الیکشن حکام قومی اسمبلی دے 6 اتے پنجاب اسمبلی دے ست حلقیں اچ ضمنی انتخابات دی تیاریاں کوں چھیکڑی شکل ݙے ݙتی

اسلام آباد۔22 نومبر (اے پی پی) الیکشن حکام قومی اسمبلی دے 6 اتے پنجاب اسمبلی دے ست حلقیں اچ (کَل) اتوار کوں تھیوݨ آلے ضمنی انتخابات دی تیاریاں کوں چھیکڑی شکل ݙے ݙتی اے، شفاف اتے منظم پولنگ کوں یقینی بݨاوݨ کیتے وݙے حفاظتی اتے لاجسٹک اقدامات کیتے ڳئن۔ تفصیل موجب ، انہاں 13 قومی اتے صوبائی اسمبلی دے حلقیں اچ ضمنی انتخابات کیتے انتخابی مہم 21 اتے 22 نومبر دی وچلی رات کوں ختم تھئی۔ الیکشن کمیشن آف پاکستان خبردار کیتے جو انتخابی ضابطہ اخلاق دی خلاف ورزی کرݨ آلے دے خلاف سخت کارروائی کیتی ویسی۔ پولنگ اتوار (23 نومبر) کوں بغیر کہیں رکاوٹ دے سویلے 8 وڄے توں شام 5 وڄے تئیں ہوسی۔ ضلعی انتظامیہ الیکشن کمیشن دے نال رل تے پولنگ دے عمل کوں سوکھا اتے منظم طریقے نال انجام ݙیوݨ کیتے لاجسٹک اتے ٹرانسپورٹ دے جامع انتظامات کیتن۔ قومی اسمبلی کیتے این اے 18 ہری پور، این اے 96 فیصل آباد، این اے 104 فیصل آباد، این اے 129 لاہور، این اے 143 ساہیوال، این اے 185 ڈی جی خان جݙاں جو پی پی 73 سرگودھا، پی پی 87 میانوالی، پی پی 98 فیصل آباد، پی پی 115 فیصل آباد، پی پی 116 فیصل آباد، پی پی 203 ساہیوال اتے پی پی 269 مظفر گڑھ اچ پولنگ تھیسی۔ اے حلقے 9 مئی دے واقعیں توں پیدا تھیوݨ آلے مقدمیں دے سلسلے اچ ٻہوں سارے ارکان اسمبلی دی نااہلی توں بعد خالی تھئے ہن۔ وفاقی حکومت آوݨ آلے ضمنی انتخابات دے دوران سکیورٹی برقرار رکھݨ کیتے پاک فوج دے جواناں دی تعیناتی دی منظوری ݙے ݙتی اے۔ سرکاری نوٹیفکیشن موجب، فوجی دستے 22 توں 24 نومبر تئیں مخصوص حلقیں اچ تعینات رہسن، جیڑھے جو انتخابی سکیورٹی انتظامات اچ مدد کیتے ریزرو فورس دے طور تے کریسن۔