جناح میڈیکل کمپلیکس اتے دانش یونیورسٹی دے منصوبیاں دی تکمیل اچ شفافیت کوں یقینی بݨایا ونجے، ترقیاتی عمل اچ جدید ٹیکنالوجی کوں استعمال کیتا ونجے، وزیراعظم محمد شہباز شریف

اسلام آباد۔ 25 نومبر(اے پی پی)وزیراعظم محمد شہباز شریف وفاقی دارالحکومت اچ جناح میڈیکل کمپلیکس اتے دانش یونیورسٹی دے منصوبیاں دی تکمیل اچ شفافیت دی ہدایت کریندے آکھیے جو تعمیراتی کم کیتے بہترین معیار رکھݨ آلیاں کمپنیاں دی خدمتاں ڳھدیاں ونڄن، ادائیگی دا عمل تریاکل توں کیتا ونجے، لوکاں دے حقوق اچ کمی ہووݨی چاہیدی اے نا ہی کوئی سیاست۔ انہاں اے ڳالھ اسلام آباد اچ جناح میڈیکل کمپلیکس اتے دانش یونیورسٹی دیاں سائٹس دے دورے ویلھے آکھی۔ جتھاں وزیر دفاع خواجہ محمد آصف، وفاقی وزیر پاور ڈویژن سردار اویس احمد خان لغاری، وفاقی وزیر پٹرولیم علی پرویز ملک، وفاقی وزیر اطلاعات و نشریات عطاء اللہ تارڑ وی موجود ہن۔ وزیراعظم کوں ݙوہاں منصوبیاں دی تعمیر دے معاملیاں تے بریفنگ ݙتی ڳئی۔ وزیراعظم آکھیا جو تعمیراتی کم کیتے بہترین معیار رکھݨ آلیاں کمپنیاں دی خدمتاںڳھدیاں ونڄن، پری کوالیفکیشن ہووݨی چاہیدی اے، ادائیگی دا عمل تھرڈ پارٹی دے ذریعے کیتا ونجے، لوکاں دے حقوق دی ادائیگی دے حوالے نال کہیں نال زیادتی نئیں تھیوݨی چاہیدی، گوگل توں وی ایندی میپنگ کیتی ونجے تانجو کوئی حقدار محروم نہ راہوے اتے غیر مستحق غلط فیدہ نہ گھن ونجے۔ انہاں آکھیا جو ایں عمل اچ کوئی سیاست نا ہوسی، سارا عمل شفاف اتے منصفانہ طریقے نال مکمل تھیوݨا چاہیدے۔ وزیراعظم ہدایت کیتی جو وفاقی وزیر پاور ڈویژن اتے وفاقی وزیر پٹرولیم دی نگرانی اچ اے منصوبہ مکمل تھیوݨا چاہیدے اتے او ایندی آپ نگرانی کرن۔ وزیراعظم آکھیا جو جناح میڈیکل کمپلیکس اتے دانش یونیورسٹی دی مینجمنٹ سودھا سارے معاملات ڈیجیٹائز تھیوݨے چاہیدن اتے عالمی معیار دا پیپر لیس اتے فیس لیس نظام ہووݨا چاہیدے۔ انہاں آکھیا جو ترقیاتی عمل اچ جدید ٹیکنالوجی کوں استعمال کیتا ونجے، سڑکاں دی تعمیر اچ معیاری کم کوں یقینی بݨایا ونجے اتے ہارٹیکلچر دا وی پلان ایںدے اچ رلاوݨا چاہیدے۔ ایں توں پہلے چیئرمین سی ڈی اے بریفنگ اچ ݙسایا جو ماہرین دی صلاح نال پی سی ون ٻݨائے، ایچ 16 سیکٹر انسٹیٹیوشنل سیکٹر اے، سرینگر ہائی وے دے نال ایں سیکٹر اچ جناح میڈیکل کمپلیکس اتے دانش یونیورسٹی دے ݙو وݙے منصوبے مکمل کیتے ویندے پئن۔ جناح میڈیکل کمپلیکس کیتے 600 کنال اتے دانش یونیورسٹی کیتے 800 کنال زمین رکھی ڳئی اے، ایندے نال نال کمرشل سیکٹر کیتے 200 کنال رکھی اے، ایندے علاوہ اسلام آباد ماڈرن جیل دا منصوبہ وی اتھاں مکمل کیتا ویندا پئے۔ انہاں ݙسایا جو سرینگر ہائی وے انٹرچینج دی تعمیر کیتے این ایچ اے کم کریندا پئے، واٹر سپلائی کیتے وی کم شروع تھی چُکیے، ݙو مہینے اچ اے کم مکمل تھی ویسی۔ وزیراعظم کوں ݙسایا ڳیا جو جناح میڈیکل کمپلیکس اتے دانش یونیورسٹی اچ بجلی، گیس اتے انٹرنیٹ دی سہولت ݙیوݨ دا پلان ٻݨا ڳھدے، ٹاور اتے گرڈ کیتے جاہ دی نشاندہی کر ݙتی ڳئی اے۔