معاشی ترقی، روزگار ݙیوݨ اتے آمدن اچ وادھا صنعتی ترقی توں بغیر ممکن کائنی، محمد شہباز شریف

اسلام آباد۔ 21 نومبر(اے پی پی)وزیراعظم محمد شہباز شریف صنعتی ترقی دے حوالے نال ورکنگ گروپ دیاں سفارشات دی تعریف کریندے ہوئیں آکھیے جو معاشی ترقی، روزگار ݙیوݨ اتے آمدن اچ وادھا صنعتی ترقی دے بغیر ممکن کائنی۔ اے ڳالھ انہاں جمعہ کوں اپݨی صدارت اچ ملکی صنعتی ترقی تے نجی شعبے دی بݨائی گئی کمیٹی دے پہلے جائزہ اجلاس اچ کیتی۔ وزیراعظم آفس دے میڈیا ونگ دے جاری بیان موجب، اجلاس اچ وفاقی وزراء احسن اقبال، جام کمال خان، احد خان چیمہ، علی پرویز ملک، وزیراعظم دے مشیر محمد علی، وزیر مملکت بلال اظہر کیانی، معاون خصوصی ہارون اختر اتے ثاقب شیرازی دی قیادت اچ صنعتی ورکنگ گروپ اچ شامل صنعتکاراں شرکت کیتی۔ اجلاس اچ صنعتی ترقی دے حوالے نال سفارشات پیش کیتیاں گئن، جیندی وزیراعظم تعریف کریندے آکھیا جو ملکی معاشی ترقی، روزگار ݙیوݨ اتے آمدن اچ وادھا صنعتی ترقی توں بغیر ممکن کائنی۔ کاروبار اچ آسانی اتے سرمایہ کاری اچ وادھے کیتے اقدامات حکومت دی پہلی ترجیح ہن، ملکی صنعتی ترقی کیتے نجی شعبے دیاں تجویزاں کلیدی اہمیت رکھیندن۔ وزیراعظم کاروباری برادری ولوں صنعتی ترقی کیتے محنت نال تیار کیتیاں ڳئیاں تجویزاں کوں قابل تعریف قرار ڈیندے ہوئیں آکھیا جو انہاں تجویزاں دا غور نال جائزہ گھنݨ توں بعد عملدرآمد کیتے لائحہ عمل تیار کیتا ویسی۔ وزیراعظم آکھیا جو پاکستانی کاروباری برادری مشکل ویلھے اچ حکومتی پالیسیاں دا ساتھ ݙتا اتے ملک کوں معاشی بحراناں توں کݙھݨ اچ مدد کیتی اے۔ اللہ دے فضل و کرم نال ملک دی معاشی سمت بہتر اے اتے ملک ترقی دو ویندا پئے، ٻھل ملکی ترقی کیتے ساکوں ودھ محنت کرݨی ہوسی۔ اجلاس کوں پاکستان دی صنعتی ترقی اتے ملک اچ سرمایہ کاری اچ وادھے کیتے پالیسی تجویزاں پیش کیتیاں گئیاں۔ اجلاس اچ ملکی صنعت دی مسابقت ودھاوݨ کیتے خطے دے ملکاں نال مقابلہ وی پیش کیتا گیا۔ وزیراعظم انہاں تجویزاں دی تعریف کریندے ہوئیں معیشت دے ٻئے شعبیاں دے حوالے نال سفارشات دے نال انہاں تجویزاں کوں رلا تے قومی پالیسی فریم ورک اچ شامل کرݨ اتے متعلقہ حکام کوں انہاں تے عملدرآمد کیتے تفصیلی جائزے دی ہدایت کیتی۔