پاکستان یورپی یونین دے نال ہک جامع اتے آپسی سانجھے داری ودھاوݨ کیتے پُرعزم اے، ترجمان دفتر خارجہ

اسلام آباد۔ 21 نومبر (اے پی پی) ترجمان دفتر خارجہ طاہر حسین اندرابی آکھیا جو نائب وزیراعظم اتے وزیر خارجہ سینیٹر محمد اسحاق ڈار برسلز دے جاری دورے دے دوران نیٹو ہیڈ کوارٹر دا دورہ کیتا اتے نیٹو دے سیکرٹری جنرل مارک روٹے نال ملاقات کیتی اے۔ ترجمان جمعہ کوں اتھاں پریس بریفنگ اچ آکھیا جو نائب وزیراعظم اتے نیٹو دے سیکرٹری جنرل وچال ملاقات اچ ݙوہیں فریقاں آپسی دلچسپی دے معاملیاں سودھا امن و سلامتی، دہشت گردی اتے علاقائی تے عالمی پیش رفت تے گالھ مہاڑ کیتی۔ ترجمان دفتر خارجہ آکھیا جو نائب وزیراعظم سینیٹر محمد اسحاق ڈار ہنگری دے وزیر خارجہ نال ݙو پاسہ ملاقات کیتی جئیں دے بعد ݙوہیں ملکاں ہنگریکم وظیفہ پروگرام 2026-2028 دے فریم ورک دے تحت تعاون بارے مفاہمت نامے دی تجدید تے دستخط کیتے۔ اے پروگرام پاکستانی طالب علماں کوں ہنگری اچ اعلیٰ تعلیم حاصل کرݨ کیتے 400  وظائف ݙیسی۔ انہاں آکھیا جو نائب وزیراعظم دا دورہ برسلز پاکستان اتے یورپی یونین دے تعلقات اچ ہک اہم سنگ میل اے۔ ترجمان آکھیا جو پاکستان یورپی یونین دے نال ہک جامع اتے آپس اچ فیدہ ݙیوݨ آلی شراکت داری ودھاوݨ کیتے پُرعزم اے۔