ماحولیاتی تبدیلی توں متاثرہ ترقی پذیر ملکاں دی مدد کیتے جدید ٹیکنالوجی دی منتقلی اتے عالمی سطح تے مضبوط شراکت داری ناگزیر اے، وفاقی وزیر ڈاکٹر مصدق ملک

بیلیم/اسلام آباد۔22 نومبر(اے پی پی) وفاقی وزیر موسمیاتی تبدیلی اتے ماحولیاتی ہم آہنگی سینیٹر ڈاکٹر مصدق ملک آکھیے جو ماحولیاتی تبدیلی توں متاثرہ ترقی پذیر ملکاں دی مدد کیتے فوری، قابلِ بھروسہ اتے منصفانہ مالی تعاون، جدید ٹیکنالوجی دی منتقلی اتے عالمی سطح تے مضبوط شراکت داری ناگزیر تھی چُکی اے۔ اے ڳالھ انہاں اقوام متحدہ دے عالمی ماحولیاتی سربراہی اجلاس دے موقع تے وزارت موسمیاتی تبدیلی و ماحولیاتی ہم آہنگی دی طرفوں منعقدہ اعلیٰ سطحی تقریب اچ آکھی۔ وزارت دے ترجمان محمد سلیم شیخ ݙسایا جو انہاں اجلاساں توں وفاقی وزیر موسمیاتی تبدیلی سینیٹر ڈاکٹر مصدق مسعود ملک، وزیر مملکت شزرہ منصب کھرل اتے وزارت دی سیکرٹری عائشہ حمیرہ مورانی خطاب کیتا۔ انہاں سیشنز اچ ٻہوں سارے ملکاں دے مذاکرات کاراں، ترقیاتی اداریں، سائنس داناں، تحقیقی ماہرین اتے سول سوسائٹی دے نمائندیں وݙی تعداد اچ شرکت کیتی۔ وفاقی وزیر ڈاکٹر مصدق ملک آکھیا جو اے تقریبات پاکستان دے ماحولیاتی چیلنجز، موافقت دے تقاضیں، جاری اصلاحاتی اقدامات اتے عالمی ماحولیاتی نظام اچ پاکستان دے ودھدے کردار کوں اُجاگر کرݨ دا موثر پلیٹ فارم ثابت تھئن۔ انہاں ݙسایا جو سیکرٹری عائشہ حمیرہ مورانی پاکستان دی شرکت دی حکمت عملی دی پلاننگ اتے رابطہ کاری دی قیادت کیتی اتے ایں ڳالھ کوں یقینی بݨایا جو پاکستان دا موقف سائنسی ثبوتاں، تکنیکی دلیلاں اتے واضح پالیسی سمت دے نال پیش تھیوے۔ انہاں آکھیا جو پاکستان دا پویلین ترقی پذیر ملکاں کیتے موافقت دیاں ضرورتاں، عالمی معاونت دے میکانزم، آفات دی پیشگی اطلاع، پاݨی دے نظام دی بحالی، ماحول دوست معیشت، ہنرمندی دی ترقی اتے ادارہ جاتی بہتری تے مفید ڳالھ مہاڑ دا محور بݨ چُکیے۔ انہاں آکھیا جو پاکستان دے تجربے ثابت کیتے جو جݙاں سائنس، ادارے اتے مالی وسائل ہک سمت اچ کم کرن تاں پائیدار لچک ممکن تھی ویندی اے۔ ایں موقع تے بین الاقوامی شرکاء آکھیا جو پاکستان عالمی ماحولیاتی انصاف اتے مالیاتی اصلاحات کیتے موثر آواز بݨ تے اُبھردا پئے اتے ترقی پذیر ملکاں دی حمایت کیتے عملی تجویزاں پیش کریندا پئے۔ انہاں ترقی یافتہ ملکاں تے زور ݙتا جو او آپݨے مالی اتے تکنیکی وعدیں دی تکمیل کرن تاں جو ترقی پذیر ریاستاں پائیدار ترقی اتے انسانی فلاح دے نال اڳوں ودھ سڳن۔