پاکستان ٹیلی ویژن خطے دی ثقافت، زبان، موسیقی اتے ادب دا امین اے، چیئرمین سینیٹ سید یوسف رضا گیلانی

ملتان۔ 26 نومبر (اے پی پی) چیئرمین سینیٹ سید یوسف رضا گیلانی آکھیا جو پاکستان ٹیلی ویژن نہ صرف اطلاعات تے تفریح دا قومی ادارہ اے بلکہ اے ملک دے مختلف خطیاں دی ثقافت، زبان، موسیقی اتے ادب دی حقیقی ترجمانی وی کریندے۔ انہاں اے گالھ پاکستان ٹیلی ویژن دی 61ویں سالگرہ دے موقع تے پی ٹی وی ملتان اچ تھیوݨ آلی پُروقار تقریب نال خطاب کریندیں ہوئیں آکھی۔ انہاں ایں موقع تے اعلان کیتا جو پی ٹی وی ملتان سینٹر کوں جدید ضرورتاں دے مطابق بݨیندے ہوئیں جنوبی پنجاب دی ثقافتی سنڄاݨ کوں عالمی سطح تے ٻیا مؤثر طریقے نال اُجاگر کیتا ویسی۔ سید یوسف رضا گیلانی آپݨے خطاب اچ پی ٹی وی نال جُڑی یاداں دا ذکر کریندیں ہوئیں آکھیا جو پی ٹی وی دے سَنہری دور دے ڈرامے نہ صرف پورے پاکستان اچ مشہور ہن بلکہ بھارت سودھے ٻئے ملکاں اچ وی شوق نال ݙٹھے ویندن۔ انہاں ݙسایا جو جیلاں اچ قیدی پی ٹی وی دے ڈرامیاں دا بے چینی نال انتظار کریندے ہن، جیڑھے جو انہاں کیتے امید اتے حوصلے دا ذریعہ بݨدے ہن۔ انہاں آکھیا جو ایویں احساس انہاں کوں بطور وزیراعظم ملتان اچ پی ٹی وی سینٹر دے قیام دا فیصلہ کرݨ تے راضی کیتا۔ چیئرمین سینیٹ آکھیا جو پی ٹی وی ملتان دا قیام خطے دی تہذیب، سرائیکی زبان، موسیقی اتے ادبی ورثے دے ودھاوݨ اچ ہک بنیادی سنگ میل دی حیثیت رکھیندے۔

اتھاں دے لوک آپݨی تہذیب، ثقافت اتے روایتاں اچ ہک وکھرا مقام رکھیندن، ایں کیتے ضروری ہئی جو انہاں دی نمائندگی کیتے وکھرا ٹیلی ویژن سینٹر قائم کیتا ونجے، جیڑھا نہ صرف مقامی تشخص کوں اُبھارے بلکہ نویں فنکاراں، شاعراں، موسیقاراں اتے ادیباں کیتے موقع ݙیوے۔ انہاں آکھیا جو 2011 اچ پی ٹی وی ملتان سینٹر دا افتتاح ایں وژن دے تحت کیتا ڳیا ہئی تانجو علاقائی موسیقی، ادب، شعر و حکمت اتے ثقافتی سرگرمیاں کوں قومی پلیٹ فارم مِل سڳے۔ انہاں پی ٹی وی دی سالگرہ تے پوری قوم، خاص کر ملتان اتے جنوبی پنجاب دی عوام کوں مبارکباد ݙیندیں ہوئیں امید ظاہر کیتی جو ادارہ مستقبل اچ وی آپݨی بہترین روایتاں برقرار رکھیندیں ہوئیں اڳوں ودھدا راہوے۔ ایں توں علاوہ چیئرمین سینیٹ آپݨے اڄوکے دورہ آذربائیجان دا حوالہ ݙیندیں ہوئیں ݙسایا جو اُتھاں دے صدر نال ملاقات دے دوران انہاں آکھیا جو آذربائیجان اچ 700 سال پراݨا ”ملتان کاروان سرائے“ تاریخی ورثے دی علامت اے۔ آذربائیجان دے صدر انہاں کوں ݙسایا جو ایں دا ناں ایں کیتے برقرار رکھیا ڳئے جو تہاݙا تعلق وی ملتان توں اے۔ سید یوسف رضا گیلانی آکھیا جو ملتان ہک تاریخی شہر اے اتے ملتان دی تاریخ 5 ہزار سال پراݨی اے۔ انہاں تجویز ݙتی جو ملتان وانڳوں تاریخی اہمیت رکھݨ آلے عالمی شہراں کوں “سسٹر سیٹیز” قرار ݙے تے ثقافتی سفارت کاری کوں ودھایا ونجے۔ چیئرمین سینیٹ آکھیا جو پی ٹی وی جیڑھے ادارے ملک دی ثقافتی سنڄاݨ اتے قومی بیانیے کوں مضبوط بݨاوݨ اچ اہم کردار ادا کریندن، ایں کیتے انہاں دی ترقی اتے بہتری کیتے ہر ممکن اقدامات کرݨ ویلھے دی اہم لوڑھ اے۔ تقریب اچ ڈائریکٹر پروگرام سیف الدین، جنرل منیجر پی ٹی وی ملتان شفقت عباس ملک، مشہور گلوکارہ ثریا ملتانی، ملک حیدر عثمان ایڈووکیٹ، شاکر حسین شاکر، شہر دے معززین، شعرا، ادیباں اتے صحافیاں سودھا مختلف شعبیاں توں تعلق رکھݨ آلے لوکاں دی وݙی تعداد شرکت کیتی۔