سیاست اچ سَبھ توں وݙی غلطی بائیکاٹ اے، دھاندلی دا الزام او لاون جیڑھے میدان اچ ہوون، عطاء اللہ تارڑ

اسلام آباد۔ 24 نومبر(اے پی پی)وفاقی وزیر اطلاعات و نشریات عطاء اللہ تارڑ آکھیاے جو سیاست اچ سَبھ توں وݙی غلطی بائیکاٹ دی ہوندی اے، دھاندلی دا الزام اُو ویلھے لایا ونڄے جݙاں تساں آپ میدان اچ ہووو، اپوزیشن کہیں انتخابی عمل اچ آئی وی نئیں تاں دھاندلی دا الزام کیویں لیندی اے؟ اسلام اباد اچ تقریب دے بعد میدیا نال الیندے وفاقی وزیر اطلاعات آکھیا جو مثبت رویے نال مسئلے دا حل ممکن اے، ڈیجیٹل پلیٹ فارمز ویلھے دی لوڑ ہِن، اُنہاں دی تیزی نال ترقی ارتقائی عمل دا حصہ اے، حکومت ڈیجیٹل میڈیا دے ودھارے کیتے جامع اقدامات کریندی پئی اے۔ اُنہاں تجویز ݙتی جو ساریاں ڈیجیٹل پلیٹ فارمز رَل کر ہک ایسوسی ایشن بݨاوݨ تاں جو ایڈیٹوریل پالیسی اتے کوڈ آف ایتھکس دا باضابطہ نظام قائم تھی سڳے۔ وفاقی وزیر آکھیا جو حکومت ڈیجیٹل میڈیا کوں آفیشل حیثیت ݙیوݨ کیتے اقدامات کریندی پئی اے تاں جو اوکوں سپورٹ وی کیتا ونڄ سڳے اتے ݙوہاں پاسوں باقاعدہ ایڈیٹوریل پالیسی اتے کوڈ آف ایتھکس اُتے عمل درآمد یقینی بݨایا ونڄ سڳے۔ اُنہاں آکھیا جو آئی ٹی ایکسپورٹس ودھدیاں پئن، پاکستان دے آئی ٹی پروفیشنلز دی عالمی سطح تے تعریف کیتی ویندی پئی اے اتے حالیہ جنگ اچ روایتی میڈیا دے نال نال ڈیجیٹل میڈیا وی فرنٹ لائن کردار ادا کیتے۔ وزیر اطلاعات آکھیا جو ریاست دی مضبوطی اتے ملکی وقار کیتے ضروری اے جو ڈیجیٹل میڈیا اینڄھا مؤثر ٹول ٻݨے جیڑھا دشمن دے پراپیگنڈے دا ویلھے سِر اتے مضبوط جواب ݙیوے۔ اساݙا خواب اے جو پاکستان دا ڈیجیٹل میڈیا ٻہوں تکڑا تھیوے جو ڄڳ وی منے۔ ہک سوال تے انہاں آکھیا جو پیپلز پارٹی اساݙی اہم اتحادی جماعت اے، اُنہاں دی ہر سطح اُتے سپورٹ رہی اے اتے اُنہاں کوں عزت نال ݙیہدے ہیں۔ مظفر گڑھ اچ پیپلز پارٹی دے امیدوار دی ضمنی انتخاب اچ کامیابی تے اُنہاں پیپلز پارٹی کوں مبارکباد وی ݙتی۔ وزارت اطلاعات دے ڈیجیٹل اقدامات تے الیندے آکھیا جو منصب سنبھالݨ دے بعد پاکستان دا پہلا سرکاری ڈیجیٹل کمیونیکیشن ڈیپارٹمنٹ ٻݨایا گیا جیڑھا پہلے موجود نہ ہئی۔ ہݨ پاکستان ٹی وی لانچ تھی چکیے جݙاں جو آذربائیجان آپݨے لوکاں کوں ٹریننگ اتے اساݙا سسٹم ݙیکھݨ کیتے پاکستان بھیجݨ دی ڳالھ کیتی اے تاں جو او اتھاں وی اینڄھا نظام سرکاری طور تے بݨا سڳن۔ وفاقی وزیر آکھیا جو ڈی ایٹ وزرائے اطلاعات پاکستان دے پیش کیتے گئے فیکٹ چیکنگ نظام اتے خطے اچ سانجھے انسدادِ غلط معلومات پلیٹ فارم دے قیام دی تجویز دی توثیق کیتی اے۔ وفاقی وزیر عطاء اللہ تارڑ آکھیا جو سیاست اچ ہمیشہ در کُھلے رہندن، ایاز صادق فلور آف دی ہاؤس گالھ مہاڑ دی لوڑ اُتے زور ݙتا۔ اُنہاں آکھیا جو افسوسناک گالھ اے جو قومی سلامتی اتے ریاستی اداریاں کوں نشانے بݨاوݨ آلیاں پوسٹاں مسلسل سامݨے آندیاں پئین، اے کم کَون کریندا پئے؟ اُنہاں سوال چاتا جو دشمن ملک خصوصاً بھارت دے پاسوں افواج پاکستان اتے عسکری قیادت دے خلاف پروپیگنڈا کیتا ویندے ٻھل ڄیکر ایہا مہم ملک دے اندروں سوشل میڈیا اکاؤنٹس تے چَلائی ونڄے تاں ایںدے پِچھوں کیںدا ایجنڈا تھی سڳدے؟ اُنہاں واضح کیتا جو اینڄھے معاملیاں تے کوئی سمجھوتہ نہ تھی سڳدا۔ اُنہاں آکھیا جو فواد چوہدری دی افہام و تفہیم دی گالھ مثبت اے، اساں ایںدا خیرمقدم وی کیتے جݙاں جو ماضی اچ بݨݨ آلی کمیٹی کوں چھوڑ تے کون گیا ہا؟ بیانیہ دی جنگ اچ پاکستان سفارتی اتے عسکری محاذ اُتے نمایاں برتری ٹیم ورک دے تحت حاصل کیتی جیڑھا سویلین حکومت اتے ریاستی اداریاں دی مضبوط شراکت داری دا نتیجہ اے۔ وفاقی وزیر اطلاعات آکھیا جو جماعت اسلامی دا آپݨاں وژن اے، اُنہاں دے احتجاج ہمیشہ پرامن رہین۔ تنقید اُنہاں ضرور کیتی اے ٻھل تہذیب دے دائرے اچ رہ تے کیتی اے۔ اُنہاں آکھیا جو جماعت اسلامی وݙا جلسہ کر تے مثال قائم کیتی، اُتھاں ہک پَترا تئیں نئین ترٹا اتے کہیں سرکاری املاک کوں نقصان نہیں پُجیا۔ عطاء اللہ تارڑ آکھیا جو سیاسی کارکناں دے پاسوں صحافیاں اتے عوامی نمائندیاں کوں گھیرݨا، کیمرہ گھن تے پچھوں پے ونجݨ درست روایت نئیں، جواب ݙیوݨ آلا زیادہ سخت جواب ݙے سڳدے، ایں رَوِش کوں ختم کرݨا ہوسی۔ اُنہاں ہک حالیہ واقعے دا حوالہ ݙیندے ہوئیں ݙسایا جو ہک تریمت صحافی دی ٹرولنگ دے معاملے تے ادھے گھنٹے اچ نوٹس گھدا گیا۔ متعلقہ اکاؤنٹ 24 گھنٹے دے اندر غیر مشروط معافی منڳی۔ ایجھیاں مثالاں سیاسی قیادت کوں خود قائم کرݨیاں ہوندین۔ فیک نیوز روکݨ بارے اُنہاں آکھیا جو دنیا ایں ویلھے ݙو قسم دے لوکاں اچ ونڈی ہوئی اے، ہک ڈیجیٹل نیٹیوز ہِن جیڑھے ڈیجیٹل دور اچ پیدا تھئے، ہک ڈیجیٹل امیگرنٹس ہِن جیڑھے پیدا پہلے تھئے اتے ڈیجیٹل دنیا اچ ہجرت کر کر آئے، پرنٹ میڈیا توں الیکٹرانک میڈیا تئیں ارتقاء دا عمل ہک نظام دے تحت تھیا، ملک اچ پیمرا بݨی، اُنہاں اداریاں چینلز کھولے جنہاں دے اخبارات پہلے توں موجود ہَن، ایںدے نال وݙا چنڳاں نظام بݨ گئے۔ ݙوجھا ارتقاء الیکٹرانک توں ڈیجیٹل میڈیا اچ تھیا جیڑھا کہیں نظام دے تحت نئیں ٻھل ہک دم تھیا۔ اُنہاں تجویز ݙتی جو ڈیجیٹل میڈیا پلیٹ فارمز دی ایسوسی ایشن بݨا تے قواعد و ضوابط مرتب کیتے ونڄن تاں جو فیک نیوز روکݨ اچ مدد مِلے۔ اُنہاں آکھیا جو لکھاں ڈالر پاکستان دے اندرو ٻیہہ تے سوشل میڈیا پلیٹ فارمز تے کمائے ویندے پئن ٻھل قومی خزانے کوں ہک روپیہ وی نئیں مِلدا، ایں کیتے رجسٹریشن اتے ضابطہ سازی ضروری اے۔ وفاقی وزیر آکھیا جو پاکستان اچ کوئی اینڄھا ٹی وی چینل نئیں جیںدے اشتہارات بند ہوون، او اساݙا بیانیہ چَلاوݨ یا نہ چَلاوݨ ایںدے نال کوئی فرق نئیں پوندا، اے ٹی وی چینلز ہک نظام دے تحت رجسٹرڈ ہِن اتے رولز پورے کریندن، اُنہاں کولو لائسنس ہین تاں اے اہل ہین۔ جرنلسٹس پروٹیکشن قانون دے حوالے نال اُنہاں ݙسایا جو خیبر یونین آف جرنلسٹس، بلوچستان یونین آف جرنلسٹس، پنجاب یونین آف جرنلسٹس، سندھ یونین آف جرنلسٹس اتے پی ایف یو جے دے گروپس آپݨیاں نامزدگیاں ݙیون، حکومت اُنہاں کوں شامل کر گھنسی۔ اپوزیشن دے پاسوں ضمنی انتخاب اچ دھاندلی دے سوال تے وفاقی وزیر آکھیا جو سیاست اچ سَبھ توں وݙی غلطی بائیکاٹ دی ہوندی اے، دھاندلی دا الزام اُو ویلھے لاؤ جݙاں تساں میدان اچ ہوندے، جݙاں تساں کہیں انتخابی عمل اچ شریک نہیں تاں دھاندلی دا الزام کیویں؟