نائب وزیراعظم اسحاق ݙار دی نیٹو دے سیکرٹری جنرل مارک روٹے نال ملاقات

برسلز۔ 20 نومبر(اے پی پی) نائب وزیراعظم و وزیر خارجہ سینیٹر محمد اسحاق ݙار نیٹو دے سیکرٹری جنرل مارک روٹے نال ملین اتے پاکستان اتے نیٹو وچال ݙو طرفہ تعاون، علاقائی و عالمی صورتحال اتے آپس دے دلچسپی دے اہم معاملیاں تے ڳالھ مہاڑ کیتی۔ ݙوہیں فریقاں امن و سلامتی، دہشت گردی دے خلاف کوششاں، موسمیاتی تبدیلی اتے سامݨے آوݨ آلے چیلنجز تے تھیوݨ آلی پیش رفت دا تفصیلی جائزہ گھدا۔ خمیس کوں دفتر خارجہ توں جاری بیان دے مطابق، نیٹو دے سیکرٹری جنرل مارک روٹے علاقائی امن و استحکام کیتے پاکستان دے کردار دی تعریف کریندے دہشت گردی دے خلاف پاکستان دیاں قربانیاں اتے کوششاں دا اعتراف کیتا۔ انہاں آکھیا جو پاکستان عالمی اتے علاقائی امن کیتے اہم کردار ادا کیتا اے۔ نائب وزیراعظم و وزیر خارجہ اسحاق ݙار ایں موقع تے جنوبی ایشیا اچ امن و استحکام ودھاوݨ کیتے پاکستان دے عزم کوں دوہرایا اتے آکھیا جو پُرامن ماحول کیتے تعمیری ڈائیلاگ اتے شراکت داری لازمی اے۔ انہاں واضح کیتا جو پاکستان کوں سامݨے آوݨ آلے ٻہوں سارے دہشت گردی دے خطرے سرحد پار توں مدد اتے سرپرستی دی وجہ توں پیدا تھیندے پئن، جیںدا تدارک کرݨ کیتے حکومت پاکستان موثر اقدامات کریندی پئی اے۔ ݙوہیں فریقاں پاکستان اتے نیٹو وچال آپس دے مفاد تے مبنی شراکت داری کوں مزید مضبوط بݨاوݨ، سانجھے چیلنجز نال نبڑݨ اتے علاقائی و عالمی امن و استحکام ودھاوݨ کیتے نیڑے دا رابطہ اتے تعاون جاری رکھݨ دا عزم دوہرایا۔