فلاحی و خیراتی سرگرمیاں کوں رَلّاوݨ اچ حکومت، نجی شعبہ اتے سول سوسائٹی کوں آپݨا کردار ادا کرݨا چاہیدے، وزیر خزانہ محمد اورنگزیب

اسلام آباد۔ 19 نومبر(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو فلاحی و خیراتی سرگرمیاں کوں رَلّاوݨ اچ حکومت، نجی شعبہ اتے سول سوسائٹی کوں آپݨا کردار ادا کرݨا چاہیدے، وزیراعظم ولوں سوشل امپیکٹ فنانسنگ فریم ورک بݨاوݨ دا بنیادی مقصد اثر پذیری تے مبنی مالیاتی فریم ورک دا قیام اے۔ او پاکستان سینٹر فار فیلنتھراپی ولوں رپورٹ دے اجراء اتے ایوارڈز ونݙݨ دی تقریب نال خطاب کریندے پئے ہن۔ وزیر خزانہ آکھیا جو حکومت دے اقدامات نال معیشت سِیدھی سمت اچ ویندی پئی اے، کُلی معیشت دی صورتحال مستحکم اے اتے ہݨ برآمدات تے مبنی پائیدار ترقی دے رستے تے ہیں، ترقی دے فائیدے عوام کوں ݙیوݨ ضروری اے، ایں سانڳے اصلاحات دا عمل جاری ہے۔ وزیر خزانہ آکھیا جو پاکستان اچ مخیر حضرات دی کمی کائنی، پاکستان عطیات ݙیوݨ آلے سرفہرست مُلکاں اچ شامل اے، کراچی خاص طور تے ایں حوالے نال اڳو اے، اے گالھ وی خوش آئند اے جو صحت اتے تعلیم دے شعبیاں کوں اڳوں ودھاوݨ اچ مخیر حضرات اتے ادارے آپݨا کردار ادا کریندے پئن۔ وزیر خزانہ آکھیا جو 400 توں زیادہ لِسٹ کیتاں ڳئیاں کمپنیاں اچوں 300 توں زیادہ کمپنیاں کارپوریٹ سماجی ذمہ داری دے تحت آپݨیاں فلاحی ذمہ داریاں ادا کیتن، اے دِین اتے دنیا ݙوہیں کیتے چنڳاں اے، کارپوریٹ سماجی ذمہ داریاں دی ادائیگی کیتے کمپنیاں کوں آپݨا کردار چنڳے طریقے نال ادا کرݨا چاہیدے اتے ایں کیتے کہیں ہدایت یا ضابطے دا انتظار نی کرݨا چاہیدا۔ انہاں ایوارڈز جیتݨ آلے لوکاں اتے اداریاں کوں مبارکباد ݙتی اتے آکھیا جو سماجی سرگرمیاں کوں اڳوں ودھاوݨ اچ سارے شراکت داراں کوں آپݨا کردار ادا کرݨا چاہیدے۔ وزیر خزانہ آکھیا جو فلاحی اتے خیراتی مقاصد کیتے اقدامات و سرگرمیاں تے ٹیکس دے حوالے نال حکومت ہر قسم دے تعاون کوں تیار اے