وفاقی حکومت شارٹ ٹرم منصوبے دے تحت ملک بھر اچ آفات بارے سارے ابتدائی وارننگ سسٹمز کوں ضلعی تے تحصیل سطح تے مربوط کریسی، وفاقی وزیر ڈاکٹر مصدق ملک دی چیئرمین این ڈی ایم اے لیفٹیننٹ جنرل انعام حیدر ملک نال پریس کانفرنس

اسلام آباد۔ 19 نومبر (اے پی پی) وفاقی وزیر برائے موسمیاتی تبدیلی تے ماحولیاتی ہم آہنگی ڈاکٹر مصدق ملک آکھیا جو وفاقی حکومت صوبائی حکام دے نال رَل تے 250 ݙینہہ دے شارٹ ٹرم منصوبے دے تحت ملک بھر اچ آفات بارے سارے ابتدائی وارننگ سسٹمز کوں ضلعی اتے تحصیل سطح تے مربوط کریسی تاں جو سیلاب توں پہلے ویلھے سر لوکاں کوں باہر کڈھݨ اتے جائیداداں کوں محفوظ منتقل کرݨ ممکن بݨایا ونڄ سگے ، کوشش اے جو آوݨ آلے مون سون اچ ایہو جیہا نقصان نہ تھیوے جیہڑا ایں سال تھیے، وزیراعظم ارلی وارننگ سسٹم کوں فوری طور تے رَلاوݨ دی ہدایت کیتی اے، ودھ مدت دی حکمت عملی دے تحت پنج سال اچ موسمیاتی مطابقت رکھݨ آلا انفراسٹرکچر تیار کرݨے۔ اے ڳالھیں انہاں بدھ کوں ایتھاں چیئرمین این ڈی ایم اے لیفٹیننٹ جنرل انعام حیدر ملک دے نال پریس کانفرنس نال خطاب کریندیں ہوئیں کیتی۔ پریس کانفرنس نال خطاب کریندیں ہوئیں وفاقی وزیر آکھیا جو رَلیا ہویا نظام مقامی انتظامیہ کوں بہوں اہم ویلھے اتے ویلھے سر ردعمل ݙیوݨ دے قابل بݨیسی جئیں نال آوݨ آلے مون سون دے دوران نقصانات اچ نمایاں ڳھٹکی تھیسی۔ وفاقی وزیر ݙسیا جو وزیراعظم محمد شہباز شریف آپݨی زیر صدارت تھیوݨ آلے اُچی سطح دے اجلاس اچ دریا، سیلاب، پہاڑی ریلے، شہری سیلاب اتے ساحلی علاقیاں دے خطرات سودھا سارے موسمیاتی خطرات دا جائزہ گھدا اتے گھٹ، درمیانی اتے ودھ مدت دے اقدامات تے مشتمل ہک قومی لچکدار روڈ میپ دی منظوری ݙتی اے۔ غیر قانونی تجاوزات بارے سوال دے جواب اچ انہاں آکھیا جو وزیراعظم دریاواں دے کنارے تے بااثر گروپاں ولوں بݨوائے ڳئے ہوٹلاں اتے ریزورٹس دے خلاف سخت کارروائی دی ہدایت کیتی اے اتے زوننگ قوانین دے خلاف عمارتاں دی اجازت ݙیوݨ آلے لوکاں توں پچھ گچھ دا وی حکم ݙتے، ودھ مدت دے منصوبے اچ حکومت دا ہدف دریاواں دے قدرتی وگاؤ دی بحالی، خطرے دے زونز اچ بݨائی آبادیاں دی نشاندہی، اُچے خطرات آلے علاقیاں اچ نویں عمارتاں دی روک تھام اتے موجودہ وستیاں دے تحفظ کوں یقینی بݨاوݨ اے۔ انہاں آکھیا جو حکومت آپݨی پوری موسمیاتی حکمت عملی عوام دے سامݨے گھن آسی اتے شہریاں کوں جوابدہی کیتے سوال پچھݨ دی ترغیب ݙیسی ۔ انہاں آکھیا جو اساݙے ٻال قربان تھیوݨ دے قابل نئی ، اساں انہاں کوں ایہو جیہا مستقبل ݙیوݨے جتھ آفات ولا ولا سارا کجھ نہ وھا ونڄن ۔ پریس کانفرنس توں خطاب کریندیں ہوئیں چیئرمین این ڈی ایم اے لیفٹیننٹ جنرل انعام حیدر ملک آکھیا جو 2026 توں پہلے نظام مون سون دا نظام بݨاوݨا اے، ہر سال پاکستان اچ موسمی شدت ودھدی پئی اے، گلگت بلتستان اچ ودھ برف پوسی ، 2026 اچ مون سون 22 توں 26 فیصد زیادہ شدید تھی سڳدے۔ انہاں آکھیا جو 31 لکھ لوکاں کوں سیلاب اچ ریسکیو کیتا گئے، ایں کیتے معاشی وزن کوں صوبیاں اتے وفاق رَل تے برداشت کیتے، جون دے بعد ہیٹ ویوو دی وجہ نال گلیشئیرز دے تیزی نال پگھلݨ دا امکان اے۔ چیئرمین این ڈی ایم اے آکھیا جو پاکستان دی عمومی صورتحال اتے 6 توں 8 مہینے دی پیش گوئی ݙیوݨ اے شاید دنیا اچ صرف این ڈی ایم اے کریندا پئے۔ انہاں آکھیا جو سموگ دا مسئلہ اسلام آباد سودھا بہوں سارے علاقیاں اچ ودھدا ویندے، ایں اچ 45 فیصد حصہ ٹرانسپورٹ دا اے جݙاں جو 20 توں 30 فیصد صنعت دا حصہ اے۔