وزیراعظم محمد شہباز شریف نال جمہوریہ آذربائیجان دے وزیر اقتصادیات میکائیل جباروف دی ملاقات

اسلام آباد۔ 25 نومبر(اے پی پی)پاکستان اتے آذربائیجان اقتصادی تعاون کوں ٻیا مضبوط بݨاوݨ کیتے کوششاں ودھاوݨ تے زور ݙیندے دفاعی پیداوار، پٹرولیم، معدنیات، تعمیرات، لائیو سٹاک، سیاحت اتے آئی ٹی سودھا ٻئے شعبیاں اچ ودھ تعاون دے مواقع ڳولݨ دا جائزہ گھدے جݙاں جو وزیراعظم محمد شہباز شریف آپسی دلچسپی دے سارے شعبیاں اچ آذربائیجان نال شراکت داری کوں ٻیا ودھاوݨ دا پاکستان دا عزم دوہرائے۔ منگل کوں وزیراعظم محمد شہباز شریف اتے جمہوریہ آذربائیجان دے وزیر اقتصادیات میکائیل جباروف وچال وزیراعظم ہاؤس اچ ملاقات تھئی۔ جمہوریہ آذربائیجان دے وزیر اقتصادیات وفد دے نال پاکستان دے سرکاری دورے تے ہین۔ ملاقات اچ ݙو طرفہ تجارت اتے سرمایہ کاری اچ تعاون دا جائزہ گھدا ڳیا۔ ݙو طرفہ تجارت اچ لڳاتار ترقی کوں سراہندے فریقین اقتصادی تبادلیاں اچ پیش رفت کیتے کوششاں تیکھیاں کرݨ دی لوڑھ تے اتفاق کیتے۔ انہاں دفاعی پیداوار، پٹرولیم اتے معدنیات، تعمیرات، لائیو سٹاک، سیاحت اتے آئی ٹی سودھا ٻئے شعبیاں اچ مزید تعاون دے مواقع ڳولݨ تے وی ڳالھ مہاڑ کیتی۔ وزیراعظم پاکستان آذربائیجان مشترکہ سرمایہ کاری کمپنی دے قیام دی تجویز کوں دوہرایا جیںدے اچ ݙوہاں ملکاں ولوں برابر دی شراکت داری ہووے۔ انہاں وائٹ آئل پائپ لائن پراجیکٹ اچ آذربائیجان دی دلچسپی کوں وی سراہیا اتے آذربائیجان دی کمپنی ایس او سی اے آر (SOCAR) کوں پاکستان اچ تیل اتے گیس دے شعبیاں اچ سرمایہ کاری کرݨ دی دعوت ݙتی۔ فریقین علاقائی رابطیاں کوں ودھاوݨ دی اہمیت تے زور ݙتا۔ وزیراعظم افغانستان اتے وسطی ایشیا کیتے ساریں توں مختصر رستے دے طور تے پاکستان دے سٹریٹجک محل وقوع ݙسایا اتے ٹرانس کیسپیئن انٹرنیشنل ٹریڈ کوریڈور جھیں اقدامات اچ آذربائیجان دے اہم کردار کوں سراہیا۔ وزیراعظم آذربائیجان دے صدر الہام علیوف کوں پاکستان دا سرکاری دورہ کرݨ دی دعوت وی ݙتی۔ وزیراعظم آپسی دلچسپی دے سارے شعبیاں اچ آذربائیجان دے نال اپݨی شراکت داری کوں مزید ڳُوڑھا کرݨ کیتے پاکستان دے پکے عزم کوں دوہرایا۔ آذربائیجان دے وزیر اقتصادیات دورہ پاکستان دے دوران انہاں دی مہمان نوازی تے حکومت پاکستان دا شکریہ ادا کیتا اتے امید کیتی جو پاکستان اتے آذربائیجان وچال جاری مثبت پیش رفت تجارت، معیشت، صنعت اتے سرمایہ کاری دے شعبیاں اچ تعاون دے روڈ میپ 2025-2028 کوں حتمی شکل ݙیوݨ دا سبب بݨسی۔ ملاقات اچ نائب وزیراعظم و وزیر خارجہ اسحاق ڈار، وفاقی وزیر پاور ڈویژن سردار اویس خان لغاری، وزیراعظم دے معاون خصوصی طارق فاطمی اتے متعلقہ اعلیٰ سرکاری افسران وی موجود ہن۔