سموگ دی شدت اچ گھٹکی اتے شہریاں کوں ریلیف ݙیوݨ کیتے تیکھے اتے سخت اقدامات کیتے ونڄݨ، قائم مقام صدر سید یوسف رضا گیلانی

ملتان۔ 21 نومبر (اے پی پی) قائم مقام صدر سید یوسف رضا گیلانی آکھیا جو سموگ دی شدت اچ گھٹکی اتے شہریاں کوں ریلیف ݙیوݨ کیتے تیکھے اتے سخت اقدامات کیتے ونڄݨ، فضائی آلودگی دے تدارک کیتے سارے متعلقہ ادارے فعال کردار ادا کرن اتے انسدادِ سموگ اقدامات تے سختی نال عملدرآمد یقینی بݨایا ونجے۔ اے ڳالھیں انہاں کمشنر ملتان عامر کریم خان نال ملاقات دے دوران کیتا۔ کمشنر ایں موقع تے ملتان ڈویژن اچ جاری ترقیاتی منصوبیاں، عوامی فلاح تے بہبود دے اقدامات، سموگ دی صورتحال اتے صحت عامہ نال متعلق معاملیاں تے تفصیلی بریفنگ ݙتی۔ قائم مقام صدر سید یوسف رضا گیلانی سیلاب دے دوران ضلعی انتظامیہ دی کارکردگی کوں سراہندیں ہوئیں آکھیا جو ویلھے سر ریلیف آپریشن اتے متاثرین دی بحالی انتظامیہ دی مؤثر حکمت عملی دا مظہر اے۔ سموگ دی شدت تے تشویش دا اظہار کریندیں ہوئیں قائم مقام صدر سید یوسف رضا گیلانی ہدایت کیتی جو شہریاں کوں ریلیف ݙیوݨ کیتے تیکھے اتے سخت اقدامات کیتے ونڄݨ۔ انہاں آکھیا جو فضائی آلودگی دے تدارک کیتے سارے متعلقہ ادارے فعال کردار ادا کرن اتے انسدادِ سموگ اقدامات تے سختی نال عملدرآمد یقینی بݨایا ونجے۔ ایں موقع تے ڈویژن دے ہسپتالاں دی صورتحال، ڈینگی کیسز اچ ودھارے اتے صحت عامہ دے انتظامات دا وی جائزہ گھدا ڳیا۔ قائم مقام صدر ہدایت کیتی جو ہسپتالاں اچ سہولتاں بہتر بݨائی ونڄن، ڈینگی توں بچاوݨ کیتے حفاظتی اقدامات ودھائے ونڄن اتے مریضاں دے ویلھے سر علاج کوں یقینی بݨایا ونجے۔ موسیٰ پاک دربار نال متعلق جاری ترقیاتی کم دے حوالے نال انہاں کمشنر ملتان کوں ہدایت کیتی جو دربار دے رُکے ہوئے تعمیراتی کم جلدی توں جلدی پورے کیتے ونڄݨ تاںجو زائرین کوں بہتر سہولتاں ݙتی ونڄ سڳݨ۔ کمشنر ملتان عامر کریم خان ایں موقع تے رُکنِ قومی اسمبلی سید علی قاسم گیلانی دی سیلابی صورتحال دے دوران انتھک محنت اتے متاثرین کیتے مستقل سرگرمیاں دا اعتراف وی کیتا۔ ملاقات اچ رُکنِ قومی اسمبلی سید علی قاسم گیلانی وی موجود ہن۔