جناح میڈیکل کمپلیکس منصوبہ نہ صرف پاکستان بلکہ پورے خطے اچ صحت دے شعبے دا مثالی منصوبہ تھیسی، وزیراعظم شہباز شریف دا جناح میڈیکل کمپلیکس بورڈ دے اجلاس توں خطاب

اسلام آباد۔ 24 نومبر (اے پی پی) وزیراعظم محمد شہباز شریف آکھیا جو جناح میڈیکل کمپلیکس منصوبہ نہ صرف پاکستان بلکہ پورے خطے اچ صحت دے شعبے دا ہک مثالی منصوبہ تھیسی۔ وزیراعظم آفس دے میڈیا ونگ توں جاری بیان موجب اُنہاں اے گالھ جناح میڈیکل کمپلیکس (جے ایم سی) دے بورڈ دے اجلاس دی صدارت کریندیں ہوئیں کیتی۔ اجلاس اچ بورڈ دے ارکان اتے متعلقہ اداریاں دے وݙے افسر وی موجود ہَن۔ وزیراعظم آکھیا جو جناح میڈیکل کمپلیکس اساں ساریاں دی سانجھی کوششاں نال بہوں جلد پورا تھیسی، اے منصوبہ نہ صرف پاکستان بلکہ ایں پورے خطے اچ صحت دے شعبے دا ہک مثالی منصوبہ تھیسی۔ وزیراعظم جناح میڈیکل کمپلیکس دی تعمیر دے مختلف مرحلیاں اچ تکنیکی تعاون ݙیوݨ اُتے آغا خان فاؤنڈیشن دا شکریہ ادا کیتا۔ وزیراعظم ہدایت کیتی جو جناح میڈیکل کمپلیکس دے علاج معالجے دے ساری مجوزہ مرکزاں اُتے کم تکھی کیتا ونڄے۔ اجلاس اچ جے ایم سی دے بورڈ جناح میڈیکل کمپلیکس دے منصوبے دی تعمیر دے ساریاں مرحلیاں اچ وزیراعظم دے مسلسل تعاون اتے راہنمائی اُتے اُنہاں دا شکریہ ادا کیتا۔ اجلاس کوں ݙسایا گیا جو جناح میڈیکل کمپلیکس اچ نہ صرف طبی خدمات بلکہ بین الاقوامی معیار دی طبی تربیت، تعلیم اتے تحقیق کیتے درکار سہولتاں دی فراہمی اُتے کم تیزی نال جاری اے، جناح میڈیکل کمپلیکس کوں عالمی معیار دے مطابق گھن آوݨ کیتے جدید ٹیکنالوجی دے ذریعے تحقیق اتے آرٹیفیشل انٹیلیجنس اتے روبوٹکس دا استعمال کیتا ویسی۔