بھارتی میڈیا کُوڑ اتے فریبی خبراں بݨاوݨ دا ماہر، سابق وزیر اعظم آزاد کشمیر دے بیان کوں سیاق و سباق توں ہٹا تے پیش کیتا ڳئے، وزارت اطلاعات و نشریات

اسلام آباد۔ 20 نومبر(اے پی پی)بھارتی میڈیا کُوڑ اتے فریبی خبراں بݨاوݨ دا ماہر اے، سابق وزیر اعظم آزاد جموں و کشمیر دا بیان سیاق و سباق توں ہٹا تے پیش کیتا ڳئے۔ وزارت اطلاعات و نشریات ہک واری ول گودی میڈیا دے کُوڑے دعویاں اتے پروپیگنڈا مہم دا پردہ چا ݙتے۔ سابق وزیر اعظم چوہدری انوار الحق آزاد کشمیر اسمبلی اچ خطاب اچ آپݨے دور حکومت دا ݙسایا جیڑھا سارے چینلز تے نشر تھیا ہا۔ چوہدری انوار الحق آپݨی تقریر اچ بھارت دی بلوچستان اچ دہشت گرد پراکسیز کوں سخت اتے مؤثر جواب ݙیوݨ دی پالیسی دا حوالہ ݙتے۔ چوہدری انوار الحق یاد ݙیوایا جو ول معرکہ حق اچ پاک فوج بھارت دے خلاف مؤثر کارروائی کیتی ہئی۔ تقریر اچ چوہدری انوار الحق معرکہ حق دے دوران بھارت دی عبرتناک شکست دے حوالے نال وی گالھ کیتی اے۔ چوہدری انوار الحق تقریر اچ آکھیا جو اساݙیاں مسلح افواج (معرکہ حق ویلھے) اندرو وڑ تے ماریا اتے ایویں ماریا جو اڄ تئیں ایںدے طیاریاں) دی ڳݨتری پوری نئیں تھی سڳی۔ بھارتی گودی میڈیا سابق وزیراعظم آزاد کشمیر دے بیان کوں سیاق و سباق توں ہٹا تے پیش کرݨ شروع کر ݙتے۔ بھارتی خفیہ ایجنسی ’’را‘‘ نال جُڑے ہوئے سوشل میڈیا پلیٹ فارمز وی پروپیگنڈا کر تے بھارتی سازش دا بھرپور ساتھ ݙتے۔ اندرونی واقعیاں تے بیرونی ہتھ دے ملوث تھیوݨ دا الزام اتے فالس فلیگ دے ذریعے جنگ دا جواز پیدا کرݨ بھارتی گودی میڈیا دا وطیرہ اے۔ بھارتی میڈیا مسلسل نویں دہلی دھماکے کوں ثبوت دے بغیر پاکستان نال جوڑݨ دی کوشش کریندا پئے۔ گودی میڈیا سابق وزیراعظم آزاد جموں و کشمیر دی تقریر دے حوالے نال کُوڑے دعوے اچ آکھیا جو آزاد جموں و کشمیر دے سابق وزیر اعظم من ڳھدے جو حالیہ دہلی دھماکے دی منصوبہ بندی پاکستان کیتی ہئی۔ گودی میڈیا سابق وزیراعظم آزاد کشمیر دی تقریر دے لفظاں دا غلط ترجمہ کریندے ہوئیں لکھیے جو ہندوستان “لاشاں کوں ڳݨ نا سڳسی”۔ وزارت اطلاعات و نشریات آکھیے جو حقیقت اچ سابق وزیراعظم آزاد کشمیر دی تقریر توں کڄھ ٹکڑے ویڈیو دی شکل اچ چاتے ڳئن، سابق وزیراعظم آزاد کشمیر دی تقریر توں گھدے ڳئے جملے دا دہلی دھماکے نال کوئی تعلق کائنی، سابق وزیراعظم آزاد کشمیر دی تقریر اچ معرکہ حق دا حوالہ ݙتا ڳیا ہا نہ جو بھارت دے اندرو کہیں حالیہ واقعے دا حوالہ ݙتا ڳیا ہا، وزارت اطلاعات و نشریات آکھیا جو کٹّے ڳئے کلپ اچ ہک متبادل لفظ جملے دے معنی کوں بالکل بدل ݙتے۔ بھارت دے حکومتی حکام جیندے اچ اجیت دوول وی شامل اے، کئی موقعیاں تے بھارت اچ ممکنہ واقعیاں کوں بلوچستان اچ انتقامی کارروائیاں نال جوڑݨ دی کوشش کیتی اے۔ اُچے بھارتی حکام ولوں پاکستان اچ دہشت گرد کارروائیاں اچ پراکسیز دے استعمال دا کھلے عام اظہار وی کیتا ویندے۔ بھارتی گودی میڈیا ولوں من گھڑت اتے حقائق دے خلاف بیان اندرونی خلفشار کوں دباوݨ دی ہک مذموم کوشش اے۔ وزارت اطلاعات و نشریات ولوں بھارتی گمراہ کُن پروپیگنڈا دے حوالے نال عوام کوں خبردار کیتا ڳئے اتے آکھیا جو کٹّے ڳئے کلپس توں نتیجہ کڈھݨ توں پہلے پوری تقریراں دے متن دی تصدیق کرن اے۔ غیر تصدیق شدہ ویڈیو تے موجود غلط ترجمہ اتے سنسنی خیز ٹیلی ویژن سب ٹائٹلز توں ہوشیار رہݨے۔ تاریخی یا سیاسی بیان بازی کوں آپریشنل اعترافات دے طور تے پیش کرݨ توں پرہیز کیتا ونڄݨا چاہیدے، سکیورٹی بارے وݙے دعویاں کوں قبول کرݨ توں پہلے میڈیا توں شفاف ذریعاں دا مطالبہ کرݨا چاہیدے۔