وزیراعظم شہباز شریف دی زیر صدارت اجلاس، آوݨ آلے سال مون سون اچ کہیں وی جانی تے مالی نقصان توں بچݨ کیتے ہݨ توں تیاری دی ہدایت

اسلام آباد۔ 19 نومبر (اے پی پی) وزیراعظم محمد شہباز شریف آوݨ آلے سال مون سون اچ کہیں وی جانی تے مالی نقصان توں بچݨ کیتے ہݨ توں تیاری دی ہدایت کریندیں ہوئیں آکھیا جو وزارت موسمیاتی تبدیلی، وزارت منصوبہ بندی اتے نیشنل ڈیزاسٹر منیجمنٹ اتھارٹی (این ڈی ایم اے) صوبائی حکومتاں دے نال رَل تے موسمیاتی تبدیلی دے حوالے نال رَلوی منصوبہ بندی کرن ۔ وزیراعظم آفس دے میڈیا ونگ ولوں جاری بیان موجب، وزیراعظم محمد شہباز شریف دی زیر صدارت موسمیاتی تبدیلیاں دے اثرات توں بچاؤ دی حکومتی حکمت عملی تے جائزہ اجلاس بدھ کوں تھیا ۔ وزیراعظم اجلاس اچ ہدایت کیتی جو آوݨ آلے سال مون سون دے نقصانات توں بچݨ کیتے ہݨ توں تیاری کیتی ونڄے، وزارت موسمیاتی تبدیلی، وزارت منصوبہ بندی اتے این ڈی ایم اے صوبائی حکومتاں دے نال رَل تے موسمیاتی تبدیلی دے حوالے نال رَلوی منصوبہ بندی کرن ۔ انہاں پاݨی دے چنڳے انتظام دے حوالے نال قومی سطح تے منصوبہ بندی کیتے نیشنل واٹر کونسل دا اجلاس منعقد کرݨ دی تیاری دی وی ہدایت کیتی ۔ وزیراعظم حکم ݙتا جو پیش کیتے گئے گھٹ مدت دے منصوبے تے فوری عملدرآمد شروع کیتا ونڄے ۔ انہاں آکھیا جو پاکستان ترقی پذیر مُلک اے، ہر تریجھے سال موسمیاتی تبدیلی دے اثرات تے جی ڈی پی دا خاطر خواہ حصہ خرچ کرݨا پوندے اتے قیمتی تے محدود وسائل ترقی دی بجائے موسمیاتی تبدیلی دے بھیڑے اثرات توں بچاؤ کیتے استعمال تھیندن۔ وزیراعظم آکھیا جو پاکستان، جئیں دا موسمیاتی تبدیلی اچ کردار نہ ہووݨ دے برابر اے، موسمیاتی تبدیلی دے بھیڑے اثرات دی ولھیٹ اچ اے۔ اجلاس اچ وفاقی وزراء احسن اقبال، احد خان چیمہ، محمد اورنگزیب، ڈاکٹر مصدق ملک، عطا اللہ تارڑ اتے متعلقہ اُچے حکام شرکت کیتی ۔ اجلاس کوں آوݨ آلے سال مون سون دے حوالے نال اشاریاں دے عالمی تخمینیاں تے بریفنگ ݙتی گئی ۔ اجلاس کوں وزارت موسمیاتی تبدیلی ولوں گھٹ، درمیانی اتے ودھ مدت دے منصوبیاں تے بریفنگ ݙتی گئی ۔ وزیراعظم گھٹ مدت دے منصوبے دی منظوری ݙیندیں ہوئیں فوری عملدرآمد شروع کرݨ دی ہدایت کیتی اے۔