ڈیجیٹل میڈیا ذرائع ابلاغ دا تیز ترین فورم بݨ ڳئےِ، پاکستان دا میڈیا منظر نامہ مثبت رُخ اچ تیز رفتار نال ترقی کریندا پئےِ، عطاء اللہ تارڑ

باکو۔ 21 نومبر (اے پی پی) وفاقی وزیر اطلاعات تے نشریات عطاء اللہ تارڑ آکھیا جو ڈیجیٹل میڈیا ذرائع ابلاغ دا تیز ترین فورم بݨ ڳئے، پاکستان دا میڈیا منظر نامہ مثبت رُخ اچ تیکھی رفتار نال ترقی کریندا پئےِ، حکومت ویلھے سر اتے مؤثر ابلاغ کیتے قومی نشریاتی اداریاں کوں مضبوط ٻݨیندی پئی اے، نویں نسل خاص طور تے جنریشن زی کوں میڈیا لٹریسی اتے درست معلومات دی تعلیم ݙیوݨ ویلھے دی لوڑھ اے۔ جمعہ کوں اتھ باکو ا ڈی ایٹ میڈیا فورم توں خطاب اچ وفاقی وزیر اطلاعات آذربائیجان دی حکومت اتے صدر الہام حیدر علیوف دی متحرک قیادت اتے ویژن دی تعریف کریندیں ہوئیں آکھیا جو اڄ اساں خطے دے تعاون اتے سانجھ دے ایں اہم اجتماع اچ شریک ہیسے۔ انہاں آکھیا جو آذربائیجان ڈی ایٹ اچ شامل تھیوݨ دے بعد پوری توانائی نال آپݨا کردار ادا کیتے۔ وفاقی وزیر اطلاعات آکھیا جو اے ویلھے دی اہم لوڑھ اےِ جو ترقی پذیر ملکاں دے مثبت بیانیے کوں دنیا دے سامݨے پیش کیتا ونجے اتے آپݨی کامیاب کہانیاں کوں درست انداز اچ دنیا تئیں پڄایا ونجے۔ انہاں زور ݙتا جو عالمی میڈیا منظر نامہ بے مثال تبدیلی دے دور توں لنگھدا پئے اتے سیاسی، معاشی، ماحولیاتی اتے انسانی بحران ہݨ جدید ٹیکنالوجی اتے جدید مواصلاتی ذریعاں دی وجہ توں پہلے توں کئی گنا تیکھی رفتار نال پھیلدا پئے۔ انہاں آکھیا جو اساں روایتی پرنٹ میڈیا کوں الیکٹرانک میڈیا اچ بدلدا ݙٹھا، اے ہک آہستہ آہستہ تھیوݨ آلا ارتقاء ہا جو ہک منظم اتے ساختیاتی عمل دے تحت وجود اچ آیا۔ انہاں آکھیا جو الیکٹرانک میڈیا توں ڈیجیٹل میڈیا تئیں آوݨ آلا ݙوجھا ارتقاء آپݨے ماحول اچ آپݨی رفتار نال آپݨے آپ تھیا، دنیا ایں ویلھے ݙو طرح دے لوکاں اچ ونڈی ڳئی اے، ڈیجیٹل امیگرنٹس اتے ڈیجیٹل نیٹوز اتے اے ونݙ ہک خوبصورت حقیقت اے کیوںجو ڈیجیٹل میڈیا اڄ تیکھا ترین مواصلاتی ذریعہ بݨ ڳئے۔ انہاں آکھیا جو اساں کوں ایں فورم تے ڈیجیٹل نیٹوز اتے ڈیجیٹل امیگرنٹس ݙوہیں کوں رَل مِل تے ٹرݨا پوسی، اے فورم ایں کیتے بہترین اےِ، اتھاں اساں نہ صرف آپس اچ تعاون کر سڳݨے بلکہ ہک ضابطہ اخلاق وی بݨا سڳدوں جئیں دے ذریعے اساں نویں نسل خاص طور تے جنریشن زی کوں سوشل میڈیا دے مثبت اتے تعمیری استعمال بارے تعلیم ݙے سڳوں۔ وزیر اطلاعات آکھیا جو پاکستان اچ میڈیا دا منظر نامہ بہوں مختلف اتے بہوں متحرک اےِ، ملک اچ 117 ملین انٹرنیٹ استعمال کرݨ آلے اتے 79.9 ملین سوشل میڈیا استعمال کرݨ آلے موجود ہن۔ پاکستان دی آبادی دا 68 فیصد حصہ او نوجوان ہن جنہاں دی عمر 30 سال توں گھٹ اےِ اتے ایہو وجہ اے جو پاکستان دا میڈیا لینڈ سکیپ مثبت انداز اچ تیکھی رفتار نال بدلدا پئےِ۔ انہاں آکھیا جو بھارت نال اڄوکی کشیدگی دے دوران انفارمیشن وار وی جاری ہائی جئیں اچ جنریشن زی اہم کردار ادا کیتا۔ درست معلومات ویلھے سر دنیا تئیں پڄا تے اے سانجھ میڈیا ہاؤسز، ڈیجیٹل پلیٹ فارمز اتے جنریشن زی وچال کامیابی نال تھیا جئیں دے نتیجے اچ پاکستان کیتے مؤثر اتے بھرپور بیانیہ سامݨے آیا۔ انہاں آکھیا جو اساں اے وی ݙٹھا جو غلط معلومات عوامی تاثر کوں خراب کریندی اے، معاشرتی پولرائزیشن کوں ودھیندی اتے اداریاں تے اعتماد کوں کمزور کریندی اے، ایہو وجہ اے جو میڈیا اداریاں وچال بہتر ہم آہنگی اساݙی ترجیحات اچ شامل اے۔ انہاں آکھیا جو سانجھے فیکٹ چیکنگ میکانزم، غلط معلومات دے خلاف مربوط حکمت عملی اتے شہریاں کوں درست معلومات ݙیوݨ اتے میڈیا لٹریسی دے ذریعے شہریاں کوں ایں قابل بݨاوݨ جو او معلومات کوں مؤثر طریقے نال سنڄاݨ سڳݨ۔انہاں آکھیا جو ڈی ایٹ فورم اجتماعی اقدامات کیتے ہک غیر معمولی پلیٹ فارم ݙیندے اتے اساݙے رُکن ملک سانجھے علم، ہم آہنگ حکمت عملیوں اتے سانجھے اقدامات توں بہوں فیدہ چا سڳدوں۔ انہاں تجویز ݙتی جو میڈیا تعاون کیتے باکو ڈیکلریشن جاری کیتا ونجے جو مستقبل دے روڈ میپ دا تعین کرے اتے ایں تے سارے رُکن ملکاں دا اتفاق تھیوے۔ انہاں آکھیا جو مجوزہ باکو ڈیکلیئریشن ڈی ایٹ ملکاں دے میڈیا پروفیشنلز اتے میڈیا وزارتاں کیتے اڳوں ودھݨ دا رستہ مقرر کر سڳدے۔ وفاقی وزیر اطلاعات آکھیا جو وزیراعظم شہباز شریف دا ایف بی آر اچ اصلاحات دا اقدام دنیا کیتے ہک مثال اے جئیں دی پیروی کیتی ونج سڳدی اےِ۔ اصلاحاتی عمل نال نہ صرف اساݙی آمدن اچ ودھارا تھیا بلکہ اداریاں تے عوام دا اعتماد وی بحال تھیا وفاقی وزیر اطلاعات سیکریٹری جنرل کوں انہاں دی کامیاب مدت، ڈی ایٹ ملکاں کیتے خدمتاں اتے گزریل سال قاہرہ اچ ڈی ایٹ سمٹ دے کامیاب انعقاد تے خراج تحسین پیش کیتا۔ انہاں ٹیکنالوجی دے استعمال اتے مصنوعی ذہانت دے ضابطہ اخلاق تے اتفاق دی لوڑھ تے زور ݙیندیں ہوئیں آکھیا جو کجھ پلیٹ فارمز تے مصنوعی ذہانت نال تیار کیتی ڳئی ویڈیوز موجود ہوندن، انہاں تے ہک خاص نشان ہووے جو اے اے آئی نال تیار کیتی ڳئی ہن۔ انہاں آکھیا جو بہتر تعاون اتے ڈی ایٹ میڈیا فورم سویں اقدامات نال اساں رابطیاں کوں مضبوط کرسڳدوں۔ انہاں آکھیا جو مضبوط رابطیاں کیتے پاکستان سارے ڈی ایٹ ملکاں نال تعاون ودھاوݨ کیتے تیار اے تانجو ایجھا فریم ورک بݨایا ونج سڳے جو امن، اعتماد اتے بحران نال نبڑݨ دی صلاحیت کوں بہتر بݨاوے۔ وفاقی وزیر آذربائیجان دی حکومت، صدر الہام حیدر علیوف، آذربائیجان پریذیڈنشل ایڈمنسٹریشن اچ خارجہ امور دے سربراہ حکمت حاجیوف اتے ڈی ایٹ سیکرٹریٹ دا شکریہ ادا کریندیں ہوئیں آکھیا جو ڈی ایٹ میڈیا فورم دے ذریعے رُکن ملکاں وچال میڈیا تعاون کوں ودھارا مِلیا، ایجھا نظام بݨاوݨ کیتے پُر امید ہیسے جئیں توں آوݨ آلی نسلاں فیدہ چَیسن، لوک ایں فورم کوں ݙہاکیاں بعد وی ایجھے نقطہ آغاز دے طور تے یاد کریسن جئیں ڈی ایٹ ملکاں دی عوام کیتے امن اتے خوشحالی دی بنیاد رکھی ہئی۔