معاشرے اچ تحمل و برداشت دی ریت ودھاوݨ دی لوڑھ اے، نبی کریم ﷺ دا اسوہ حسنہ اساݙے کیتے وݙا سرمایہ حیات اے، وزیراعظم دا برداشت دے عالمی ݙینہہ سانڳے تقریب نال خطاب

اسلام آباد۔ 19 نومبر(اے پی پی)وزیراعظم محمد شہباز شریف معاشرے اچ تحمل اتے برداشت دی ریت ودھاوݨ تے زور ݙیندے آکھیے جو نبی کریم ﷺ دا اسوہ حسنہ اساݙے کیتے ٻہوں وݙا سرمایہ حیات اے، برداشت اتے رواداری قیام پاکستان دی بنیاد اے۔ اے ڳالھ انہاں اسلام آباد اچ برداشت دے عالمی ݙینہہ سانڳے تقریب نال خطاب اچ آکھی۔ تقریب اچ وفاقی وزراء، ارکان پارلیمنٹ اتے ٻیاں ممتاز شخصیات وی موجود ہن۔ وزیراعظم آکھیا جو برداشت اتے رواداری دے حوالے نال تقریب وݙی چنڳی ڳالھ اے، قائد اعظم دی عظیم قیادت اچ لکھاں مسلماناں دیاں قربانیاں نال پاکستان وجود اچ آیا، تحریک آزادی اچ عوام، وکلاء، ڈاکٹرز، انجینئرز، علماء اتے اقلیتاں سودھا زندگی دے ہر طبقے دے لوک شامل ہن، قیام پاکستان توں ترائے ݙینہہ پہلے 11 اگست کوں قائد اعظم دی تقریر اچ او فلسفہ بیان کر ݙتا گیا ہا جو اساں ہک ایہو جھیاں پاکستان بݨیسوں جتھاں بردباری، تحمل اتے برداشت کوں ودھارا ملسی، سارے مذہباں دے منݨ آلے کوں آپݨے مذہبی عقیدیاں موجب عبادت دی پوری آزادی ہوسی اتے اساں آپس اچ ہم آہنگی اتے برداشت ودھیسوں۔ وزیراعظم آکھیا جو ایں حوالے نال نبی کریم ﷺ دا اسوہ حسنہ اساݙے کیتے ہک وݙا سرمایہ حیات اے، طائف اچ مخالفین پتھر سٹیے ٻھل جواب اچ نبی کریم ﷺ جیہڑا ارشاد فرمایا او قیامت تئیں محفوظ رہ ویسی، اے او سنیہا اے جیندے نال تحمل اتے برداشت ودھدے، نبی پاک ﷺ برداشت اتے رواداری دا مکمل پیکر ہن، انہاں دیاں تعلیمات امن اتے بھائی چارے آلیاں ہین، صلح حدیبیہ وی ایہو جھیں ہک عظیم مثال اے، جݙاں مکہ فتح تھیا تاں حضور اکرم ﷺ دے بدترین مخالفین وی آہدے پئے ہن جو واقعی تساں اللہ دے سچے نبی ہو، ساݙے توں غلطی تھئی اے، تحمل، برداشت، بھائی چارے اتے آپسی تعلقات کوں ودھاوݨ دا اے سنیہا اتنا تکڑا اے جیڑھا ساݙی سوچ اتے ساݙا سرداری نظام ایںدے سامݨے کڄھ وی نئیں۔ وزیراعظم آکھیا جو اڄ او ویلھا ول آقئے جو اساں اسلامی تعلیمات کوں اڳو تے ٹوروں، سارے مذہب اتے حضرت عیسیٰ علیہ السلام دیاں تعلیمات امن، بھائی چارے اتے آپسی تعلقات کوں ودھاوݨ دا درس ݙیندن۔ انہاں آکھیا جو تحمل اتے برداشت دیاں قدراں کوں جے اساں ودھارا ݙیوں تاں پاکستان دا معاشرہ ول آپݨے پیراں تے کھڑا تھی ویسی، اللہ تعالیٰ پاکستان کوں ہک عظیم ملک بݨاوے جیندے اچ سارے مکاتب فکر اتے سارے مذہباں دے لوک امن اتے چین دی زندگی گزارن، آؤ اڄ اساں ایںدا عہد کروں اتے عملی میدان اچ عملی ثبوت وی ݙیوں