وفاقی وزیر جنید انوار چوہدری آئی ایم او اسمبلی اَتے کونسل انتخابات وچ شرکت کیتے برطانیہ پڄ ڳئن

اسلام آباد۔ 23 نومبر (اے پی پی) وفاقی وزیر بحری امور محمد جنید انوار چوہدری برطانیہ پڄ ڳئن جِتھاں او انٹرنیشنل میری ٹائم آرگنائزیشن (آئی ایم او) دی 34ویں اسمبلی اَتے آوݨ آلے آئی ایم او کونسل انتخابات وچ پاکستان دی نمائندگی کریسن۔ جاری بیان موجب آئی ایم او وچ پاکستان دی فعال شرکت ملک دی وَدھدی ہوئی بحری صلاحیتاں اَتے پائیدار ترقی اَتے جدید بندرگاہی ڈھانچے دے ذریعے پاکستان کوں خطے دا تجارتی اَتے بحری سرمایہ کاری دا مرکز بݨاوݨ دے عزم دی نشانی اے۔جنید انوار چوہدری آکھیا پاکستان دا سرگرم کردار بحری معاملے وچ اِیندی اسٹریٹجک ترجیحات دی نمائندگی کریندے جِنہاں وچ علاقائی رابطیں کوں مضبوط بݨاوݨ، بندرگاہواں کوں اپ گریڈ کرݨ اَتے بلیو اکانومی کوں ودھاوݨ شامل اے۔ وفاقی وزیر آکھیا کہ آئی ایم او کونسل دی رُکنیت پاکستان دے بحری مفادات دے ودھارے، عالمی بحری سلامتی اَتے سکیورٹی وچ بہتری اَتے ماحولیاتی تحفظ دے بین الاقوامی معیار موجب اقدامات وچ اہم کردار ادا کریسی۔ آئی ایم او اسمبلی جیڑھی عالمی بحری ادارے دا ساریں توں وݙا فیصلہ ساز فورم اے، 24 نومبر توں 3 دسمبر 2025 تئیں منعقد تھیوݨ ویندی پئی اے جَݙاں جو کونسل دے انتخابات 28 نومبر کوں تھیسن۔ پاکستان آئی ایم او کونسل دی کیٹیگری سی دی نشست کیتے 2026-27 دی مدت دے انتخابات وچ حِصہ گھِندا پئے ۔ 40 رُکن ملکاں تے مشتمل اِے کونسل ادارے دے کماں دی نگرانی کریندی اے، نویں منتخب کونسل دسمبر وچ اپݨے چیئرمین اَتے وائس چیئرمین دا انتخاب کریسی۔ وفاقی وزیر بحری امور اِیں ڳالھ تے زور ݙِتّا جو پاکستان بین الاقوامی بحری تعاون کوں مزید ودھاوݨ کیتے پرعزم اے اَتے اِے انتخابی مہم عالمی بحری پالیسیاں دی تشکیل وچ مسلسل اَتے مؤثر کردار کوں یقینی بݨاوݨ دی کوششاں دا حصہ اے۔