدالت کوں نشانہ بݨاوݨ چاہندا ہا، سکیورٹی دی وجہ توں اندر نہ ونڄ سڳیا۔ حملے نال جُڑے سارے کردار ٹریس تھی ڳئن جݙاں جو سہولت کار وی گرفتار ہن۔ انہاں آکھیا جو افسوسناک واقعے دی ہر پہلو توں تحقیقات جاری ہن۔ وفاقی وزیر داخلہ محسن نقوی آکھیا جو مذاکرات اتے دہشت گردانہ حملے ہک نال نئیں چل سڳدے۔ انہاں آکھیا جو پاکستان اتے امریکہ دے تعلقات دوستی اتے آپسی اعتماد تے مبنی ہن۔ قائم مقام امریکی سفیر نیٹلی بیکر پاکستان دی انسداد دہشت گردی کوششاں دی تعریف کیتی۔ آئی جی اسلام آباد پولیس اتے ݙوجھے حکام وی ایں موقع تے موجود ہن۔