بحری شعبے اچ تکڑا تعاون، معلومات دے تبادلے، آگاہی اتے وقتی انتباہی نظام ویلھے دی دی اہم لوڑھ اے، نائب وزیراعظم اسحاق ڈار

برسلز ۔22 نومبر (اے پی پی) نائب وزیراعظم / وزیرِ خارجہ سینیٹر محمد اسحاق ڈار آکھیے جو پاکستان آپݨی جغرافیائی اہمیت دی وجہ توں بین الاقوامی بحری رستیں دے سنگم تے واقع اے اتے بحیرۂ عرب ملک دی قومی سلامتی، رابطہ کاری، معاشی استحکام اتے غذائی و توانائی دے تحفظ اچ مرکزی کردار ادا کریندے، کراچی توں گوادر تئیں پاکستان دیاں بندرگاہواں وسطی ایشیا دے خشکی اچ گھریے خطّے کوں عالمی تجارت نال جوڑݨ آلے اہم دروازے ہن۔ ترجمان دفتر خارجہ توں جاری بیان موجب ، چوتھے یورپی یونین انڈو پیسیفک وزارتی فورم دے دوران بحری اہم تنصیبات، رابطیں اتے ترقی متعلق آپݨے بیان اچ نائب وزیراعظم/وزیرِ خارجہ آکھیا جو اڄ دے بحری خطرے کثیرالجہتی اتے سرحداں توں پار ہن، جنہاں اچ بحری قزاقی، دہشت گردی، اسلحہ و منشیات دی سمگلنگ، بندرگاہی ڈھانچے کوں سائبر حملیں دا خطرہ، سمندری آلودگی اتے موسمیاتی تغیرات توں ساحلی علاقیں کوں درپیش چیلنجز شامل ہن۔ انہاں آکھیا جو بحری شعبے اچ مضبوط تعاون، معلومات دے تبادلے، آگاہی اتے وقتی انتباہی نظام ویلھے دی اہم لوڑھ اے۔ انہاں آکھیا جو پاکستان ایں ڳالھ تے یقین رکھیندے جو سانجھے اعتماد، شفافیت اتے بین الاقوامی قانون دی پاسداری دے ذریعے ہک محفوظ، پائیدار اتے لچکدار بحری ماحول تشکیل ݙتا ونڄ سڳدے۔ انہاں سمندری شعبے متعلق ترائے نکات تے زور ݙتا جنہاں اچ سمندراں کوں تعاون اتے مشترکہ خوشحالی دے خطّے دے طور تے برقرار رکھݨ کیتے تسلط پسندانہ یا استثنائی طریق کار توں پرہیز، رابطہ کاری کوں لچک دے نال ہم آہنگ کرݨا ہوسی تاں جو ہک خطے اچ رکاوٹ پوری دنیا تے اثرانداز نہ تھیوے جݙاں جو بحری ترقی کوں جدید ٹیکنالوجی اتے بین الاقوامی تعاون نال جوڑݨ شامل اے۔ انہاں ݙسایا جو پاکستان آپݨے مشترکہ بحری معلوماتی رابطہ مرکز کوں سپارکو دے تعاون نال سیٹلائٹ مانیٹرنگ اتے مصنوعی ذہانت تے مبنی جہاز رانی دے نظام نال مزید مضبوط بݨائے اتے ملک آپݨے شراکت داراں دے نال ایں شعبے اچ مزید تعاون چاہندے۔ نائب وزیراعظم و وزیرِ خارجہ آکھیا جو پاکستان یورپی یونین اتے ݙوجھے شراکت دار ملکاں دے نال تکنیکی تعاون، قواعد و ضوابط دے تبادلے اتے اہم بحری تنصیبات دے تحفظ کیتے صلاحیت سازی کوں ودھارا ݙیوݨ دا ارادہ رکھیندے۔ انہاں آکھیا جو پاکستان دا وژن اے اے جو سمندر امن، خوشحالی اتے مشترکہ ترقی دے رستے بݨئے رہن۔