وزیر اعظم شہباز شریف نال سعودی مسلح افواج دے چیف آف جنرل سٹاف جنرل فیاض بن حامد الرویلی دی ملاقات

اسلام آباد۔ 24 نومبر(اے پی پی)وزیر اعظم محمد شہباز شریف نال سعودی عرب دی مسلح افواج دے چیف آف جنرل سٹاف جنرل فیاض بن حامد الرویلی اسلام آباد اچ ملین۔ ملاقات اچ پاکستان اتے سعودی عرب وچال اقتصادی، دفاعی اتے سکیورٹی سودھا ساریاں شعبیاں اچ تاریخی برادرانہ تعلقات کوں ٻیا تکڑا بݨاوݨ دا عزم دوہرایا ڳیا۔ ملاقات اچ نائب وزیراعظم و وزیر خارجہ سینیٹر محمد اسحاق ڈار، چیف آف آرمی سٹاف فیلڈ مارشل سید عاصم منیر، وزیر دفاع خواجہ محمد آصف، وزیراعظم دے معاون خصوصی طارق فاطمی اتے ٻئے وݙے حکام وی موجود ہن۔ خادم الحرمین شریفین شاہ سلمان بن عبدالعزیز اتے ولی عہد شہزادہ محمد بن سلمان بن عبدالعزیز السعود کیتے آپݨیاں نیک تمناواں پچیندے وزیراعظم پاکستان اتے سعودی عرب وچال اقتصادی، دفاعی اتے سکیورٹی سودھا ٻئے ساریاں شعبیاں اچ تاریخی برادرانہ تعلقات کوں ڳھاٹا کرݨ دا عزم ݙسایا۔ وزیراعظم جنرل الرویلی دا خیرمقدم کریندے برادر ملک سعودی عرب ولوں پاکستان کوں ہر ویلھے ݙتی ونجݨ آلی غیر متزلزل حمایت اتے یکجہتی اُتے سعودی عرب دی تعریف کیتی۔ اُنہاں زور ݙتا جو پاکستان اتے سعودی عرب دے تعلقات سانجھے مذہب، ہکو جہیاں قدراں اتے آپس دے اعتماد آلے ہین۔ وزیراعظم گزریل ݙو مہینیاں اچ ریاض دے آپݨے کامیاب دوریاں دا ݙسایا جیندے اچ ݙوہاں فریقاں وچال تاریخی سٹریٹجک آپس دے دفاعی معاہدے اُتے دستخط تھئے۔ وزیراعظم سانجھی تربیت، مشقاں اتے مہارت دے تبادلے سودھا ݙو طرفہ دفاعی تعاون کوں ٻیا تکڑا کرݨ کیتے پاکستان دا غیر متزلزل عزم دوہرایا۔ وزیراعظم ہر قسم دی دہشت گردی اتے انتہا پسندی دا مقابلہ کرݨ اتے خطے اچ امن و استحکام کوں ودھاوݨ کیتے ݙوہاں ملکاں دے سانجھے عزم کوں وی اڳونہا کیتے۔ جنرل الرویلی سعودی قیادت ولوں وزیراعظم اتے پاکستانی عوام کوں نیک خواہشات پچائن۔ اُنہاں پاکستان نال موجودہ بہترین دفاعی اتے تذویراتی شراکت داری کوں نویاں بلندیاں تئیں پُڄاوݨ کیتے مملکت دی مضبوط خواہش ݙسائی۔